Au. Seagi nuan ngereja utai ti betul, Petara deka ngampunka nuan. Dalam Bup Kudus madah, Petara “seruran deka ngampun”, lalu Iya ngampun enggau ati ti deka. (Nehemiah 9:17; Masmur 86:5; Isaiah 55:7) Lebuh Petara ngampunka kitai, Iya ngampunka kitai enggau pengabis ati. Dosa kitai deka dibuai tauka dipadam. (Kereja Rasul 3:19) Petara mega ngampunka kitai, lalu enda ingatka dosa kitai belama iya. Iya madahka, “Aku enda agi ingatka penyalah sida.” (Jeremiah 31:34) Pengudah Petara ngampunka kitai, Iya enda nyebut agi penyalah kitai, ngambika kitai diukum mayuh kali.

 Tang, Petara ngampunka kitai ukai ketegal Iya lemi, tauka nitihka ati. Standard Iya ke sempurna enda kala berubah. Nya kebuah, sekeda dosa enda diampunka Petara.—Joshua 24:19, 20.

Chara ngulihka pengampun ari Petara

1.   Nuan patut nemu dosa nuan nya udah ngelanggar ukum Petara. Taja pan orang bukai engka tusah ati ketegal ulah nuan, tang kingatka meh dosa nuan nya udah ngemediska ati Petara.—Masmur 51:1, 4; Kereja Rasul 24:16.

2.   Ngaku dosa nuan ngagai Petara nengah sampi.—Masmur 32:5; 1 John 1:9.

3.   Berasai tusah ati ketegal dosa ke udah dikereja nuan. “Ati ti tusah” tu ulih ngasuh seseiku orang nesal ati lalu berubah. (2 Korint 7:10) Nesal ati mega mai reti, nuan nesal enggau pemutus ke udah digaga ke ngujungka dosa nya nyadi.—Matthew 5:27, 28.

4.   Berubah meh, ‘lalu pulai baru ngagai Petara’. (Kereja Rasul 3:19) Nuan patut ngetu ari ngereja utai ti salah, tauka ngubah chara pengidup nuan nyengkaum ba runding sereta ulah.—Epesus 4:23, 24.

5.   Ngiga chara ngemetulka utai ti salah ke udah dikereja nuan. (Matthew 5:23, 24; 2 Korint 7:11) Minta ampun ngagai orang ke udah tusah ati ketegal nuan, enda ngira nya salah nuan tauka ukai. Putarka meh penanggul tu enggau pengelengkas ke ulih.—Luke 19:7-10.

6.   Besampi ngagai Petara minta pengampun nengah tebus Jesus. (Epesus 1:7) Nuan mega patut ngampunka penyalah orang bukai, nya baru Petara deka nyaut sampi nuan lalu ngampunka nuan.—Matthew 6:14, 15.

7.   Enti nuan udah ngereja dosa ti besai, padahka ngagai seiku orang ke layak. Iya ulih nulung nuan ba pengarap lalu besampika nuan.—James 5:14-16.

Runding ti salah pasal bulih pengampun ari Petara

 “Enti aku ngaku dosa ngagai paderi tauka tuai pengarap, dosa aku udah dibuai.”

 Kemayaharitu, Petara nadai kala meri kuasa ngagai mensia kena ngampunka orang bukai. Taja pan orang ke bedosa nya berasai nyamai agi pengudah ngaku dosa diri ngagai orang bukai, tang semina Petara aja ke layak ngampunka dosa.—Epesus 4:32; 1 John 1:7, 9.

 Enti baka nya, nama reti ku Jesus lebuh iya madah ngagai bala rasul iya, “Enti kita ngampun dosa orang, orang nya diampun ari dosa sida.”? (John 20:23) Tu nunjukka iya deka meri bala rasul iya kuasa lebuh sida nerima roh kudus.—John 20:22

 Baka ke disemayaka Jesus, bala rasul iya nerima kuasa ti spesial tu lebuh sida diiri enggau roh kudus kena 33 Masihi. (Kereja Rasul 2:1-4) Rasul Peter mega ngena kuasa tu maya iya semak ngagai Ananias enggau Sapira. Ketegal kuasa tu, Peter nemu seduai iya bula, lalu seduai iya diukum. Tu nunjukka dosa seduai iya enda ulih diampunka.—Kereja Rasul 5:1-11.

 Kelia, Petara mega kala meri orang kuasa ngereja pengawa ajih, lalu ulih bejaku ngena bansa jaku ke bukai. Tang pengudah bala rasul mati, pemeri tu nadai agi. Pia mega nadai agi orang ke ulih ngampunka dosa orang bukai. (1 Korint 13:8-10) Nya alai, nadai seiku pan mensia ulih ngampunka orang bukai kemayaharitu.