Matthew 4:1-25
4 Udah nya, Jesus diiring kuasa kudus Petara ngagai menua puang, lalu ba din, Sitan* nguji iya.
2 Pengudah iya bepasa pengelama 40 hari 40 malam, iya berasai lapar.
3 Udah nya, Sitan pan datai lalu nguji iya: “Enti nuan amat anak Petara, asuh batu tu nyadi roti.”
4 Tang ku Jesus nyaut: “Endang udah ditulis: ‘Mensia enda ulih beridup ba roti aja, tang beridup ba genap leka jaku ti pansut ari mulut Jehovah.’”
5 Udah nya, Sitan mai iya ngagai nengeri ti kudus,* lalu ngengkahka iya ba endur ti pemadu tinggi ba Rumah Sembiang.
6 Lalu ku Sitan: “Enti nuan amat anak Petara, terejun nuan ari tu, laban endang udah ditulis: ‘Petara deka meri pesan ngagai bala melikat Iya,’ lalu, ‘Sida deka nyambut nuan sebedau kaki nuan terengkah ba batu.’”
7 Ku Jesus nyaut Sitan: “Endang udah ditulis: ‘Nuan enda tau nguji Petara nuan, Jehovah.’”
8 Sitan mai iya ngagai bukit ti amat tinggi, lalu mandangka semua perintah ba dunya enggau mulia perintah nya ngagai Jesus.
9 Lalu ku Sitan bejaku: “Semua tu deka diberi aku ngagai nuan, enti nuan besugang lalu nyembah aku sekali aja.”
10 Ku Jesus nyaut iya: “Rari nuan Sitan! Laban endang udah ditulis: ‘Nuan patut besugang ngagai Petara nuan, Jehovah, lalu patut nyembah Iya siku aja.’”
11 Udah nya, Sitan ninggalka iya, lalu bala melikat datai ngintu iya.
12 Lebuh Jesus ninga rita John Pemaptisa udah ditangkap, iya lalu mupuk ngagai Galili.
13 Pengudah iya mupuk ari Nasaret, iya diau ba Kapernaum ke semak enggau danau, ba menua Sebulun enggau Naptali.
14 Tu ngamatka utai ke disebut nengah Nabi Isaiah:
15 “O Galili menua alai orang bansa bukai diau, menua Sebulun enggau Naptali, ba jalai ti nuju ke danau, ba seberai Sungai Jordan!
16 Orang ke diau dalam pemetang udah meda penampak ti amat terang. Orang ke diau ba nengeri ti dibungkur ayuk pemati udah dipanchar penampak.”
17 Kenyau ari nya, Jesus lalu belabuh madahka pesan tu: “Nesal ati ke dosa kita, laban Perintah serega nyau semak!”
18 Lebuh Jesus bejalai ba tebing Danau Galili, iya tepedaka dua iku diri menyadi, Simon ke dikumbai Peter, enggau menyadi iya Andrew. Seduai iya orang berikan. Maya nya, seduai iya benung nibarka jala.
19 Ku Jesus bejaku ngagai seduai iya, “Aram enggau aku. Aku deka ngajar seduai chara ngiga orang, baka seduai ke begigaka ikan.”
20 Tekala nya, seduai iya lalu ninggalka jala lalu nitihka Jesus.
21 Pengudah mupuk ari endur nya, iya tepedaka dua iku da agi diri menyadi, James anak Sebedi, enggau menyadi iya John. Seduai iya benung ngaduka jala enggau apai seduai iya Sebedi, dalam perau. Jesus lalu ngangauka seduai iya.
22 Tekala nya, seduai iya lalu ninggalka perau enggau apai seduai iya, lalu nitihka Jesus.
23 Udah nya, Jesus bejalai ba serata Galili. Iya ngajar ba balai gempuru orang Judah, nusui Berita Manah pasal Perintah Petara, sereta ngeraika bemacham bansa penyakit enggau pemedis ke ditapi orang.
24 Lalu berita pasal iya ngelekai ba serata menua Siria. Orang ke merinsa ketegal mayuh macham penyakit enggau pemedis, orang ke dirasuk melikat ti jai, sereta orang ke sakit sawan,* dibai ngagai iya. Orang ke bisi sekeda bagi tubuh ke enda ulih engkebut ketegal penyakit* mega dibai ngagai iya. Lalu iya ngeraika semua sida.
25 Ketegal nya, mayuh orang ari menua Galili, Dekapolis,* Jerusalem, Judea, enggau orang ari menua ba seberai Sungai Jordan, nitihka iya.
Nota Kaki
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Iya nya, Jerusalem.
^ Tauka “gila-babi.”
^ Tauka “Orang ke sakit bajung.”
^ Tauka “Sepuluh Buah Nengeri.”
