Matthew 19:1-30
19 Pengudah Jesus tembu nyebut semua utai nya, iya mupuk ari menua Galili lalu bejalai ngagai adan menua Judea ba seberai Sungai Jordan.
2 Mayuh amat orang nitihka iya, lalu iya ngeraika sida ba dia.
3 Sekeda orang Parisi datai lalu deka nguji iya. Ku sida: “Kati tau laki nyarakka bini iya atas sebarang tegal?”
4 Disaut Jesus: “Kati kita nadai kala macha pasal Petara ti ngaga mensia, lelaki enggau indu, kenyau ari pun kelia?
5 Ku Petara bejaku: ‘Ketegal nya, lelaki deka ninggalka apai enggau indai iya, lalu mengkang begulai* enggau bini iya, lalu seduai iya deka nyadi siti tubuh’?
6 Seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Petara.”*
7 Ku orang Parisi nanya iya: “Enti pia, nama kebuah Moses ngasuh laki ke deka nyarakka bini iya meri surat sarak ngagai bini iya?”
8 Disaut Jesus: “Moses ngemendarka kita nyarakka bini kita, laban kita kieh.* Tang utai tu ukai baka nya kenyau ari pun.
9 Aku madah ngagai kita: Barang sapa nyarakka bini iya, taja pan bini iya nadai ngereja ulah seks ti kamah,* iya butang* enti iya bebini baru.”
10 Ku bala murid bejaku enggau iya: “Enti pia, manah agi enda bebini enda belaki.”
11 Ku Jesus nyaut: “Ukai semua orang ulih nerima jaku nya tadi. Tang semina orang ke nerima pemeri* Petara ulih.
12 Bisi orang enda ulih nikah, laban sida endang udah ada baka nya. Lalu bisi mega enda ulih nikah, laban siti perengka tubuh iya udah dibuai orang. Tang bisi mega orang milih enda nikah ketegal Perintah serega. Enti siku-siku orang milih enda nikah, awakka iya enda nikah.”
13 Udah nya, bisi orang mai anak mit ngagai iya, ngambika iya ngengkahka jari iya atas sida* lalu besampika sida. Tang bala murid iya nganu bala orang nya.
14 Jesus lalu bejaku: “Awakka anak mit datai ngagai aku. Anang nagang sida, laban Perintah serega deka diempu orang ke baka sida.”
15 Iya lalu ngengkahka jari iya atas sida,* lalu mupuk ari endur nya.
16 Udah nya, siku orang datai ngagai Jesus lalu nanya: “Pengajar, nama pengawa manah ke patut dikereja aku, ngambika aku tau bulih pengidup ti meruan belama iya?”
17 Ku Jesus nyaut: “Nama kebuah nuan nanya aku pasal utai ti manah? Semina Petara aja ke manah. Enti nuan deka bulih pengidup ti meruan belama iya, anang ngetu nitihka pesan Petara.”
18 Orang nya lalu nanya: “Ni bagi pesan nya?” Disaut Jesus: “Anang munuh orang, anang butang, anang ngenchuri, anang besaksi bula,
19 bebasaka apai indai nuan, sereta rinduka orang bukai baka nuan ke rinduka diri empu.”
20 Ku lelaki ti agi biak nya nyaut: “Semua pesan nya udah dititihka aku magang. Nama agi utai bukai ti patut dikereja aku?”
21 Ku Jesus nyaut iya: “Enti nuan deka nyadi sempurna,* mupuk nuan lalu jual semua reta tengkira nuan, lalu beri duit nya ngagai orang ke seranta, lalu nuan deka bisi reta ba serega. Udah nya, aram nyadi murid aku.”
22 Lebuh ninga nya, lelaki nya tusah ati lalu mupuk ari endur nya, laban iya bisi mayuh reta tengkira.
23 Jesus lalu bejaku enggau bala murid iya: “Enggau bendar aku madah ngagai kita: Orang kaya tusah deka tama ngagai Perintah serega.
24 Aku madah baru ngagai kita: Jelu unta senang agi tama nengah lubang jarum, ari orang ke kaya tama ngagai Perintah Petara.”
25 Lebuh bala murid iya ninga nya, sida alit ati lalu nanya: “Enti pia, sapa ulih diselamatka?”
26 Jesus merening ngagai sida, lalu bejaku: “Ba mensia, utai tu enda ulih, tang ba Petara, semua utai ulih magang.”
27 Peter lalu nyaut: “Kami udah ninggalka semua utai lalu nitihka nuan. Nama utai ti deka diulih kami?”
28 Ku Jesus bejaku ngagai sida: “Enggau bendar aku madah ngagai kita: Petara deka ngaga semua utai nyadi baru. Lebuh Anak Mensia duduk ba kerusi diraja iya ti bemulia, maya nya kita ke udah nitihka aku deka mega duduk ba 12 iti kerusi diraja, lalu ngakim 12 raban bansa orang Israel.
29 Barang sapa ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka tanah, ketegal nama aku, deka nerima 100 kali lipat utai ti ditinggalka iya, lalu bulih pengidup ti meruan belama iya.
30 “Tang mayuh orang ke dulu deka nyadi dudi, lalu orang ke dudi deka nyadi dulu.
Nota Kaki
^ Dalam jaku Gerika, rambai jaku tu reti iya bepegai rat, baka ke lekat ba siti-siti utai.
^ Jaku Asal, “udah disegulaika Petara ba baruh siti tangkun.”
^ Tauka “bingking; degil.”
^ Jaku Gerika, “por·nei′a.” Peda Penerang Leka Jaku.
^ Orang ti udah kawin ngereja ulah seks enggau orang ke ukai kaling pengidup iya.
^ Iya nya, pemeri nyadi orang ke rumpas.
^ Tauka “ngambika iya merekat sida.”
^ Tauka “lalu merekat sida.”
^ Iya nya, nadai nama-nama pengurang dalam sembah nuan ngagai Petara.
