Orang ba Nasaret tentu enda sabar nganti penatai Jesus. Suba, Jesus kala nyadi tukang kayu ba Nasaret. Setaun sebedau utai tu nyadi, Jesus mupuk ari Nasaret lalu dibaptisa John. Diatu, mayuh orang nemu Jesus nya orang ke ngereja kereja ajih. Nya alai, orang ba Nasaret keran deka meda iya ngaga kereja ajih ba mua sida.

Baka biasa, Jesus ngagai balai gempuru. “Ba balai gempuru ninting Hari Sabat,” orang deka besampi sereta ninga begian ayat Bup Kudus ke ditulis Moses dibacha. (Surat Kereja Rasul 15:21) Ayat Bup Kudus ke ditulis bala nabi bukai mega dibacha. Lebuh Jesus bediri deka macha ayat Bup Kudus, iya engka ngelala mayuh orang ke datai ngagai balai gempuru laban iya empu suah kia. Lebuh maya nya, gulung surat nabi Isaiah disuaka ngagai iya. Jesus muka gulung surat nabi Isaiah lalu ngiga ayat ba Isaiah 61:1, 2. Ayat nya nyebut pasal orang ti dipilih kuasa kudus Jehovah.

Jesus macha pasal baka ni orang ke dipilih nya deka madahka pengelepas ngagai orang ke kena tangkap, sereta madahka orang ke buta deka meda, lalu pasal maya sida deka diberekat Jehovah baru. Udah nya Jesus ngulungka surat nya, nyuaka iya ngagai orang ke gawa ba dia lalu duduk. Semua orang ba balai gempuru bela merening ngagai iya magang. Jesus lalu bejaku sereta madahka utai ti penting tu: “Seharitu, ayat ke baru didinga kita tadi udah dikeamatka.”—Luke 4:21.

Semua sida bela bejaku muji Jesus sereta alit ati ninga jaku iya ti negu ati sida. Ku sida: “Endaka iya tu anak Josep?” Tang Jesus nemu sida semina deka meda iya ngereja kereja ajih aja. Ketegal nya Jesus madahka: “Kita tentu deka nyebut jaku tu ngagai aku, ‘Lutur, geraika diri empu. Kami udah ninga nuan ngereja mayuh utai ba Kapernaum. Kereja mega utai nya ba menua nuan empu ditu.’” (Luke 4:22, 23) Orang ke kala diau semak enggau Jesus ngasaika iya patut ngereja pengawa ajih ba menua diri empu dulu ke penguntung sida. Nya alai, sida pedis ati enggau utai ke digaga Jesus.

Jesus nemu utai ti diperundingka sida. Nyadi, Jesus nyebut sekeda utai ke kala nyadi ba sejarah orang Israel kelia. Maya jeman Elijah menya, bisi mayuh indu balu ba Israel. Tang, Elijah dianjung ngagai siku indu balu ke diau ba Sarepat, di menua Sidon. Ba dia, Elijah ngidupka baru anak indu balu nya. (1 Raja 17:8-16) Lalu ba jeman Elisa, bisi mayuh orang ke sakit lan diau ba Israel. Tang iya ngeraika Naman, iya nya siku orang Siria.—2 Raja 5:1, 8-14.

Jesus mandingka sejarah orang Israel kelia enggau sida ba Nasaret maya nya. Tu terang nunjukka sida ba Nasaret berundingka diri empu sereta kurang pengarap. Nama reaksi sida? Semua orang ba balai gempuru balat pedis ati. Sida angkat, lalu muru iya pansut ari Nasaret. Sida mai iya ngagai tebing bukit alai Nasaret didirika laban deka ngeju iya ari nya. Tang Jesus enselit pansut nengah bala sida lalu neruska pejalai iya. Diatu Jesus mupuk ngagai nengeri Kapernaum, ke bisi ba begian barat laut Danau Galili.