TOPIK RANDAU | BUP KUDUS—TAN BELAMA IYA
Bup Kudus Tan ari Rusak
PENANGGUL: Papairus enggau kulit jelu nya utai ti suah alai orang nulis sereta ngupi Bup Kudus. (2 Timoti 4:13) Baka ni utai tu ulih ngasuh Bup Kudus tusah deka tan ari rusak?
Papairus senang charik, tusur, sereta enda tan. Richard Parkinson enggau Stephen Quirke, ke mansik chara pengidup orang Ejip menya, madahka: “Selambar papairus ulih buruk sereta nyadi abuk. Lebuh ditaruh ba endur ti embap, gulung papairus ulih bekulat tauka luluh, lalu ulih diempa chit tauka indu utai, kelebih agi semut burak, enti iya ditumbak dalam tanah.” Sekeda papairus ke ayan jampat agi rusak enti kelalu balat kena panchar mata panas tauka kelalu embap.
Kulit jelu tan agi ari papairus, tang iya mega ulih rusak enti enda dijaga enggau manah tauka ayan ba endur ti kelalu angat, embap, tauka kena panchar mata panas. a Kulit jelu mega ulih diempa indu utai. Nya kebuah mayuh utai ke ditulis ngena kulit jelu menya nadai agi nyentuk ke diatu. Enti Bup Kudus udah rusak, pesan dalam Bup Kudus pan nadai agi.
BAKA NI BUP KUDUS ULIH TAN: Adat orang Judah ngasuh tiap iku raja ‘enda tau enda bisi siti Bup Adat ditulis iya’ ke iya empu, iya nya lima iti bup mit ti keterubah dalam Bup Kudus. (Ulang Adat 17:18) Nambahka nya, bala ke landik ngupi ngasilka mayuh manuskrip, nya alai ba kurun ti keterubah M., Bup Kudus bisi ba balai gempuru di serata menua Israel sereta ba menua ke jauh baka Masedonia! (Luke 4:16, 17; Kereja Rasul 17:11) Baka ni sekeda manuskrip ke amat lama ulih tan nyentuk ke diatu?
Manuskrip ke dikumbai Gulung Surat Tasik Mati ulih tan beratus taun dalam kebuk ke ditaruh dalam gua ba endur ti rangkai
Philip W. Comfort, seiku pakar Sempekat Baru, madahka: “Orang Judah tebilang enggau pengawa naruh gulung surat ke ngundan ayat Bup Kudus dalam tempayan tauka kebuk ngambika gulung surat nya ulih tan.” Orang Kristian menya nunjukka sida agi ngereja pengawa nya. Nya alai, sekeda manuskrip Bup Kudus ke dulu agi udah ditemu dalam kebuk, nyengkaum dalam bilik mit ke petang enggau gua sereta ba menua ke balat angat.
ASIL IYA: Beribu lambar manuskrip Bup Kudus—sekeda udah lebih 2,000 taun—agi bisi nyentuk ke diatu. Nadai teks kelia bukai ke bisi mayuh manuskrip kelia baka enggi Bup Kudus.
a Ngambika chunto, surat resmi Declaration of Independence U.S. ditulis ba atas kulit jelu. Diatu, kurang ari 250 taun udah nya, surat nya udah luya sereta enda agi ulih dibacha.
