Mayuh orang ke nyauka mati madahka, sida ngasaika semengat sida pansut ari tubuh, lalu sida meda penampak ti terang tauka ba endur ti amat manah. Siti bup ke betajuk Recollections of Death nerangka, “Bisi orang ngumbai, nya peneleba ti amat spesial laban ulih ngasaika diri tama ngagai siti endur ke bukai.” Taja pan Bup Kudus nadai nyebut pasal utai ke diasai enggau dipeda lebuh nyauka mati. Tang Bup Kudus ngembuan pemendar ke nunjukka utai ti nyadi nya ukai madahka pasal pengidup pengudah mati.

 Orang mati nadai nemu utai.

Bup Kudus madahka, orang mati “nadai nemu utai.” (Pengajar 9:5) Pengudah mati, kitai nadai agi ba dunya tu. Kitai nadai kini-kini tauka ba dini-dini endur. Bup Kudus nadai kala ngajar, pengudah kitai mati, kitai bisi semengat ke agi rerayau ba sesiti endur ke bukai. (Esekiel 18:4) Nya alai, semua utai ke diasai enggau dipeda orang ke nyauka mati, ukai genera pasal serega, neraka, tauka pengidup ba endur bukai.

 Kati bisi Lasarus becherita pasal utai ke nyadi maya iya mati pengudah iya diangkat idup baru?

Bup Kudus nulis cherita pasal pemati Lasarus. (John 11:38-44) Dini endur Lasarus sepemenjai empat hari iya mati? Uji gambarka, enti amat Lasarus benung ba endur bukai. Ba endur ke manah munyi ke disebut orang. Ukai enda Jesus nya amat kepapas lebuh iya ngidupka Lasarus idup baru? Nitihka Bup Kudus, Lasarus nadai kala becherita pasal utai ke nyadi maya iya mati. Enti amat nya kala nyadi, iya tentu balat gagit nusui semua utai ke nyadi, enda pia? Nambahka nya, Jesus ngumbai orang mati baka ke tinduk. Tu nunjukka, maya Lasarus mati, iya nadai nemu utai.—John 11:11-14.