Luke 3:1-38
3 Ba taun ke-15 lebuh raja Rome* ke benama Tiberius merintah, maya Pontius Pilate nyadi gabenor menua Judea, Herod* merintah ba Galili. Menyadi iya Philip, merintah menua Iturea enggau Trakonitis. Laisanias merintah ba menua Abilene,
2 lalu Anas enggau Kaiapas nyadi tuai imam. Nya meh maya Petara meri pesan ngagai John anak Sekariah ba menua puang.
3 Nya alai, iya bejalai ngagai semua endur ke semak Sungai Jordan. Iya nusui pesan ke madahka orang patut dibaptisa* kena nunjukka sida udah nesal ati. Enggau nya, dosa sida deka diampun.
4 Nya meh utai ke ditulis ba bup Nabi Isaiah: “Siku orang ngangau enggau nyawa ti inggar ba menua puang: ‘Sediaka jalai ke Jehovah! Gaga jalai Iya rurus.
5 Tiap iti lebak patut ditimbuk enggau tanah; tiap iti gunung enggau bukit patut dirataka; jalai ti bingkuk patut digaga rurus, lalu jalai ti kasar patut digaga alus;
6 lalu semua mensia deka meda pengelepas Petara.’”
7 Udah nya, John bejaku ngagai bala orang mayuh ke datai minta iya maptisa* sida: “Kita tu anak ular ti bisa! Sapa nangkan kita ngerarika diri ari pengeringat Petara ti deka datai?
8 Nya alai, ayanka ulah ke nunjukka kita amat nesal ati. Anang nyebut ngagai diri empu, ‘Abraham nya apai kami,’ laban Petara ulih meri Abraham peturun ari batu tu.
9 Endang amat, kapak udah diengkah ba urat kayu. Tiap iti kayu ke enda mansutka buah ti manah deka ditebang lalu dibuai ngagai api.”
10 Nya alai orang mayuh nanya iya: “Enti pia, nama patut dikereja kami?”
11 Ku iya nyaut sida: “Barang sapa ke bisi dua lambar gari, meri selambar ngagai orang ke nadai gari, lalu barang sapa ke bisi pemakai, bekunsika pemakai nya enggau orang bukai.”
12 Indah bala pengumpul chukai pan datai minta John maptisa sida. Ku sida nanya iya: “Pengajar, nama patut dikereja kami?”
13 Ku iya nyaut sida: “Anang minta chukai lebih ari ke patut.”
14 Bala soldadu mega nanya iya: “Nama patut digaga kami?” Ku iya bejaku ngagai sida: “Anang ngambi duit orang ngena jalai pejal tauka besaksi bula pasal orang. Kita patut puas ati enggau gaji diri.”
15 Ketegal mayuh orang benung nganti Kristus, nya alai sida nanya dalam ati diri pasal John, “Kada enda iya tu Kristus?”
16 Ku John nyaut semua sida: “Aku maptisa kita ngena ai, tang iya ke datai dudi ari aku, bekuasa agi ari aku. Indah muka tali kasut* iya deh, aku enda layak. Iya deka maptisa kita ngena kuasa kudus enggau api.
17 Jari iya megai sekup kena nampi. Iya deka meresi endur ngindik gandum, lalu nyimpan gandum nya dalam setor iya, lalu iya deka nunu ampa dalam api ke enda ulih dipadam.”
18 John mega meri jaku ajar ti bukai lalu terus nusui Berita Manah ngagai orang.
19 Tang John ngerara Herod ke merintah Galili, ketegal iya jadi enggau Herodias, bini menyadi lelaki iya, sereta ketegal semua penyai ke udah dikereja Herod.
20 Udah nya, Herod ngereja siti agi penyai: Iya ngurung John dalam rumah jil.
21 Lebuh semua orang dibaptisa, Jesus mega dibaptisa. Maya Jesus besampi, langit tebuka,
22 lalu kuasa kudus Petara ke baka burung achang nurun ngagai Jesus. Udah nya, nyawa ari serega bejaku: “Nuan Anak ke dikesayauka Aku. Aku gaga ati ke nuan.”
23 Umur Jesus kira-kira 30 taun lebuh iya belabuh ngereja pengawa nginjil. Nitihka penemu orang, iya anakJosep;Josep nya anak Heli;
24 Heli nya anak Matat;Matat nya anak Lewi;Lewi nya anak Melki;Melki nya anak Janai;Janai nya anak Josep;
25 Josep nya anak Matatias;Matatias nya anak Amos;Amos nya anak Nahum;Nahum nya anak Esli;Esli nya anak Nagai;
26 Nagai nya anak Mat;Mat nya anak Matatias;Matatias nya anak Semien;Semien nya anak Josik;Josik nya anak Joda;
27 Joda nya anak Joanan;Joanan nya anak Resa;Resa nya anak Serubabel;Serubabel nya anak Sealtiel;Sealtiel nya anak Neri;
28 Neri nya anak Melki;Melki nya anak Adi;Adi nya anak Kosam;Kosam nya anak Elmadam;Elmadam nya anak Er;
29 Er nya anak Jesus;Jesus nya anak Elieser;Elieser nya anak Jorim;Jorim nya anak Matat;Matat nya anak Lewi;
30 Lewi nya anak Simeon;Simeon nya anak Judas;Judas nya anak Josep;Josep nya anak Jonam;Jonam nya anak Eliakim;
31 Eliakim nya anak Melea;Melea nya anak Menna;Menna nya anak Matata;Matata nya anak Natan;Natan nya anak David;
32 David nya anak Jesi;Jesi nya anak Obet;Obet nya anak Boas;Boas nya anak Salmon;Salmon nya anak Nason;
33 Nason nya anak Aminadap;Aminadap nya anak Arni;Arni nya anak Hesron;Hesron nya anak Peres;Peres nya anak Judah;
34 Judah nya anak Jakop;Jakop nya anak Isak;Isak nya anak Abraham;Abraham nya anak Terah;Terah nya anak Nahor;
35 Nahor nya anak Seruk;Seruk nya anak Reu;Reu nya anak Pelek;Pelek nya anak Eber;Eber nya anak Selah;
36 Selah nya anak Kainan;Kainan nya anak Apasat;Apasat nya anak Sem;Sem nya anak Noah;Noah nya anak Lamek;
37 Lamek nya anak Metuselah;Metuselah nya anak Enok;Enok nya anak Jaret;Jaret nya anak Mahalalel;Mahalalel nya anak Kainan;
38 Kainan nya anak Enos;Enos nya anak Set;Set nya anak Adam;Adam nya anak Petara.
Nota Kaki
^ Jaku Gerika, “Kaisar.”
^ Iya nya, Herod Antipas. Peda Penerang Leka Jaku.
^ Tauka “disepuhka; diselamka.”
^ Tauka “nyepuhka; nyelamka.”
^ Tauka “sandal.”
