Pemati nya munsuh kitai, nya kebuah kitai enggau naka ulih nyaga nyawa diri. (1 Korint 15:26) Taja pia, mayuh orang kelalu takut ketegal ajar sereta adat ti pelesu. Ketegal tu, sida “nyadi ulun seumur idup ari penakut sida ke pemati.” (Hebrew 2:15) Enti nuan nemu pemendar pasal pemati, nuan deka dilepaska ari penakut ti ulih ngachau peluang nuan gaga ati.—John 8:32.

Pemendar pasal pemati

•   Orang mati enda nemu nama-nama utai. (Masmur 146:4) Nuan enda ibuh takut, pengudah mati nuan deka ngasaika pemedis tauka pemerinsa. Laban Bup Kudus nyemaka pemati nya baka ke tinduk.—Masmur 13:3; John 11:11-14.

•   Orang mati enda ulih ngemediska kitai. Indah bala munsuh pan “enda idup agi.” (Isaiah 26:14) Bup Kudus madah: “Pemenchi sida, pengingin sida, semua dibai sida mati.”—Pengajar 9:6.

•   Pemati ukai pengujung semua utai. Petara deka ngangkatka orang ke udah mati idup baru.—John 5:28, 29; Surat Kereja Rasul 24:15.

•   Petara besemaya, jemah ila “pemati nadai agi.” (Pemandang 21:4) Bup Kudus mega madah: “Orang ke lurus deka bempu menua tu lalu diau ditu belama iya.” Maya tu, semua orang deka dilepaska ari takut ke pemati.—Masmur 37:29.