Nadai mensia kala meda Petara. (Pemansut 33:20; John 1:18; 1 John 4:12) Bup Kudus ngumbai Petara nya “Roh.” Roh nya reti iya, utai idup ke enda ulih dipeda enggau mata mensia.—John 4:24; 1 Timoti 1:17.

 Tang melikat ulih meda Petara laban melikat nya roh. (Matthew 18:10) Nambahka nya, seraban mensia ke mati lalu diangkatka idup baru ba serega nyadi roh, ulih meda Petara.—Pilipi 3:20, 21; 1 John 3:2.

 Dalam Bup Kudus, leka jaku “meda” kesuah iya dikena madahka reti, mereti tauka nemu pasal sesiti utai. (Isaiah 6:10; Jeremiah 5:21; John 9:39-41) Nya kebuah kitai ulih madah, orang ke arapka Petara sereta nemu pasal kualiti Iya, ulih dikumbai “meda” Petara dalam ati iya. (Epesus 1:18) Bup Kudus ngajar kitai chara ngulihka pengarap ke baka nya.

•   Ari beratika utai ti ditempa Petara, kitai ulih nemu pasal kualiti Iya. Baka pengerindu, rindu meri, pemandai, sereta kuasa Iya. (Rome 1:20) Baka Jop, iya nya seiku lelaki ke bisi pengarap ngagai Petara. Pengudah iya beratika utai ti ditempa Petara, iya ngasaika diri baka ke meda Petara.—Jop 42:5.

•   Ari belajarka Bup Kudus, kitai ulih ngelala sapa Petara. Nya meh kebuah Bup Kudus ulih meransang kitai ‘ngiga Petara, lalu Iya deka nyambut kitai.’—1 Bansa Israel 28:9; Masmur 119:2; John 17:3.

•   Lebuh kitai mansik pasal pengidup Jesus, kitai mega ulih ngelala sapa Petara. Laban Jesus ulih neladan Apai iya enggau sempurna, iya ulih madahka, “Barang sapa udah meda Aku, udah meda Apai.”—John 14:9.

•   Enti kitai idup sejalai enggau ukum Petara, kitai ulih meda tauka ngasaika baka ni Iya merekat kitai. Jesus madah, ‘Beberekat meh orang ke tuchi ati, laban sida deka meda Petara.’ Kelimpah ari nya, seraban orang ke ngelantangka ati Petara deka diangkatka ngagai serega lalu ulih “meda” Petara.—Matthew 5:8; Masmur 11:7.

 Ari utai ke ditulis ba Bup Kudus, baka ke kala bisi mensia meda Petara. Tang, lebuh beratika semua batang isi utai ke ditulis ba Bup Kudus nya nunjukka, iya ke amat sida meda melikat ke ngarika Petara, tauka sida meda Petara nengah genera aja.

 Melikat.

Jeman kelia, Petara nganjung melikat ngarika Iya, madah pasal jaku Iya ngagai mensia. (Masmur 103:20) Ngambika chunto, Petara kala bejaku ngagai Moses ari dalam babas ke berapi, Bup Kudus nulis, ‘Moses lalu mampul mua diri, laban iya takut merening ngagai Petara.’ (Pemansut 3:4, 6) Tang tu ukai reti iya Moses ngerang-ngerang meda Petara. Iya ke amat, ayat tu nunjukka Moses meda ‘melikat Petara.’—Pemansut 3:2.

 Pia mega, lebuh Bup Kudus nulis Petara “bejaku betunga mua enggau Moses,” nya reti iya Petara bejaku ngagai Moses baka ke bejaku ngagai seiku kaban ti rapat. (Pemansut 4:10, 11; 33:11) Nambahka nya, Moses nadai meda mua Petara, laban pesan ke diterima iya nya dikenataika “bala melikat.” (Galatia 3:19; Kereja Rasul 7:53) Taja pia, pengarap Moses ngagai Petara amat kering nyentukka dalam Bup Kudus nulis, iya ‘indah-indah baka ke meda Petara ti enda ulih dipeda.’—Hebrew 11:27.

 Petara mega kala bejaku enggau Abraham enggau chara ti sama, iya nya nengah melikat. Endang amat, enti kitai macha Bup Kudus enggau ngelansa, kitai engka ngumbai Abraham amat ngerang-ngerang meda Petara. (Pemungkal 18:1, 33) Tang, enti kitai macha semua cherita ba ayat nya, kitai nemu “tiga iku lelaki” ke datai ngelawa Abraham nya, melikat ke dianjung Petara. Abraham nemu melikat nya ngarika Petara, nya kebuah iya bejaku enggau sida baka ke bejaku enggau terus ngagai Petara.—Pemungkal 18:2, 3, 22, 32; 19:1.

 Genera.

Petara mega mandangka diri nengah genera, tauka ngambarka sesiti utai ke pansut ari runding seseiku orang. Ngambika chunto, lebuh Bup Kudus madahka Moses enggau sekeda bansa Israel ‘meda Petara ke disembah orang Israel,’ tu nunjukka sida ‘meda Petara’ nengah genera. (Pemansut 24:9-11) Kelimpah ari nya, kadang-kadang Bup Kuds mega madahka bala nabi ‘meda Petara.’ (Isaiah 6:1; Daniel 7:9; Amos 9:1) Tang, enti beratika semua cherita nya enggau nyemetak, nya nunjukka sida meda genera pasal Petara, ukai ngerang-ngerang meda Petara.—Isaiah 1:1; Daniel 7:2; Amos 1:1.