Luke 2:1-52
2 Maya nya raja Rome,* Augustus, meri atur ngasuh semua orang ba serata dunya ngerejista nama diri.
2 Tu keterubah iya pengawa ngerejista dikereja. Pengawa tu dikereja lebuh Kurinius nyadi gabenor menua Siria.
3 Nya alai, semua orang mansang ngagai nengeri diri empu, lalu ngerejista nama diri.
4 Josep mega mupuk ari nengeri Nasaret ba Galili lalu mansang ngagai Judea. Ketegal iya ari peturun David, nya alai iya mupuk ngagai nengeri David, ti dikumbai Betlehem.
5 Iya ngerejista diri enggau bini iya Maria. Maya nya, Maria nganti maya deka beranak.
6 Maya seduai iya ba din, Maria pan chukup bulan alai beranak.
7 Iya ngadaka siku anak lelaki. Nya meh anak tuai iya. Iya malut anak nya ngena kain, lalu ngalika iya dalam dulang,* laban sida nadai bulih bilik endur bemalam.
8 Malam nya, ba endur ti sama, bala pengibun bedus diau ba padang, ngibun raban bedus sida.
9 Enda mukai-mukai, melikat Jehovah bediri ba mua sida, lalu mulia Jehovah manchar ngelingi sida. Nya alai, sida balat amat takut.
10 Tang ku melikat nya bejaku ngagai sida: “Anang takut! Aku datai mai berita manah. Berita tu deka ngasuh semua orang balat gaga ati.
11 Seharitu, ba nengeri David, penyelamat kita, iya nya Tuan Kristus, udah ada.
12 Tu tanda ti diberi ngagai kita: Kita deka nemu siku anak ti dibalut ngena kain, gali ba dalam dulang.”
13 Tekala nya, seraban besai melikat* serega sama enggau melikat nya, muji Petara. Ku sida:
14 “Muliaka Petara ti ba serega, lalu awakka orang ba dunya ti ngagaka ati* Iya bulih pengelantang.”
15 Pengudah bala melikat nya ninggalka sida lalu pulai ke serega, bala pengibun bedus nya lalu bejaku enggau pangan diri: “Aram kitai mupuk ngagai Betlehem diatu, lalu meda utai ke udah nyadi, baka ke udah dipadahka Jehovah ngagai kitai.”
16 Sida pan beguai-guai mupuk lalu tetemuka Maria seduai Josep sereta siku anak ke gali dalam dulang.
17 Lebuh sida meda anak nya, sida madah ngagai orang ba dia, utai ke dipadahka melikat pasal anak nya.
18 Semua orang ke ninga utai ke dipadahka bala pengibun bedus nya balat alit ati.
19 Tang Maria nyimpan semua jaku nya dalam ati iya lalu berundingka enggau dalam nama reti jaku nya.
20 Udah nya, lebuh pulai, semua pengibun bedus nya muji sereta ngemuliaka Petara, ketegal semua utai ti udah didinga sereta dipeda sida. Semua utai nya amat nyadi, baka ke udah dipadahka ngagai sida.
21 Lebuh anak nya beumur lapan hari, anak nya pan disunat.* Iya diberi nama Jesus. Nya meh nama ke diberi melikat sebedau Maria betubuh-bisi.
22 Udah nya, maya pan datai alai orang patut nuchi diri nitihka Adat Moses. Nya alai, Josep seduai Maria mai anak nya ngagai Jerusalem, ngambika ulih mandangka iya ngagai Jehovah.
23 Nya sejalai enggau utai ke udah ditulis dalam Adat Jehovah: “Tiap iku anak tuai ti lelaki patut diserahka* ngagai Jehovah.”
24 Seduai iya mega meri pemeri nitihka Adat Jehovah, iya nya: “Kita patut meri sepasang burung kukur tauka dua iku burung achang ti agi biak.”
25 Maya nya, bisi siku lelaki ke benama Simion ba Jerusalem. Iya lurus sereta nangika Petara, lalu iya mega nganti maya Petara mai pengelantang ngagai orang Israel. Iya diiring kuasa kudus Petara.
26 Lalu nengah kuasa kudus nya, Petara madahka iya enda mati seagi-agi iya bedau meda Kristus ke dikirumka Jehovah.
27 Nitihka iring kuasa kudus, iya tama ngagai Rumah Sembiang. Maya nya Josep enggau Maria mai Jesus ke agi mit ngagai Rumah Sembiang, ngambika ulih ngereja utai ke diasuh Adat.
28 Simion merap anak nya, lalu muji Petara. Ku iya:
29 “Tuan ti Pemadu Tinggi, diatu ulun nuan ulih mati enggau lantang, laban baka ke dipadahka Nuan,
30 mata aku udah meda penyelamat,
31 ke udah disediaka Nuan ba mua semua orang.
32 Iya meh penampak ke muai pemetang ti malut orang bansa bukai, lalu iya mega deka mai mulia ngagai nembiak Nuan, Israel.”
33 Apai indai anak nya alit ati ninga utai ke dipadahka Simion pasal anak seduai iya.
34 Simion mega merekatka seduai iya, lalu bejaku ngagai indai anak nya, Maria: “Ketegal anak tu, mayuh orang Israel deka labuh, lalu mayuh mega ke deka angkat baru. Mayuh orang mega deka ngeleseka iya taja pan Petara bisi meri sida tanda ke nunjukka Petara bisi enggau iya.
35 Ketegal iya, utai ke bisi ba runding enggau ati mayuh orang deka dipandangka. Lalu nuan Maria, ati nuan deka balat pedis asaika direjang ngena pedang.”
36 Ba dia mega bisi siku nabi indu ke udah tuai amat. Nama iya Anna. Iya anak Fanuel ari raban bansa Aser. Iya begulai enggau laki iya pengelama tujuh taun aja pengudah seduai iya jadi.
37 Udah nya, iya nyadi balu. Diatu iya beumur 84 taun, lalu iya enda kala enda datai ngagai Rumah Sembiang. Iya bepasa sereta bebendar besampi, lalu siang malam iya mega bejalaika pengawa ti tuchi.
38 Maya nya, iya datai ngagai sida lalu meri terima kasih ngagai Petara. Iya bejaku pasal anak nya ngagai semua orang ke nganti maya Jerusalem deka dilepaska.
39 Pengudah Josep seduai Maria tembu ngereja semua utai nitihka Adat Jehovah, sida pulai ngagai nengeri diri, iya nya Nasaret ba Galili.
40 Anak nya mansang besai sereta kering. Penemu-dalam iya majak nambah, lalu Petara seruran bisi enggau iya.
41 Ninting taun, apai indai Jesus ngagai Jerusalem nyambut Pengerami Paska.*
42 Lebuh Jesus beumur 12 taun, sida mupuk nyambut pengerami nya baka selama.
43 Pengudah pengerami nya, sida pulai tang Jesus agi tinggal ba Jerusalem, lalu apai indai iya enda nemu iya agi tinggal ba din.
44 Seduai iya ngumbai Jesus bisi bejalai enggau raban sida. Sepengudah bejalai sepemanjai hari, nya baru seduai iya begigaka iya ba bala kaban belayan sereta orang ke dikelala seduai iya.
45 Ketegal enda tetemuka iya, nya alai seduai iya nikal ngagai Jerusalem lalu ngiga iya enggau bebendar.
46 Pengudah tiga hari, nya baru seduai iya tetemuka Jesus ba Rumah Sembiang. Iya benung duduk enggau bala pengajar Adat. Iya mendingka sida sereta betanyaka utai ngagai sida.
47 Semua sida alit ati ninga saut iya, lalu iya mega ulih meretika mayuh utai.
48 Lebuh apai indai iya meda iya, seduai iya tekenyit, lalu ku indai iya bejaku: “Anak, nama kebuah nuan ngasuh kami irau? Bendar amat kami duai apai nuan begigaka nuan.”
49 Ku iya nyaut: “Nama kebuah seduai begigaka aku? Endaka seduai nemu, aku patut ba rumah Apai aku?”
50 Tang seduai iya enda nemu reti utai ku iya.
51 Udah nya, Jesus pulai enggau seduai iya ngagai Nasaret, lalu iya mengkang ngasika seduai iya. Indai iya nyimpan semua utai nya dalam ati iya empu.
52 Jesus terus mansang besai lalu penemu-dalam iya majak nambah. Iya mega majak dikerinduka Petara enggau mensia.
Nota Kaki
^ Jaku Gerika, “Kaisar.”
^ Iya nya, dulang pemakai jelu.
^ Jaku Asal, “soldadu.”
^ Tauka “diterima.”
^ Tauka “ditutus.”
^ Jaku Asal, “dikuduska.”
^ Peda Penerang Leka Jaku.
