Sekeda lelaki dibesaika nitihka budaya ti ngemaruhka orang indu. Ambika chunto, Hans, siku tuai ti ngabas ba Bolivia madahka: “Sekeda lelaki dibesaika ba budaya ti meransang orang lelaki ngeninggika diri. Sida pechaya sida penting agi ari orang indu. Lalu kesuah iya, sida ngelayan orang indu enggau chara ti enda bebasa.” Shengxian, siku tuai gempuru ba Taiwan madahka: “Ba endur alai aku diau, mayuh orang lelaki ngasaika orang indu enda patut masuk champur dalam hal sida. Enti siku lelaki nyebut runding orang indu pasal sesiti utai, orang lelaki ke bukai engka ngumbai iya lemi.” Bisi mega orang lelaki ke ngena chara bukai kena nunjukka diri bechiping enggau orang indu. Ambika chunto, sida engka ngena jaku tundi ke ngemaruhka orang indu.

Tang, enda ngira nama budaya alai siku lelaki dibesaika, iya ulih berubah. Iya ulih mutarka runding ke ngumbai orang lelaki penting agi ari orang indu. (Eps. 4:​22-24) Iya ulih ngereja tu enggau nitihka teladan Jehovah. Dalam artikel tu, kitai deka berandauka chara Jehovah ngintu orang indu, baka ni bala menyadi lelaki ulih neladan Jehovah lebuh ngintu orang indu, sereta baka ni bala tuai gempuru ulih netapka teladan lebuh ngayanka basa ngagai bala menyadi indu.

BAKA NI JEHOVAH NGINTU ORANG INDU?

Jehovah netapka teladan ti sempurna pasal chara ngintu orang indu. Iya Apai ti siru, ke rinduka semua bala anak Iya. (Jhn. 3:16) Lalu, bala menyadi indu ti arapka Iya baka anak indu ti berega ke Iya. Peratika sekeda chara Jehovah nunjukka Diri rindu sereta bebasaka orang indu.

Jehovah enda bechiping enggau orang indu. Iya ngaga lelaki enggau indu sama baka Iya. (P-kal. 1:27) Iya enda ngaga orang lelaki pintar agi tauka  landik agi ari orang indu. Lalu, Iya mega enda nunjukka Diri rinduka orang lelaki lebih agi ari orang indu. (2 Ban. 19:7) Iya ngaga orang lelaki enggau orang indu ngambika sida sama bela ulih meretika pemendar ari Bup Kudus, lalu neladan sifat Iya. Jehovah mega ngumbai orang lelaki enggau orang indu ti arapka Iya nya amat berega. Lalu enda ngira sekalika sida lelaki tauka indu, Iya udah meri semua sida harapan idup belama iya ba dunya, tauka harapan nyadi raja enggau imam ba serega. (2 Pet. 1:​1, nota kaki.) Endang amat, Jehovah enda bechiping ngagai orang indu.

Jehovah ningaka sida. Jehovah ibuhka asai ati sereta penanggul ke ditapi orang indu. Ambika chunto, Iya ninga sereta nyaut sampi Rachel enggau Hanah. (P-kal. 30:22; 1 Sam. 1:​10, 11, 19, 20) Jehovah mega ngasuh bala penulis Bup Kudus nulis pasal lelaki ke ningaka jaku orang indu. Ambika chunto, Abraham nitihka pesan Jehovah ke ngasuh iya ningaka jaku bini iya, Sarah. (P-kal. 21:​12-14) Raja David ningaka Abigail. Iya indah ngasaika Jehovah ke udah nganjung Abigail bejaku enggau iya. (1 Sam. 25:​32-35) Lalu Jesus, ke neladan sifat Apai iya enggau sempurna, ningaka jaku indai iya, Maria. (Jhn. 2:​3-10) Semua chunto tu nunjukka chara Jehovah ngayanka basa ngagai orang indu, iya nya lebuh Iya ningaka sida.

Jehovah pechayaka orang indu. Ambika chunto, Jehovah ngasuh Awa nyaga semua dunya tu. Tu nunjukka Jehovah pechayaka Awa. (P-kal. 1:28) Lalu tu mega nunjukka Jehovah ngumbai Awa penulung ti berega ke Adam. Iya enda ngumbai Awa kurang agi penting ari Adam. Jehovah mega meri nabi indu Deborah enggau Huldah tanggung pengawa ngelalau bala nembiak Iya, nyengkaum ngelalau siku hakim enggau siku raja. (P-ulu. 4:​4-9; 2 Raj. 22:​14-20) Kemayaharitu, Jehovah mega ngena bala menyadi indu ngereja peneka Iya. Bala menyadi indu ti tetap ati tu nyadi penginjil, pengerintis, sereta pengerintis ke dianjung ngagai menua bukai. Sida mega nulung ngaga reka bentuk, nirika, sereta nyeruri Palan Gempuru enggau bengunan Pampang Opis. Sekeda gawa ba Bethel, lalu ke bukai gawa ba opis penyalin. Jehovah ngena mayuh bala menyadi indu ngambika ulih ngereja peneka Iya. (Mas. 68:11) Endang amat, Jehovah enda ngumbai orang indu lemi tauka nadai guna.

BAKA NI BALA MENYADI LELAKI ULIH NELADAN JEHOVAH LEBUH NGINTU ORANG INDU?

Bala menyadi lelaki, ngambika ulih nemu sekalika kitai ngintu bala menyadi indu sama baka chara Jehovah ngintu sida, kitai patut meresa runding sereta ulah kitai enggau jujur. Kena ngereja nya, kitai begunaka tulung. Ambika chunto, siku lutur ulih ngena perengka iya kena nentuka sekalika jantung sesiku orang gerai tauka enda. Baka nya mega, bala kaban ti manah enggau Bup Kudus ulih nulung kitai nemu sekalika runding kitai pasal orang indu ngelantangka ati Jehovah tauka enda. Nyadi, nama ulih digaga kitai kena ngulihka tulung nya?

Tanya meh runding siku kaban ti manah. (J-lam. 18:17) Tanya meh siku kaban ke dipechayaka kitai, ke manah sereta ngembuan runding ti seimbang: “Baka ni aku ngintu bala menyadi indu? Kati sida ulih ngasaika aku bebasaka sida? Kati bisi utai ke ulih dikemansangka aku ngambika ulih ngintu sida enggau manah agi?” Enti kaban nuan madahka sekeda utai ti ulih dikemansangka nuan, anang meri mayuh alasan, tang bebendar meh ngaga ubah.

Belajarka Bup Kudus. Siti chara ti pemadu manah kena nemu sekalika kitai ngintu bala menyadi indu enggau manah tauka enda, iya nya ngena Bup Kudus meresa runding sereta ulah kitai. (Heb. 4:12) Lebuh kitai belajarka Bup Kudus, kitai belajar pasal orang lelaki ti ngintu orang indu enggau manah sereta sida ke jai enggau orang indu. Udah nya, kitai ulih mandingka ulah sida enggau chara kitai ngintu orang indu. Nambahka nya, bala menyadi lelaki patut bejimat ngambika enda ngena siti aja ayat Bup Kudus kena nyukung runding sida ti salah pasal orang indu. Tang, sida patut beratika semua ayat Bup Kudus ke berandauka chara orang lelaki patut ngintu orang indu. Enggau chara tu, sida ulih beratika runding Petara pasal orang indu. Ambika chunto, nitihka 1 Peter 3:​7, siku laki patut bebasaka bini iya laban bini iya “lemi agi sereta baka periuk ke senang pechah.” c Kati tu reti iya orang indu kurang agi pintar tauka kurang agi landik ari orang lelaki? Enda, ukai baka nya. Bandingka utai ti disebut Peter enggau  utai ti ditulis ba Galatia 3:​26-29. Ayat nya madahka, Jehovah udah milih orang indu enggau orang lelaki ngambika merintah enggau Jesus ba serega. Lebuh kitai belajarka Bup Kudus sereta nanya runding ari siku kaban ti manah pasal chara kitai ngintu orang indu, kitai ulih belajar ngayanka basa ngagai bala menyadi indu.

BAKA NI BALA TUAI GEMPURU NGAYANKA BASA NGAGAI BALA MENYADI INDU?

Bala menyadi lelaki dalam raban gempuru mega ulih belajarka chara ngintu bala menyadi indu enggau basa lebuh sida nitihka teladan bala tuai gempuru. Baka ni bala tuai gempuru netapka teladan lebuh ngayanka basa ngagai bala menyadi indu? Peratika sekeda chara tu.

Bala tuai gempuru muji bala menyadi indu. Rasul Paul netapka teladan ti manah ke ulih dititihka bala tuai gempuru. Dalam surat ke ditulis iya ngagai raban gempuru ba Rome, iya muji beberapa iku menyadi indu. (Rom. 16:12) Ulih nuan ngambarka pengaga ati bala menyadi indu nya lebuh surat Paul dibacha ngagai raban gempuru? Baka nya mega, bala tuai gempuru muji bala menyadi indu ketegal sifat sida ti manah sereta pengawa ti dikereja sida ke Jehovah. Tu nulung bala menyadi indu nemu bala menyadi ba raban gempuru bebasa sereta sayauka sida. Jaku puji ari bala tuai gempuru engka utai ti diguna bala menyadi indu seraya sida terus nyembah Jehovah enggau tetap ati.—J-lam. 15:23.

Lebuh muji bala menyadi indu, bala tuai gempuru nentuka jaku puji sida ikhlas sereta nyemetak. Nama kebuah? Siku menyadi indu ke benama Jessica madahka: “Sigi manah enti bala menyadi lelaki nyebut ngagai kami, ‘Terima kasih ke pengawa nuan.’ Tang kami deka berasai gaga agi lebuh bala menyadi lelaki muji kami enggau nyemetak. Sida engka madah, ‘Terima kasih laban ngajar bala anak kita duduk jenuh lebuh ba gempuru,’ tauka ‘Terima kasih laban udah ngambi pemelajar Bup Kudus datai ngagai gempuru.’” Lebuh bala tuai gempuru muji bala menyadi indu enggau nyemetak, bala menyadi indu deka ngasaika diri beguna sereta berega ba raban gempuru.

 Bala tuai gempuru ningaka bala menyadi indu. Bala tuai gempuru ti baruh ati sedar, ukai sida aja ke bisi idea ti manah. Bala tuai gempuru ke baka nya nanya runding bala menyadi indu, lalu sida mega ninga enggau manah lebuh bala menyadi indu bejaku. Enggau chara nya, bala tuai gempuru meransang bala menyadi indu, lalu sida mega bulih penguntung. Peratika utai ti disebut siku tuai gempuru ke benama Gerardo, ke gawa ba Bethel: “Aku nanya runding bala menyadi indu laban tu nulung aku ngereja pengawa aku enggau manah agi. Kesuah iya, bala menyadi indu bisi mayuh agi pengalaman ngereja pengawa nya ari bala menyadi lelaki. Dalam raban gempuru, mayuh bala menyadi indu nyadi pengerintis. Nyadi, sida nemu mayuh agi pasal orang ke diau ba endur nya.” Siku tuai gempuru ke benama Bryan madahka: “Bala menyadi indu kitai bisi mayuh sifat ti manah sereta pengelandik ti berega ke gerempung kitai. Nyadi, belajar meh ari sida!”

Bala tuai gempuru ti bepenemu-dalam enda jejampat nulak cadangan ari bala menyadi indu. Nama kebuah? Siku tuai gempuru ke benama Edward madahka: “Runding enggau pengalaman menyadi indu ulih nulung menyadi lelaki faham sesiti pekara enggau terang agi, lalu nya mega ulih nulung menyadi lelaki faham agi asai ati orang bukai.” (J-lam. 1:5) Taja pan tuai gempuru enda ulih nitihka cadangan ari menyadi indu nya, tang iya agi ulih meri terima kasih laban menyadi indu nya udah meri cadangan sereta bekunsika penemu enggau runding iya.

Bala tuai gempuru ngelatih bala menyadi indu. Bala tuai gempuru ti bepenemu-dalam ngiga peluang ngambika ulih ngelatih bala menyadi indu. Ambika chunto, sida ulih ngajar bala menyadi indu chara ngiring gempuru sebedau nginjil, enti sema nadai menyadi lelaki ti udah dibaptisa ke ulih ngiring. Sida ulih ngelatih bala menyadi indu ngena perengka tauka mesin ngambika ulih nulung ba projek nirika sereta nyeruri bengunan teokratik. Ba Bethel, bala tuai gempuru udah ngelatih bala menyadi indu ngambika ngereja mayuh macham tanggung pengawa, baka pengawa nyeruri, pengawa meli utai, akaun, ngadu program komputer, enggau ke bukai. Lebuh bala tuai gempuru ngelatih bala menyadi indu, tu nunjukka sida pechaya bala menyadi indu tau dikearapka sereta ulih ngereja utai.

Mayuh bala menyadi indu ngena latihan ke diterima sida ari bala tuai gempuru ngambika ulih nulung orang bukai. Ambika chunto, sekeda menyadi indu ngena latihan ke diterima sida ba projek nirika bengunan kena nulung orang bukai nirika baru rumah sida ke rusak ketegal bencana alam. Lalu, menyadi indu ke bukai ke nerima latih ba pengawa nginjil ba endur orang mayuh, ngena penemu nya ngelatih mayuh agi menyadi indu. Nama asai ati bala menyadi indu pasal tuai gempuru ke ngelatih sida? Siku menyadi indu ke benama Jennifer madahka: “Lebuh aku gawa ba siti projek nirika Palan Gempuru, siku tuai gempuru ngena mayuh awak ngelatih aku. Iya beratika utai ti dikereja aku, lalu iya mega muji aku ketegal pengawa nya. Aku rindu gawa enggau iya laban aku ngasaika diri berega sereta ulih dipechaya.”

PENGUNTUNG KE DIULIH LEBUH KITAI NGINTU BALA MENYADI INDU BAKA DIRI SEBILIK KITAI

Baka Jehovah, kitai mega rinduka bala menyadi indu kitai ti tetap ati! Nyadi, kitai ngintu sida baka diri sebilik. (1 Tim. 5:​1, 2) Kitai berasai amat temegah ati laban ulih gawa enggau sida. Lalu, kitai amat gaga ati lebuh bala menyadi indu nemu kitai sayau sereta nyukung sida. Siku menyadi indu ke benama Vanessa madahka: “Aku amat beterima kasih ngagai Jehovah laban ulih nyadi sebagi ari gerempung Iya. Gerempung Iya bisi mayuh bala menyadi lelaki ti udah mayuh meransang aku.” Siku menyadi indu ba Taiwan madahka: “Aku amat beterima kasihka Jehovah enggau gerempung Iya laban sida ngumbai bala menyadi indu berega sereta bebasaka asai ati kami. Tu negapka pengarap aku, lalu ngasuh aku beterima kasih agi laban ulih nyadi sebagi ari gerempung Jehovah.”

Jehovah tentu amat gaga ati lebuh Iya meda bala menyadi lelaki ke ibuhka sereta bebasaka orang indu baka Iya! (J-lam. 27:11) Ku Benjamin, siku tuai gempuru ari Scotland madahka: “Mayuh lelaki ba dunya tu langsung enda bebasaka orang indu. Nyadi, lebuh bala menyadi indu datai ngagai Palan Gempuru, kitai deka nentuka sida berasai dipebasa sereta dikerindu.” Aram meh kitai bebendar neladan Jehovah, lalu ngintu bala menyadi indu enggau pengerindu sereta basa ke endang patut diterima sida.—Rom. 12:10.