Ba runding mayuh orang, sekula tinggi enggau pengaya ulih nyamin pengidup ti manah jemah ila. Sida pechaya orang ke belajar ba universiti deka nyadi pekereja ke landik agi, seiku ruang bilik ti manah, sereta nyadi rayat ke beguna. Sida mega berunding, sekula tinggi ulih ngasuh seseiku orang bulih kereja ti begaji besai sereta ngembuan pengidup ti lantang.

Zhang Chen, ke ari menua China madahka, “Aku ngasaika aku patut bisi ijazah universiti, ngambika aku enda idup seranta agi. Aku mega pechaya enti aku bisi kereja ti begaji besai, tentu pengidup aku lantang sereta puas.”

Ketegal deka ngulih pengidup ti manah agi, mayuh orang sanggup ngagai luar negara lalu belajar ba universiti ti tebilang. Chara tu majak dikerinduka, nyentukka pejalai entarabansa disekat ketegal penyakit COVID-19. Siti riput ke dikeluarka Pertubuhan Kerjasama dan Pembangunan Ekonomi kena taun 2012 nerangka, “Entara semua pemelajar ke belajar ba luar negara, 52% ari sida nya orang Asia.”

Kesuah iya, apai indai sanggup idup tusah ketegal deka nganjung anak sida tama universiti ti tebilang ba luar negara. Qixiang, ari menua Taiwan madahka, “Apai indai aku enda kaya, tang sida sanggup nganjung kami empat semadi ngagai universiti ba Amerika Serikat.” Kena mayar ungkus belajar, ruang bilik Qixiang patut mayuh berutang. Utai ti sama mega mayuh nyadi ba ruang bilik ke bukai.

Sekula tinggi ulih ngemansangka pengidup. Taja pia, mayuh orang ngasaika sekula tinggi enda seruran mai asil ti dikedekaka. Ngambika chunto, pengudah betaun-taun belajar lalu bisi utang ti mayuh, mayuh orang ke pansut ari universiti enda tegigaka kereja ti dikedekaka sida. Siti riput ke ditulis Rachel Mui ba surat khabar Singapura Business Times madahka, “Penanggul orang ke pansut ari universiti ti enda bulih kereja majak betambah.” Jianjie, seiku orang ke bisi ijazah lutur, ari menua Taiwan madahka, “Mayuh orang ke pansut ari universiti nadai daya, sida patut nerima kereja ke nadai bekaul enggau ijazah sida.”

Pia mega, anang ngumbai orang ke bulih kereja ke dikedekaka sida puas ati enggau pengidup sida. Pengudah tembu belajar di universiti ba United Kingdom, Niran pulai ke Thailand lalu bulih kereja ke bekaul enggau kursus iya. Ku iya, “Ketegal bisi ijazah, aku bulih kereja ti begaji besai. Tang kereja nya udah ngerampas mayuh awak aku. Iya ke ngasaka ati, serikat ke endur aku gawa muai mayuh pekereja nyengkaum aku. Aku sedar, kereja enda ulih nyamin pengidup kitai.”

Ke bendar iya, orang ke kaya tauka idup senang, mega bisi penanggul ba ruang bilik, ba pengerai sereta ba duit. Katsutoshi ari Jepun ngaku, “Aku bisi mayuh duit, tang aku enda gaga ati laban orang bukai chemburu enggau aku, deka belaban enggau aku, sereta enda begulai manah enggau aku. Lam, seiku indu ari menua Vietnam madahka, “Aku meda mayuh orang bendar deka ngulihka kereja ti begaji besai. Sida ngumbai enti sida mayuh duit, idup sida dijamin. Tang kesuah iya, sida berasai irau, sakit sereta bisi penyakit depression tauka kemurungan.”

Baka Franklin, mayuh orang sedar bisi utai ke beguna agi ari bebendar deka sekula tinggi sereta ngulihka pengaya. Nya alai, ari ke kelalu fokus ngagai reta tengkira, sida naka ulih nyadi orang ti manah lalu ngereja pengawa sukarela. Laban sida ngumbai, nya ulih meri sida pengidup ti manah jemah ila. Tang, nama asil iya? Aram meda artikel pengudah tu.