SARAH angkat ari pengawa ke dikereja iya lalu merening jauh. Bala ulun ke di baruh iring iya ngereja pengawa enggau kisuk sereta gaga ati. Sarah ke bagas mega ngereja ungkup iya empu. Uji gambarka, seraya iya ngurut kedua-dua jari iya ngambika enda pedis, iya mega berunding. Iya engka udah kelalu bendar nampal lubang ba langkau kain ke alai sida diau. Kain kasar ti digaga ari bulu kambin ke nyau luya ketegal udah betaun kena panas enggau ujan ngingatka Sarah pasal sida ke udah lama diau ba langkau kain. Hari nyau majak lemai, lalu diatu nyau deka petang. Pagi nya iya meda Abraham a bekejang, lalu iya nganti penatai Abraham ari endur iya ke bekejang. Lebuh Sarah meda kenaya laki iya semak munggu, iya pan tuchum.

Sepuluh taun udah abis udah bekau Abraham mai ruang bilik iya ti besai meraka Sungai Eupratis lalu nuju ngagai menua Kanaan. Sarah deka nyukung laki iya bejalai jauh ngagai endur ke enda ditemu sida, laban iya nemu Abraham bisi ungkup ti besai kena ngamatka tuju Jehovah ke deka ngadaka seiku peturun sereta siti bansa ti amat dikerinduka Iya. Nama ungkup Sarah? Iya udah lama mandul, lalu diatu umur iya 75 taun. Iya tentu berunding, ‘Baka ni semaya Petara ulih nyadi seagi-agi aku nyadi bini Abraham?’ Tu tentu ngasuh iya irau, tauka enda sabar.

Kitai mega engka kekadang deka nemu kemaya semaya Petara deka nyadi. Kitai kelebih agi enda sabar lebuh benung nganti pengadang ti dikerindu kitai dikeamatka. Nama ulih dipelajarka kitai ari pengarap indu ti ngerinduka ati nya?

Ruang bilik nya baru pulai ari menua Ejip. (Pemungkal 13:1-4) Sida nirika kem ba endur ti bebukit muak ke timur Betel, tauka Lus, nitih ku orang Kanaan. Ari emperan ke tinggi tu, Sarah ulih meda pemesai rampa menua Tanah ti Udah Disemaya. Dia bisi genturung pendiau orang Kanaan, sereta sekeda jalai ke dikena orang ngagai menua ti jauh. Tang semua utai nya enda telabanka menua asal Sarah. Iya dibesaika di nengeri Ur ke dipegai menua Mesopotamia ke kira-kira 1,900 km [1,200-batu] penyauh. Iya udah ninggalka mayuh kaban belayan, endur baka makit enggau pasar, sereta rumah iya ti nyamai alai diau ke digaga enggau atap ti tegap sereta bedinding, lalu engka bisi disediaka bekal ai beresi! Tang, enti kitai ngambarka Sarah merening ke timur enggau ati ti tusah, inginka penyamai ke kala diasaika iya di menua lama iya suba, kitai enda ngelala iya.

Peratika utai ti ditulis rasul Paul kira-kira 2,000 taun udah nya. Lebuh ngenang pasal pengarap Sarah seduai Abraham, ku Paul madahka: “Enti sema sida berundingka menua ti udah ditinggalka sida, sida tentu bisi peluang mulaika diri.” (Hebrew 11:8, 11, 15) Sarah  seduai Abraham enda berundingka menua ti udah ditinggalka. Enti seduai iya majak berundingka menua nya, seduai iya tentu deka mulaika diri. Tang enti pulai ke Ur, seduai iya deka lenyau peluang ke diberi Jehovah lalu nadai agi dikenang nyentuk ngagai diatu. Kelimpah ari nya, seduai iya mega enda ulih nyadi chunto ke bekaul enggau pengarap ti ulih negu ati bejuta iku orang.

Ari ke malik kebelakang, Sarah merening ke mua. Nya alai iya mengkang nyukung laki iya lebuh sida diau enda lama di menua Kanaan, nulung muka langkau kain, bebaika raban jelu, lalu nirika langkau kain baru. Iya napi penanggul enggau ubah ke bukai. Jehovah ngaga semaya baru enggau Abraham, tang agi nadai nyebut pasal Sarah!—Pemungkal 13:14-17; 15:5-7.

Nya alai, Sarah mutuska deka madah ngagai Abraham pasal utai ke dirunding iya. Uji gambarka mua Sarah ke enda entu gaga lebuh iya madahka: ‘Jehovah udah nagang aku beranak.’ Udah nya iya ngasuh Abraham ngambi Hagar nyadika bini ngambika Abraham ulih beleman enggau Hagar lalu bulih anak ari Hagar. Ulih nuan ngambarka pemedis ba ati Sarah lebuh iya ngasuh laki iya ngereja nya? Nya engka peminta ti nyelai ba kitai kemaya hari tu, tang maya nya suba enda laban orang ke lelaki tau bebini dua, tauka ngembuan indu simpan, ngambika tau bulih peturun. b Kati Sarah engka ngumbai enggau chara tu tuju Petara ke deka ngadaka siti bansa nengah peturun Abraham deka dikeamatka? Engka, nya kebuah iya sanggup ngaga pemutus ti tusah tu. Baka ni Abraham nerima utai tu? Ari Bup Kudus kitai nemu, iya “besetuju enggau utai ti disebut [Sarah].”—Pemungkal 16:1-3.

Kati utai nya nunjukka Jehovah ke ngasuh Sarah ngaga pemutus ke baka nya? Ukai. Tang pemutus ke digaga Sarah nunjukka penemu ari mensia. Iya ngumbai penanggul ke ditapi iya datai ari Petara, lalu iya ngumbai Petara nadai chara bukai kena mutarka penanggul nya. Pemutus ke digaga Sarah empu deka ngasuh iya pedis sereta tusah. Taja pia, pemutus ke digaga iya nunjukka iya enda berundingka diri empu. Ba dunya ke alai orang suah ngenuluka pengingin diri lebih ari orang bukai, endaka ulah Sarah ke enda berundingka diri empu ngerinduka ati? Enti kitai deka ngenuluka tuju Petara lebih ari pengingin diri empu, kitai neladan pengarap Sarah.

Enda lama udah nya Hagar pan betubuh-bisi. Meda  diri udah betubuh-bisi, Hagar engka ngumbai diri lebih agi ari Sarah, lalu iya berengkah ngemaruhka Sarah. Naka meh pengasa ati Sarah ke mandul! Enggau pemendar ari Abraham, Sarah ngemaluka Hagar. Lalu Petara nyukung utai ti dikereja Sarah. Hagar ngadaka anak lelaki ke diberi nama Ismail, lalu taun pan beganti taun. (Pemungkal 16:4-9, 16) Lebuh pesan ari Jehovah datai baru, umur Sarah 89 taun lalu umur laki iya 99 taun. Lalu seduai iya bulih siti pesan ti ngagitka ati!

Jehovah sekali agi besemaya ngagai pangan Iya Abraham pasal Iya ti deka meri Abraham mayuh peturun. Petara mega nukar nama Abraham. Sebedau nya, iya dikangau ngena nama Abram. Tang Jehovah meri iya nama Abraham, reti iya “Apai ke Mayuh Orang.” Lalu diatu, keterubah iya, Jehovah madahka ungkup Sarah. Jehovah nukar nama iya ari Sarai, ke engka ngembuan reti “Udu Bekelikuh” ngagai Sarah, iya nya nama ke ditemu semua kitai. Nama reti Sarah? “Anak Indu Raja”! Jehovah madahka kebuah Iya milih nama nya ke indu ti dikerinduka tu: “Aku deka merekatka iya, lalu Aku deka meri ngagai nuan siku anak lelaki ulih iya. Aku deka merekatka iya, lalu iya deka nyadi indai ke mayuh bengkah bansa, lalu sekeda ari peturun iya deka nyadi raja.”—Pemungkal 17:5, 15, 16.

Semaya ari Jehovah ke deka meri seiku peturun ti deka merekatka semua bansa deka dikeamatka nengah anak lelaki Sarah! Nama ti dipilih Petara ke anak lelaki nya, Isak, reti iya “Ketawa.” Lebuh Abraham baru nemu pasal tuju Jehovah ke deka merekatka Sarah enggau seiku anak lelaki ari Sarah empu, Abraham “nyungkurka diri ke tanah, tang iya ketawa.” (Pemungkal 17:17) Iya alit ati enggau gaga ati. (Rome 4:19, 20) Lalu baka ni enggau Sarah?

Enda lama udah nya, tiga iku lelaki ke enda dikelala datai ngagai langkau kain Abraham. Maya nya hari balat amat angat, tang sepasang melaki-bini ke udah tuai tu berumban ngelaluka bala temuai nya. Ku Abraham madah ngagai Sarah: “Jampat! Ambi tepung nuan ti pemadu alus, lalu panggang roti.” Pengawa mela temuai menya begunaka mayuh pengawa. Abraham enda nejuka bini iya ngereja semua pengawa. Iya berumban munuh seiku anak sapi lalu ngenahka mayuh agi pemakai sereta utai ti diirup. (Pemungkal 18:1-8) Kebendar, sida “lelaki” nya melikat Jehovah! Rasul Paul engka mikirka pekara tu lebuh iya nulis: “Anang enda ngelaluka temuai ngagai rumah kita, laban sekeda orang ke ngereja nya enda nemu diri udah ngelaluka melikat.” (Hebrew 13:2) Ulih nuan neladan chunto nerima temuai ti badas baka ke udah digaga Abraham seduai Sarah?

Lebuh seiku ari melikat nya nandu semaya Petara ngagai Abraham pasal Sarah ke deka ngadaka seiku anak lelaki, Sarah nadai dia, iya dalam langkau kain mendingka melikat nya bejaku. Sarah ngumbai ulih ngadaka anak lebuh umur nyau tuai nya utai ti nyelai, nya alai iya enda ulih nagang diri ketawa dalam ati diri, lalu ku iya: “Aku diatu nyau tuai. Baka ni ku aku agi ulih beleman enggau laki aku? Nambahka nya, laki aku pen nyau tuai.” Melikat nya ngemetulka runding Sarah enggau nanya iya, ‘Kati Jehovah enda ulih ngereja sebarang utai?’ Baka sekeda orang, Sarah berasai takut lalu enggai ngaku penyalah diri. Sarah terus nyaut: “Nadai aku ketawa.” Ku melikat nya nimbal iya: “Sigi amat, nuan udah ketawa tadi.”—Pemungkal 18:9-15.

Kati pengawa Sarah ti ketawa nunjukka iya kurang pengarap? Enda. Bup Kudus madahka: ‘Ulih pengarap, Sarah ngandung, taja pen iya nyau kelalu tuai umur, laban iya arapka Petara deka ngamatka semaya Iya.’ (Hebrew 11:11, nota kaki.) Sarah ngelala Jehovah. Iya nemu Jehovah ulih ngamatka semua semaya ke digaga Iya. Endaka semua kitai begunaka pengarap ke baka nya? Kitai patut ngelala Petara ke meri Bup Kudus enggau manah agi. Enti ngereja nya, kitai deka nemu Sarah amat ngembuan pengarap ba utai ti dikereja iya. Jehovah endang tetap ati lalu ngamatka tiap iti semaya Iya, lalu kekadang Iya engka ngereja nya enggau chara ti ngalitka ati kitai tauka ngasuh kitai deka ketawa!

Lebuh umur Sarah 90 taun, iya pan bulih utai ti dikinginka  iya ngelama tu. Iya ngadaka seiku anak lelaki ke Abraham ti beumur seratus taun! Abraham meri anak mit nya nama Isak, tauka “Ketawa,” baka ke dipadah Petara. Kitai ulih ngambarka Sarah lemi tulang tang iya tuchum lebuh iya madahka: ‘Petara udah nyungkak aku ketawa. Semua orang ke ninga berita tu deka ketawa sama enggau aku.’ (Pemungkal 21:6) Pemeri ari Jehovah tu tentu ngagaka ati iya nyentuk ngagai iya mati. Taja pia, tu mega mai tanggung pengawa ti besai ngagai iya.

Lebuh Isak beumur lima taun, sida sebilik nyediaka pengerami makai besai kena nandaka iya badu agi nusu. Tang udah nya bisi utai nyadi. Bup Kudus madahka, Sarah bisi beratika ulah ti enda manah. Anak lelaki Hagar, Ismail, ke beumur 19 taun, udu beduan Isak ke agi mit. Iya ukai semina beduan aja. Rasul Paul ke diiring roh kudus ngumbai ulah Ismail nya merinsaka orang. Sarah beratika pengawa beduan nya: tau ngachau pengidup anak iya. Sarah nemu Isak ukai semina anak iya. Anak iya bisi ungkup ti besai dalam tuju Jehovah. Nya alai iya meranika diri lalu bejaku enggau Abraham. Iya ngasuh Abraham muru Hagar seduai Ismail.—Pemungkal 21:8-10; Galatia 4:22, 23, 29.

Nama runding Abraham pasal jaku nya? Bup Kudus madahka: “Jaku nya balat ngenusahka ati Abraham, laban Ismail mega anak iya.” Iya balat sayauka Ismail, laban Ismail mega anak iya. Taja pia, Jehovah ulih meda pekara nya enggau terang, nya alai Iya masuk champur. Bup Kudus madahka: ‘Tang ku Petara bejaku ngagai Abraham, “Anang irau ati ke nembiak nya enggau ulun nuan Hagar. Kereja aja sebarang utai ti diasuh Sarah, laban semina nengah Isak aja nuan deka bulih peturun ti udah disemaya Aku.”’ Jehovah madah ngagai Abraham, utai ke diguna Hagar seduai Ismail deka disediaka. Abraham nitihka jaku Jehovah.—Pemungkal 21:11-14.

Sarah endang bini sereta penulung ti badas ke Abraham. Iya ukai semina madah ngagai laki iya utai ti deka didinga laki iya. Lebuh iya bisi meda penanggul ke tau ngachau sida sebilik sereta pengidup sida dudi hari, iya deka terus terang bejaku ngagai laki iya. Ulah iya ke beterus terang ukai reti iya enda bebasa. Indah rasul Peter ke udah berumah tangga ngumbai Sarah nyadi teladan ti manah ke bini ti ngayanka basa ngagai laki iya. (1 Korint 9:5; 1 Peter 3:5, 6) Kebendar, enti Sarah enda bejaku pasal pekara nya, iya enda bebasaka Abraham, laban nya tau ngachau Abraham sereta semua sida sebilik. Sarah nyebut utai ke patut disebut.

Mayuh bala bini rinduka chunto Sarah. Ari Sarah, sida belajar bejaku terus terang sereta bebasa ngagai laki sida. Sekeda bini mega kekadang engka deka Jehovah nulung sida baka Iya ke nulung Sarah. Taja pia, sida belajar ari pengarap, pengerindu, sereta pengeliat ati Sarah.

Taja pan indu ke dikesayau tu diberi Jehovah nama “Anak Indu Raja,” tang iya enda ngarapka diri diintu baka anak indu raja. Nya kebuah lebuh iya mati maya umur iya 127 taun, Abraham “nyenggai iya [“tusah ati,” NW] lalu nyabakka iya.” c (Pemungkal 23:1, 2) Abraham balat lelengauka “Anak Indu Raja” iya. Petara Jehovah mega tentu rinduka indu ke tetap ati tu, lalu Iya deka ngangkatka Sarah idup baru ba dunya paradais. Pengidup ti meruan belama iya sereta ngelantangka ati deka diempu Sarah, sereta semua orang ke neladan pengarap iya.—John 5:28, 29.