“Aku merak kaka aku lalu ngempaska pintu enggau balat nyentukka pengait gari ba belakang pintu ngachuk dinding. Tiap kali aku meda lubang nya aku ingatka ulah diri empu ke baka anak mit.”—Diane. a

“Aku nyerauh, ‘Apai jai!’ lalu ngempaska pintu. Sebedau pintu nya tetutup aku meda mua apai aku tusah ati. Tekala nya aku nesalka jaku diri empu.”—Lauren.

Kati nuan mega kala ngasaika utai ke ditapi Lauren enggau Diane? Enti pia, artikel tu ulih nulung nuan.

Mandangka pengeringat ulih ngachau reputasi nuan. Briana ke beumur 21 taun madah: “Suba aku kala berunding orang bukai patut nerima ulah aku. Tang udah nya, aku berengkah beratika orang ke enda ulih nagang diri empu nya beli. Baru aku sedar, baka nya meh aku ba mata orang bukai!”

Bup Kudus madah: “Orang ke lengkar ngereja utai ti beli.”—Jaku-Dalam 14:17.

Enti nuan enda nagang pengeringat diri, orang deka ngenyauhka diri ari nuan. Daniel ke beumur 18 taun madah: “Enti nuan enda nagang pengeringat, nuan deka ngemaluka diri empu sereta orang bukai mega enda bebasaka nuan.” Elaine ke beumur 18 taun mega setuju. Ku iya: “Mandangka pengeringat nya enda ngasuh orang rinduka kitai, tang semina ngenakutka orang bukai.”

Bup Kudus madah: “Anang bepangan enggau orang ke lengkar sereta mangah.”—Jaku-Dalam 22:24.

Nuan ulih ngemansangka ulah ti manah. Sara ke beumur 15 taun madah: “Nuan enda ulih ngawal asai ati nuan pasal sesiti situasi, tang nuan ulih nagang diri ari mandangka asai ati nya. Nuan enda ibuh meletup, tang ulih nagang diri.”

Bup Kudus madah: “Manah agi ngembuan ati ti liat, ari ke ngembuan kuasa, lalu manah agi enti nuan ulih merintah ati diri, ari nuan ti ngalahka nengeri.”—Jaku-Dalam 16:32.

Netapka juluk ati. Ari ke madah “Aku sigi orang ke baka tu,” uji meh ngemansangka ulah ti manah ba timpuh ke ditetapka nuan—ambika chunto, enam bulan. Dalam timpuh nya rikut meh pemansang nuan. Tiap kali nuan berasai ringat, (1) tuliska utai ke nyadi, (2) nama reaksi nuan, lalu (3) nama chara ti manah agi, sereta kebuah iya. Udah nya, uji meh chara ti manah agi nya lebuh nuan diuji ila. Tip: Rikut mega tiap kali nuan mujur! Tulis meh pengaga ati nuan lebuh nuan mujur nagang diri.—Prinsip Bup Kudus: Kolosi 3:8.

Ngetu dulu. Lebuh bisi utai tauka orang ke ngasuh nuan ringat, anang terus nyebut utai ke diperundingka nuan. Ngetu dulu lalu enti patut, tarit seput. Erik ke beumur 15 taun madah: “Enti aku narit seput dulu, tu meri aku awak alai berunding dulu sebedau ngereja tauka nyebut utai ke ngasuh aku nesal ati.”—Prinsip Bup Kudus: Jaku-Dalam 21:23.

Perundingka orang bukai. Kekadang nuan engka ringat laban nuan semina meda baka ni situasi nya meri empas ngagai nuan. Uji perundingka asai ati orang bukai. Siku indu ke biak ke benama Jessica madah: “Indah lebuh orang kasar enggau aku, biasa nya bisi kebuah sida baka nya. Enti aku nemu kebuah nya, tu ngasuh aku ulih sabar enggau sida.”—Prinsip Bup Kudus: Jaku-Dalam 19:11.

Enti patut, mupuk meh ari situasi nya. Bup Kudus madah: “Sebedau kelikuh nyadi, mupuk meh ari endur nya.” (Jaku-Dalam 17:14, NWT) Nitihka ayat tu, kekadang chara ti pemadu manah iya nya, mupuk ari endur nya sebedau situasi nyadi majak balat. Ari ke seruran berundingka penanggul nya lalu nyadi majak ringat, kereja meh utai bukai. Siku indu ke biak ke benama Danielle madah: “Ba aku, enti aku sesais, tu ulih nulung aku ngurangka stres lalu ngasuh aku enda jampat ringat.”

Lepaska semua nya. Bup Kudus madah: “Kita tau ringat, tang anang bedosa; berandau enggau ati kita empu ba peninduk kita, lalu anang engkeretik.” (Masmur 4:4) Peratika, asai ati ti ringat enda salah. Tang nuan patut berunding, nama nyadi pengudah tu? Siku lelaki ti biak ke benama Richard madah: “Enti nuan nejuka orang bukai nyungkak nuan ringat, orang nya deka nguasa nuan. Uji meh nyadi matang agi sereta lepaska aja penanggul nya.” Enti nuan ngereja nya, nuan ulih nguasa pengeringat diri, ari ke nejuka pengeringat nguasa nuan.