Betul enggau Salah: Pilihan ke Patut Dipilih Nuan
Standard moral ke dipilih kitai, meri kesan sekalika kitai ulih gaga ati tauka enda. Petara Jehovah nemu tu, nya kebuah Iya dekaka kitai idup nitihka standard Iya.
Jehovah dekaka kitai ngembuan pengidup ti lantang sereta gaga ati.
‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita. Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang. Pemenang tentu udah datai ngagai kita baka gelumbang ti ngalun ngagai tebing.’—Isaiah 48:17, 18.
Sebagai Penempa kitai, Petara nemu chara pengidup ti pemadu manah ke kitai. Iya dekaka kitai nitihka iring ari Iya, laban nya meri penguntung ke kitai. Lebuh kitai nitihka pesan Petara, kitai enda ibuh irau sekalika pilihan kitai nya deka bulih asil ti manah tauka enda. Kitai tentu ngaga pemutus ti betul, ke mai pengelantang enggau pengaga ati.
Jehovah enda minta utai ti enda ulih dikereja kitai.
“Pesan ke dipadahka aku ngagai kita seharitu, enda kelalu tusah dimeretika sereta enda kelalu tusah dititihka.”—Ulang Adat 30:11.
Enti kitai deka idup nitihka standard moral Petara, tu begunaka ubah ba ulah ke diayan sereta ba chara kitai berunding. Taja pia, Jehovah enda minta utai ti ngelui ari ke ulih kitai. Laban Iya ke nempa kitai, Iya nemu nama utai ke ulih dikereja kitai. Majak kitai ngelala Jehovah, kitai nemu “pesan Iya enda kelalu tusah dititihka.”—1 John 5:3.
Jehovah besemaya deka nulung sida ke milih nitihka standard Iya ba pengidup.
‘Aku tu Jehovah Petara kita. Aku ngasuh kita kering lalu madahka ngagai kita, “Anang takut. Aku deka nulung kita.”’—Isaiah 41:13.
Kitai ulih idup nitihka standard moral Petara laban Iya deka nulung kitai. Iya nulung kitai nengah Jaku Iya, iya nya Bup Kudus ke ulih meri kitai peransang sereta harapan.
Bejuta iku orang ba serata dunya udah ngasaika, idup nitihka standard Bup Kudus udah ngemanahka agi pengidup sida. Nuan ulih nemu mayuh agi lalau ke datai ari Bup Kudus. Iya nya nengah brosur Idup enggau Lantang Belama Iya! ke ulih diambi nuan enggau pechuma ba jw.org/iba. Brosur nya bisi topik ke baka tu:
-
Baka Ni Bup Kudus Ulih Nulung Nuan?
-
Bup Kudus Meri Kitai Semaya ti Manah pasal Jemah Ila
-
Ulih Nuan Pechayaka Bup Kudus?
Seraya nuan mansik Jaku Petara iya nya Bup Kudus, nuan deka meda Jaku Iya endang seruran ulih dipechaya, sereta “meruan belama iya.” (Masmur 111:8) Nitihka standard moral ke bisi dalam Bup Kudus, nya meh chara pengidup ti pemadu manah. Taja pia, Petara enda mejal kitai ngereja tu. (Ulang Adat 30:19, 20; Josua 24:15) Tu pilihan ke patut digaga tiap iku kitai.
