Penusah ti Besai nya siti timpuh ti deka datai, iya nya maya ti pemadu tusah ngagai bala mensia. Nitihka jaku benabi dalam Bup Kudus, utai tu deka nyadi lebuh “hari ti penudi,” tauka “pengujung dunya.” (2 Timoti 3:1; Daniel 12:4) “Penusah ti baka nya nadai kala nyadi kenyau ari Petara nempa semua utai nyentuk ngagai seharitu, lalu iya enda agi nyadi pengudah nya.”—Mark 13:19; Daniel 12:1; Matthew 24:21, 22.

Utai ke deka nyadi maya Penusah ti Besai

•   Pengarap ti pelesu deka dipunaska. Pengarap ti pelesu deka dipunaska enggau ngenyit sereta jampat. (Pemandang 17:1, 5; 18:9, 10, 21) Pertubuhan Bangsa-Bangsa Bersatu, ke ngarika bala politik, deka ngemunaska pengarap pelesu nitihka peneka Petara.—Pemandang 17:3, 15-18. a

•   Pengarap ti bendar deka diserang. Dalam siti genera ke dipeda Esekiel, siti raban menua ti begempung, ke dikumbai Gok ari Magok, deka nguji ngemunaska orang ke megai pengarap ti bendar. Taja pia, Petara deka ngelindung bala penyembah Iya ari dirusak.—Esekiel 38:1, 2, 9-12, 18-23.

•   Semua mensia deka diakim. Jesus deka ngakim semua mensia lalu “iya deka nyeraraka sida ari pangan diri, baka pengibun bedus ke nyeraraka bedus ari kambin.” (Matthew 25:31-33) Jesus deka ngaga pemutus pasal orang bepanggai ba sekalika sida udah nyukung bala “menyadi” Jesus (iya nya sida ke deka merintah ba serega) tauka enda.—Matthew 25:34-46.

•   Sida ke deka merintah enggau Jesus ba serega deka digumpul. Sida ke dipilih merintah enggau Jesus, deka ngujungka pengidup sida ba dunya lalu diangkatka idup baru ba serega.—Matthew 24:31; 1 Korint 15:50-53; 1 Tesalonika 4:15-17.

•   Armagedon. “Perang ke nyadi maya hari besai Petara ti Pemadu Bekuasa” mega dikumbai “hari Jehovah.” (Pemandang 16:14, 16; Isaiah 13:9; 2 Peter 3:12) Pengudah diakim Jesus, sida ke jai deka dipunaska. (Sepaniah 1:18; 2 Tesalonika 1:6-10) Jelu siga ti bisi tujuh igi pala nya ngambarka sistem politik ba serata dunya, lalu semua sida deka dirusak ba maya nya.—Pemandang 19:19-21.

Utai ke deka nyadi pengudah Penusah ti Besai

•   Sitan enggau bala melikat ti jai deka dikurungka. Siku melikat ti amat bekuasa deka muai Sitan enggau bala melikat ti jai “ngagai lubang ti amat dalam,” lalu tu ngambarka sida enda ulih ngereja nama-nama utai, sama baka orang ke udah mati. (Pemandang 20:1-3) Lebuh Sitan ba dalam lubang nya, iya baka ke dijil lalu iya enda ulih nesatka runding mensia ba dunya.—Pemandang 20:7.

•   Pun timpuh seribu taun. Perintah Petara deka merintah pengelama 1,000 taun lalu tu deka mai mayuh berekat ngagai semua mensia. (Pemandang 5:9, 10; 20:4, 6) “Seraban orang ti mayuh” ti enda alah diitung deka “selamat pansut ari Penusah ti Besai,” lalu sida deka meda pun timpuh 1,000 taun nya.—Pemandang 7:9, 14; Masmur 37:9-11.