John Pemaptisa seiku ari nabi Petara. (Luke 1:76) Iya ada enda lama sebedau pengujung abad keterubah S.M. lalu iya idup nyentukka abad keterubah M. Petara meri iya tanggungjawap nyediaka jalai ke Messiah, tauka Kristus. John ngereja tu enggau nusui pesan Petara ngagai orang Judah ngambika sida tekuing ati pulai baru ngagai Petara.—Mark 1:1-4; Luke 1:13, 16, 17.

 Pesan John nulung orang ke lurus ati ngelala Messiah nya Jesus ari Nasaret. (Matthew 11:10) John meransang bala peninga iya nesal ati ke dosa sida lalu dibaptisa. (Luke 3:3-6) Ketegal John maptisa mayuh orang, iya dikumbai John Pemaptisa. Baptisa ti pemadu besai reti ke dipejalaika John, iya nya baptisa Jesus. a—Mark 1:9.

Dalam artikel tu

•  Nama utai ti ngalitka ati pasal John Pemaptisa?

•  Sapa apai indai John Pemaptisa?

•  Sapa munuh John Pemaptisa?

•  Kati John Pemaptisa bepekit enggau Jesus?

•  Berapa iku lelaki ke benama John ditulis dalam Bup Kudus?

 Kereja ti dipejalaika John udah dipadah dalam jaku benabi: Nengah pengawa nginjil iya, John ngamatka jaku benabi ti ditulis pasal seruan Jehovah. (Malaki 3:1; Matthew 3:1-3) Iya ‘nyediaka bala nembiak Petara, ke udah disedia ke Petara.’—reti nya, John nyediaka jalai ke orang Judah nerima pesan ari orang ke dipilih Jehovah, iya nya Jesus Kristus.—Luke 1:17.

 Jemah ila: Jesus madah “nadai siku ke besai agi ari John Pemaptisa. Tang iya ke pemadu mit dalam Perintah serega, lebih agi besai ari iya.” (Matthew 11:11) Ketegal John ukai semina seiku nabi, tang pia mega “seruan” Petara, iya besai agi ari semua nembiak Petara ke datai sebedau iya. Jaku Jesus nunjukka John enda ulih nyadi raja ba Perintah Petara. b Nabi ke tetap ati tu mati sebedau Kristus muka jalai ngagai pengidup ba serega. (Hebrew 10:19, 20) Taja pia, John deka nyadi seiku ari rayat Perintah Petara ba bumi, lalu bisi pengadang idup belama iya ba Paradais.—Masmur 37:29; Luke 23:43.

 Apai indai John sepasang laki bini ke benama Sekariah enggau Elisabet. Sekariah seiku imam orang Judah. John ada ketegal kereja ajih. Indai iya mandul, lalu enda ulih ngadaka anak. Pia mega, Elisabet seduai Sekariah “tuai amat umur.”—Luke 1:5-7, 13.

 Raja Herod Antipas ngasuh orang mumpung pala John. Iya ngereja tu nitihka asuh bini iya, Herodias. Herodias begedika John laban John kala madah ngagai Herod (ke ngumbai diri orang Judah) tikah seduai iya ngelanggar adat orang Judah.—Matthew 14:1-12; Mark 6:16-19.

 Bup Kudus nadai nyebut seduai iya bepekit. (John 3:25-30) Kebendar iya, John empu madahka pasal tanggungjawap iya nyediaka jalai ke Messiah, ukai bepekit enggau iya. John madah: “Tu meh kebuah aku datai lalu maptisa orang ngena ai, ngambika Iya dipandangka ngagai orang Israel.” Pengudah nya, iya madah: ‘Iya nya Anak Petara’ (John 1:26-34) John gaga amat ati ninga pasal pemujur Jesus ba pengawa nginjil.