RUNDING ORANG

Mayuh orang ngasaika bejudi nya ngagaka ati, lalu enda salah seagi nya enda ngelanggar undang-undang. Ba sekeda menua, bisi piak bekuasa ke ngemendarka orang meli lumur tikit, lalu untung ke diulih ari bisnis nya dikena nulung rayat.

LALAU ARI BUP KUDUS

Dalam Bup Kudus, nadai nyemetak madahka pasal judi. Tang bisi beberapa prinsip ke nulung kitai nemu agi pasal runding Petara ba senentang pekara tu.

Judi ulih meransang orang nyadi amu sereta rindu bepekit. Bup Kudus ngelalau kitai, “Seliahka diri ari semua macham pengamu.” (Luke 12:15) Suah iya, ba endur bejudi selalu aja mandangka pemesai hadiah ke diulih enti menang, tang enda mandangka penipis peluang alai kitai menang. Nya kebuah, orang ke ingin deka kaya, sanggup betaruh besai ngambika ulih menang.

Iya ke amat, judi ulih ngasuh sesiku orang berundingka diri empu. Orang ke bejudi sigi ngarapka orang ke ngelaban sida alah, ngambika iya bulih mayuh duit. Tang tu enda sejalai enggau ajar Bup Kudus ke madah, “Awakka tiap iku orang seruran ngereja utai ke penguntung orang bukai, ukai ke penguntung diri empu.” (1 Korint 10:24) Kelimpah ari nya, bisi mega ayat ke bukai ke madah, “Anang inginka . . . sebarang utai orang.”—Pemansut 20:17.

Judi mega selalu dikaitka enggau nasit ti manah tauka enda manah. Ba jeman orang Israel kelia, bisi orang ke pechayaka nasit lalu nyediaka piring ngagai Dewa Nasit. Nama runding Petara pasal utai tu? Dalam Bup Kudus bisi madah, “Kita endang sengaja enggai ngasika Aku lalu kita ngereja penyai.”—Isaiah 65:11, 12.

Amat, ba sekeda menua, sida ngena duit ari asil bejudi ke dikemendarka piak bekuasa kena nulung ba begian pendidikan, ekonomi, enggau projek bukai. Tang, kitai patut ingat, chara duit nya diulih meransang orang ngembuan ulah ti amu, berundingka diri empu, sereta meransang orang bisi pengingin deka kaya tang enda ibuh ngereja nama-nama. Tauka pandakka jaku, meransang orang ngelusu.

“Anang inginka . . . sebarang utai orang.”—Pemansut 20:17.

LALAU ARI BUP KUDUS

Bup Kudus madahka, “Orang ke keran deka nyadi kaya deka alah laban penguji, kena sintak panjuk, sereta alah laban mayuh pengingin ke beli ti ngemediska. Pengingin ke baka nya deka ngerusak sereta ngemunaska sida.” (1 Timoti 6:9) Bejudi ulih meransang orang amu, tang dalam Bup Kudus nangkan, “pengamu” ulih ngemedis sereta patut diseliahka.—Epesus 5:3.

Judi mega ulih meransang orang rindu agi ke duit ari diri empu sereta orang bukai. Lalu dalam Bup Kudus mega bisi madah, “Duit deka mai semua macham penyai.” Pengingin sesiku orang ke deka kaya ulih nyadi amat kuat nyentukka kaul iya enggau Petara ulih rusak. Iya mega engka selalu irau pasal duit. Nya kebuah, Bup Kudus madah, nya deka “ngachuk diri ngena mayuh pemedis.”—1 Timoti 6:10.

Orang ke amu mega enda ulih berasai puas enggau utai ke dikembuan diri. Munyi ku Bup Kudus, “Enti nuan angkunka duit, nuan enda nemu puas ati. Enti nuan ingin deka kaya, nuan enda ulih ngulihka semua utai ti dikinginka nuan.” (Bup Pengajar 5:10) Suah iya, orang ke baka tu pedis deka berasai lantang.

Nambahka nya, mayuh orang ke pejudi nyadi gian. Tu ulih nyadi penanggul ti besai. Nitihka siti penyampau, bejuta iku orang ke gian bejudi ba Amerika Serikat.

Dalam Bup Kudus bisi jaku ke madah, “Makin mudah agi nuan bulih pengaya, makin kurang agi ga guna pengaya nya ba nuan.” (Jaku-Dalam 20:21) Iya ke amat, bejudi ulih ngenataika mayuh penanggul. Chunto iya, berutang, bankrap, lenyau kereja tauka bala kaban, sereta bisi penanggul ba rumah tangga. Tang, pemanah iya, enti kitai nitihka lalau ari Bup Kudus, kitai ulih nyeliahka penanggul tu lalu ulih idup lantang.

“Orang ke keran deka nyadi kaya deka alah laban penguji, kena sintak panjuk, sereta alah laban mayuh pengingin ke beli ti ngemediska. Pengingin ke baka nya deka ngerusak sereta ngemunaska sida.”—1 Timoti 6:9.