Nama Utai ke Nentuka Pengidup Nuan Jemah Ila?
Mayuh orang pechaya, pengidup kitai ke jemah ila udah ditentuka takdir tauka nasit. Ketegal tu, sida nitihka sekeda adat ke dikumbai sida ulih mai tuah, lalu meri pengidup ti manah agi jemah ila.
UTAI KE DIKEARAPKA MAYUH ORANG
ASTROLOGI: Sekeda orang pechaya, pengidup sida ke jemah ila ditentuka bintang ba bulan sida ada. Nya alai, sida ngena horoskop, kena nemu utai ke deka nyadi ngagai sida. Pia mega, sida ngereja sesiti utai ngambika enda ditinggang penusah lalu bulih pemujur.
FENG SHUI: Bisi orang pechaya, enti rumah sida digaga enggau chara ti ngena sereta chun enggau utai ke ngelingi, nya ulih mai tuah. Lo Wing, * ke diau ba Hong Kong madahka, “Seiku pakar feng shui madahka aku, enti aku ngengkahka batu kristel ti spesial ba sesiti endur di kedai aku, aku deka bulih mayuh duit.”
NYEMBAH PETURUN KE UDAH MATI: Bisi mega orang pechaya, sida patut ngelantangka peturun sida ke udah mati tauka dewa dewi, ngambika sida dijaga enggau diberekat. Van, ke diau ba Vietnam madahka, “Aku pechaya, enti aku nyembah peturun kami ke udah mati, pengidup aku deka manah agi. Lalu tu nyamin pengidup aku sereta bala anak aku ke jemah ila.”
DIADAKA BARU: Mayuh orang pechaya, pengudah seseiku orang mati, iya deka diadaka baru. Lalu proses tu ulih nyadi mayuh kali. Sida pechaya utai ke manah enggau utai ke jai nyadi ba pengidup sida, nya ketegal pengawa ke digaga sida ba pengidup ke sebedau tu.
Mayuh orang ngumbai, pengawa ke baka tu adat ti pelesu. Taja pia, sida agi betilit nasit, macha horoskop, ngena papan Ouija®, macha kad tarot, enggau mayuh agi. Sida ngumbai semua utai tu, engka ulih nulung sida nemu pasal pengidup sida ke jemah ila.
NAMA ASIL IYA?
Kati orang ke nitihka adat tu, ulih bulih pengidup ti lantang sereta pengidup ti manah jemah ila?
Peratika peneleba Hào, ke diau ba Vietnam. Iya pechayaka astrologi enggau feng shui, sereta nyembah peturun iya ke udah mati. Kati iya bulih tulung ke diguna ngambika ulih mujur ba pengidup? Ku Hào madah, “Bisnis aku enda mujur, lalu aku bisi mayuh utang. Ruang bilik aku bisi penanggul, lalu aku pan kena penyakit depression tauka kemurungan.”
Qiuming, ke asal ari Taiwan, mega pechayaka astrologi, diadaka baru, nasit, feng shui, enggau nyembah peturun iya ke udah mati. Tang pengudah ngaga pansik bekaul enggau semua adat tu, iya madah, “Aku nyau sedar ajar enggau adat ke baka tu, enda sejalai enggau pangan diri sereta nyarutka runding. Suah iya, utai ke dipadah ba astrologi enda betul. Bejaku pasal adat ke diadaka baru, enti kitai enda ingat pasal pengidup kitai ke sebedau tu, nyadi baka ni kitai deka berubah, lalu nyadi orang ke manah agi ba pengidup ti deka datai?”
“Aku nyau sedar ajar enggau adat ke baka tu, enda sejalai enggau pangan diri sereta nyarutka runding.”—QIUMING, TAIWAN
Hào, Qiuming, enggau mayuh agi orang nyau sedar, pengidup kitai ke jemah ila enda ditentuka nasit, bintang, peturun ke udah mati tauka diadaka baru. Enti pia, reti iya kitai enda ulih nentuka pengidup kitai jemah ila?
Mayuh orang ngumbai, enti sida deka bulih pengidup ti manah jemah ila, sida patut sekula tinggi lalu ngulihka pengaya. Tang, kati pemutus ke digaga sida mai asil ti manah?
^ per. 5 Sekeda nama dalam artikel tu enggau artikel ke nangkanka tu udah diubah.
^ per. 16 Rambai jaku tu bisi ba Bup Kudus di Galatia 6:7. Jaku ajar tu bisi ba jaku sempama Cina ke bebunyi, “Nanam entekai bulih entekai, nanam kachang bulih kachang.”
Nuan Engka Rindu Meda Tu
MENARA JAGA
Nama Dipadah Bup Kudus Pasal Pengidup enggau Pemati
Tang kati bisi utai bukai ba kitai ke agi idup pengudah kitai mati? Kati kitai ngembuan semengat ke enda nemu mati? Kini penunga orang ke udah mati?
