Kitai bisi mayuh jaku ajar pasal topik tu. Lalu jaku ajar nya ulih nulung. Ngambika chunto, sekeda orang engka enda ngasuh nuan nyabak tauka ngayanka asai ati. Iya ke bukai engka ngasuh nuan nyabak sereta ngayanka semua asai ati nuan. Tang Bup Kudus bisi jaku ajar ke manah agi, lalu disukung ulih pansik ke bisi kemaya hari tu.

Ba sekeda endur, orang ke lelaki enda patut nyabak. Tang, kati nya utai ti ngemaluka enti nyabak ba mua orang mayuh? Bala pakar mental nemu, orang ke tusah ati endang patut nyabak. Lalu kekadang tusah ati ulih nulung nuan neruska pengidup, taja pan balat tusah ditinggalka orang ti dikesayauka. Tang, kelalu balat tusah ati ulih ngenusahka. Bup Kudus enda nyukung penemu ke ngumbai nyabak nya salah tauka orang ke lelaki enda patut nyabak. Ngambika chunto, peratika Jesus. Lebuh kawan iya Lasarus mati, Jesus nyabak ba mua orang mayuh, taja pan iya bisi kuasa kena ngangkatka orang idup baru!—John 11:33-35.

Pedis ati mega suah bekaul enggau tusah ati,  kelebih agi enti pemati nya nyadi enggau enda disadang. Bisi mayuh kebuah ti ulih ngasuh orang ke tusah ati nya pedis ati. Ngambika chunto, orang ti dipebasa nyebut utai enggau enda berunding sereta enda patut. Seiku lelaki ke benama Mike, ari menua Afrika Selatan, madahka: “Aku baru beumur 14 taun lebuh apai aku mati. Maya nguburka apai aku, tuai pengarap gerija Anglikan madahka Petara begunaka orang manah, lalu ngambi sida tumu. a Tu ngasuh aku pedis ati laban kami balat begunaka apai kami. Diatu, pengudah 63 taun, jaku nya agi ngemediska ati aku.”

Lalu baka ni enggau asai ati ti salah? Kelebih agi enti pemati nya enda disadang, lalu orang ke tusah ati engka suah berunding, ‘Utai nya enda nyadi enti sema aku ngereja tu tauka ngereja nya.’ Tauka ke penudi iya nuan betemu enggau iya, nuan bisi laya enggau iya. Tu nambahka agi asai ati nuan ti salah.

Enti asai ati ti salah tauka pedis ati ngachau nuan, anang natka asai ati ke baka nya. Tang, padahka ngagai kawan ke deka ninga sereta ke deka ngelantangka ati nuan. Bup Kudus madahka kitai: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku-Dalam 17:17.

Kawan ti pemadu manah ke orang ti tusah ati iya nya Penempa kitai, Petara Jehovah. Padahka asai ati nuan ngagai Iya dalam sampi laban ‘Iya ngibun kitai.’ (1 Peter 5:7) Nambahka nya, Iya besemaya, semua orang ke besampi baka nya deka bulih pengelantang ba runding enggau asai ati ulih ‘pemaik Petara, ti ngelui peragam mensia.’ (Pilipi 4:6, 7) Pia mega, awakka Petara nulung nuan lantang baka selama ngena Jaku Iya ti ngelantangka ati, Bup Kudus. Giga sekeda ayat Bup Kudus ti ngelantangka ati. (Peda  kutak.) Nuan engka deka ngingatka sekeda ari ayat nya. Berundingka ayat nya ulih nulung kelebih agi maya malam hari lebuh nuan kediri, lalu tusah deka tinduk.—Isaiah 57:15.

Baru-baru tu, seiku lelaki ke beumur 40 taun, ke dikangau ngena nama Jack, udah lenyau bini ketegal kanser. Jack madahka, kekadang iya balat sunyi. Tang besampi udah nulung iya. Ku iya madahka: “Lebuh aku besampi ngagai Jehovah, aku enda berasai kediri. Aku suah dani lebuh malam hari, lalu enda ulih tinduk agi. Pengudah macha sereta belematika ayat ti ngelantangka ati ari Bup Kudus, lalu udah nya madahka asai ati diri dalam sampi, aku ngasaika pengelantang sereta pemaik, ngasuh runding enggau ati aku enda irau, lalu aku ulih tinduk.”

Seiku indu biak ke benama Vanessa udah mati indai ketegal penyakit. Iya mega ngasaika kuasa sampi. Ku iya madahka: “Ba maya ti pemadu tusah, aku ngangauka nama Jehovah lalu nyabak. Iya ningaka sampi aku, lalu seruran meri pengering ti diguna aku.”

Sekeda orang ke landik meri jaku lalau ngagai orang ke tusah ati ngasuh orang ke pedis muai asai ati ti tusah enggau pengawa nulung orang bukai tauka sukarela ngena jam sida ba sekeda pengawa ke orang mayuh. Ngereja pengawa nya ulih mai pengelantang sereta ngurangka asai ati sida ti tusah. (Kereja Rasul 20:35) Mayuh orang Kristian ke tusah ati ngasaika nulung orang bukai udah mai mayuh pengelantang ke sida.—2 Korint 1:3, 4.