Semua orang bisi nama diri empu. Nyadi, endaka nya masuk akal Petara pan bisi nama? Lebuh kitai bekaban enggau orang bukai, kitai sigi deka nemu sereta ngena nama iya. Endaka kitai patut ngereja utai ti sama lebuh deka nyadi kaban Petara?

 Bisi sekali, Petara madah ngagai Moses, “Tu meh utai ke patut dipadahka nuan ngagai orang Israel: ‘Jehovah, Petara aki ini kita, Petara Abraham, Isak, enggau Jakop, udah nganjung aku ngagai kita.’ Tu meh nama Aku nyentukka belama iya, lalu tu meh nama ke patut dikingatka ari generasi ke generasi.” (Pemansut 3:15, Salin Dunya Baru)

 Taja pan Petara ngembuan mayuh gelar, nyengkaum “Petara ti Pemadu Bekuasa,” “Tuan ti Pemadu Tinggi,” enggau ‘Iya ke ngaga semua utai,’ Iya meri basa ti besai ngagai bala penyembah Iya lebuh iya mai sida ngena nama Iya Empu maya bejaku enggau Iya.—Pemungkal 17:1; Surat Kereja Rasul 4:24; 1 Peter 4:19.

 Nama Petara bisi ayan ba nota kaki ayat Pemungkal 22:14 dalam salin Bup Kudus Baru. Ba dia, Abraham meri nama “Yahweh Jireh” ngagai siti alta, ti mai reti “Jehovah Deka Nyediaka.”

 Mayuh pakar Bup Kudus deka nyepil nama nya “Yahweh,” baka ke ayan ba nota kaki ke disebut tadi dalam Bup Kudus Baru, ba senentang Penerang Leka Jaku di baruh tajuk “Tuhan,” pia mega ba Jako Penerang dalam salin Berita Manah Ka Rebak Diatu. Taja pia, Jehovah nya chara nyepil ke lebih ditemu orang kemayaharitu. Nama tu bisi ba Jaku Penerang dalam Bup Kudus Baru sereta dikena ba semua Salin Dunya Baru. Begian keterubah Bup Kudus ukai ditulis dalam jaku Iban, tang dalam jaku Hebrew. Jaku Hebrew nya dibacha ari kanan ke kiba. Ba bansa jaku nya, nama Petara ditulis ngena empat iti urup konsonan, יהוה. Enti nukar empat iti urup jaku Hebrew nya ngagai abjad kitai, iya ditulis YHWH, lalu nya dikumbai Tetragrammaton a.