PELAJAR 24
Utai ti Bendar pasal Bala Melikat
Jehovah bisi ruang bilik ba serega ke nyengkaum bala melikat. Lalu Iya deka kitai ngelala sida. Melikat mega dikumbai ‘anak Petara.’ (Pemungkal 6:2; Jop 38:7) Nama ajar Bup Kudus pasal melikat? Nama kaul sida enggau kitai? Kati semua melikat nya manah?
1. Sapa bala melikat?
Sebedau Petara nempa dunya, Iya udah nempa bejuta iku utai ti enda ulih dipeda ba serega. (Hebrew 1:14) Sida dikumbai melikat, lalu tiap iku sida amat spesial. (Pemandang 5:11) Bup Kudus madahka sida “ngasika pesan [Jehovah]” sereta “mendingka utai ti disebut Iya.” (Masmur 103:20) Ba jeman kelia, Jehovah ngena bala melikat ngenataika pesan Iya, nulung nembiak Iya sereta nyelamatka sida. Pia mega kemayaharitu, bala melikat ngiring nembiak Petara ngiga orang ke deka belajar pasal Petara.
2. Sapa Sitan enggau bala melikat ti jai?
Sayau amat, sekeda melikat enda tetap ati ngagai Jehovah. Melikat keterubah ke ngelaban “dikumbai Antu tauka Sitan ke nipu semua dunya.” (Pemandang 12:9) Iya deka ngerampas hak Petara nyadi pemerintah. Nyadi, iya nesatka sepasang laki bini ti keterubah. Udah nya, sekeda melikat ke bukai mega nitihka iya ngelaban Petara. Sida tu dikumbai bala melikat ti jai. Sitan enggau bala melikat ti jai tu dibuai ke baruh ngagai dunya lalu sida benung nipu semua dunya. Jemah ila, Petara deka ngerusakka sida.—Bacha Pemandang 12:9, 12.
3. Baka ni Sitan enggau bala melikat ti jai nipu kitai?
Sida ngena pengawa bemanang kena nipu mayuh orang. Pengawa bemanang nya pengawa ti bekaul enggau melikat ti jai. Ambika chunto, sekeda orang ngiga tulung ari orang ke nemu nilit nasit, bedukun tauka bemanang. Kebukai, nguji bejaku enggau orang ke udah mati tauka ngena kuasa bemanang ngambika ulih berubat. Tang, Jehovah madah ngagai kitai: “Anang betanya ngagai orang ke bejaku enggau semengat orang ke udah mati, tauka ngagai manang.” (Adat Lewi 19:31) Jehovah deka nyaga kitai ari Sitan enggau bala melikat ti jai laban sida deka nesatka kitai.
BELAJAR MAYUH AGI
Belajar meh pasal utai ti manah ke dikereja bala melikat ke tetap ati. Peratika mega utai ti jai ke ulih nyadi ari pengawa bemanang, sereta chara nyaga diri ari Sitan enggau bala melikat ti jai.
4. Melikat nulung orang ngelala Jehovah
Melikat Petara nadai nginjil ngagai orang. Tang sida ngiring nembiak Petara ngiga orang ke deka ngelala Jehovah. Bacha Pemandang 14:6, 7, lalu kerandauka tanya tu:
-
Nama kebuah kitai begunaka bantu ari melikat ba pengawa nginjil?
-
Melikat ngiring nuan ngagai orang ke deka belajar pasal Petara. Kati tu meransang nuan? Nama kebuah?
5. Seliahka pengawa bemanang
Sitan enggau bala melikat ti jai nya munsuh Jehovah enggau kitai mega. Bacha Luke 9:38-42, lalu kerandauka tanya tu:
-
Nama utai ti dikereja melikat ti jai ngagai mayuh orang?
Kitai enggai bisi sebarang kaul enggau bala melikat ti jai. Bacha Ulang Adat 18:10-12, lalu kerandauka tanya tu:
-
Baka ni melikat ti jai nguji nipu tauka bejaku enggau kitai? Nama pengawa ti bisi kaul enggau pengawa bemanang ke suah dikereja ba kandang endur nuan diau?
-
Ba runding nuan, kati pesan ari Petara ke bekaul enggau pengawa bemanang nya ngena? Nama kebuah?
Mainka VIDEO, lalu kerandauka tanya tu.
-
Kati engkerabun ba kuan jari anak Palesa nya tau nganu? Nama kebuah?
-
Nama utai ke patut digaga Palesa kena nyaga diri ari bala melikat ti jai?
Kenyau ari kelia, orang Kristian ti bendar ngelaban melikat ti jai. Bacha Surat Kereja Rasul 19:19 enggau 1 Korint 10:21, lalu kerandauka tanya tu:
-
Nama kebuah kitai patut ngerusakka semua utai ti bekaul enggau pengawa bemanang?
6. Nuan ulih ngelaban Sitan enggau bala melikat ti jai
Sitan nya tuai bala melikat ti jai. Tang Mikael, tauka Jesus nya, tuai bala melikat ke tetap ati. Kena nemu kuasa ke dikembuan Mikael, bacha Pemandang 12:7-9, lalu kerandauka tanya tu:
-
Sapa ke lebih agi bekuasa? Mikael enggau bala melikat iya tauka Sitan enggau bala melikat ti jai?
-
Kati murid Jesus patut takut ngagai Sitan enggau bala melikat ti jai?
Nuan ulih menang ngelaban Sitan enggau bala melikat ti jai. Bacha James 4:7, lalu kerandauka tanya tu:
-
Baka ni nuan ulih nyaga diri ari Sitan tauka bala melikat ti jai?
BISI ORANG MADAH: “Nadai salah meda cherita wayang tauka main game ke bisi pengawa bemanang, antu tauka majik. Nya semina pemerindang aja.”
-
Nama kebuah runding ke baka nya tau nganu?
LANSA
Melikat ulih nulung kitai. Sitan enggau bala melikat ti jai deka nipu kitai nengah pengawa bemanang. Sida nya munsuh Petara.
Ulang Kaji
-
Baka ni melikat Jehovah nulung orang ke deka belajar pasal Jehovah?
-
Sapa Sitan enggau bala melikat ti jai?
-
Nama kebuah nuan patut nyeliahka diri ari pengawa bemanang?
ARAM BELAJAR
Peda bukti ke nunjukka Jesus nya tuai melikat Mikael.
Pansik bukti ke nunjukka Sitan nya amat bisi lalu ukai semina runding ti jai dalam mensia.
Peratika baka ni seiku indu mujur ngelepaska diri ari bala melikat ti jai.
Peratika chara Sitan nipu orang nengah pengawa bemanang.
“Fakta pasal Majik enggau Pengawa Bemanang” (Jalai ke Nuju Pengidup ti Meruan Belama Iya, begian 5)
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
