Siku lelaki ti kaya sereta Lasarus nya watak ba cherita dalam siti ari cheramah Jesus. (Luke 16:19-31) Ba cherita tu, sida nya ngambarka dua iti raban: (1) tuai pengarap orang Judah ti sumbung maya jeman Jesus enggau (2) orang ke ngembuan ati lurus sereta dikemaruhka, tang sida nerima pesan Jesus.

Ba artikel tu

•  Nama utai ke dipadah Jesus pasal siku lelaki ti kaya sereta Lasarus?

•  Kati cherita tu amat nyadi?

•  Kati cherita tu nyukung pasal penemu api neraka?

•  Nama reti cherita siku lelaki ti kaya sereta Lasarus?

 Ba Luke bagi 16, Jesus nerangka dua iku lelaki ke ngasaika ubah ti besai.

 Tu lansa cherita ke dipadahka Jesus: Siku lelaki ti kaya idup lantang senang. Siku lelaki ti minta sedekah ke benama Lasarus dibai ngagai pintu penama rumah lelaki ti kaya nya. Iya amat ingin makai teda pemakai ke labuh ari mija orang kaya nya. Pengujung iya, orang ke minta sedekah nya mati lalu dibai bala melikat ngagai sepiak Abraham. Lelaki ti kaya nya mega mati lalu dikuburka. Ba cherita tu, kedua iku lelaki agi nemu utai taja pan udah mati. Lelaki ti kaya nya ke udah mati diperinsa ba dalam api ti mau lalu iya ngangauka Abraham kena ngasuh Lasarus nyepuhka tunjuk ke dalam ai kena ngenyelapka dilah iya. Abraham nulak peminta lelaki ti kaya nya lalu madah situasi seduai iya diatu udah berubah sereta bisi lebak ti dalam ke nyeraraka sida.

 Enda. Tu semina siti cherita ke dikena Jesus ngajar. Bala pakar mega setuju pasal tu. Ambika chunto, tajuk mit ba Luther’s Bible edisi 1912 madahka tu meh siti cherita. Lalu nota kaki ba Catholic Jerusalem Bible madahka, “Cherita tu nadai kaul enggau sesiku orang dalam sejarah.”

 Kati Jesus benung ngajar pasal utai ke deka nyadi pengudah sesiku orang mati? Kati reti ku Jesus nya, sekeda orang deka diperinsa ba api neraka pengudah sida mati? Lalu kati Abraham enggau Lasarus ba serega? Sekeda fakta nunjukka tu enda amat.

 Chunto:

•   Enti lelaki ti kaya nya amat diperinsa ba api neraka, endaka api nya ngerangkaika ai ke ba ujung tunjuk jari Lasarus?

•   Enti sema ai nya enda rangkai, kati setitik aja ai ulih ngenyamaika lelaki ti kaya nya, ke diperinsa dalam api neraka?

•   Lebuh Jesus nyeritaka sempama tu, enggau terang iya madahka, maya nya nadai siku pan orang kala niki ke serega. Enti pia, baka ni Abraham tau idup di serega ba maya nya deh?—John 3:13.

 Enda. Taja pan sempama tu ukai cherita ti amat, tang sekeda orang ngumbai sempama tu amat, lalu nyimpulka orang ti manah niki ke serega, lalu orang ke jai diperinsa ba api neraka. a

 Kati penerang tu masuk akal? Enda.

 Ajar pasal api neraka enda sejalai enggau utai ke dipadah Bup Kudus bekaul enggau utai ke nyadi lebuh orang mati. Chunto, Bup Kudus nadai kala madah, lebuh orang ke manah mati, sida deka idup lantang ba serega, lalu orang jai deka diperinsa ba api neraka. Iya ke amat, Bup Kudus enggau terang madahka: “Orang ke idup nemu diri deka mati, tang orang ke mati nadai nemu utai.”—Pengajar 9:5.

 Cherita tu madahka dua raban orang ke deka ngasaika mayuh ubah ba gaya pengidup.

 Lelaki ti kaya nya ngambarka tuai pengarap orang Judah, “ke angkunka duit.” (Luke 16:14) Sida ninga jaku Jesus tang sida nyakal utai ke dipadah iya. Bala tuai pengarap orang Judah ngemaruhka orang mayuh.—John 7:49.

 Lasarus ngambarka orang mayuh ke nerima jaku Jesus sereta sida ke dikemaruhka tuai pengarap bansa Judah.

 Ubah gaya pengidup ti besai ba dua raban tu.

•   Bala tuai pengarap ngumbai Petara rinduka sida. Tang, sida sempama udah mati lebuh Petara enggai nerima sida sereta chara sida nyembah, ketegal sida mega enggai nerima pesan Jesus. Sida mega berasai merinsa enggau pesan ke dikenataika Jesus enggau murid iya.—Matthew 23:29, 30; Surat Kereja Rasul 5:29-33.

•   Orang mayuh ke lama enda dipedulika bala tuai pengarap, deka ngasaika pengerindu ari Petara. Mayuh ari sida nerima jaku Jesus lalu bulih penguntung ari nya. Diatu sida bisi peluang ngasaika berekat ari Petara belama iya.—John 17:3.