Kebuah Saut nya Penting
Nama kebuah penting nemu sekalika Penempa nya bisi tauka enda? Enti semua bukti ke dikerandauka tadi ngasuh nuan andal Petara ti Pemadu Bekuasa nya amat bisi, nuan engka deka agi mansik bukti Bup Kudus nya jaku Petara. Enti nuan pechayaka utai ke dipadah dalam Bup Kudus, nuan deka ngasaika penguntung baka:
Pengidup nuan bisi tuju
BUP KUDUS MADAH: ‘Utai ti manah ti dikereja Iya [Petara]. Iya meri kita ujan, ngasuh utai ti ditanam kita bebuah lebat nitihka musin, lalu ngemuaska kita ngena pemakai lalu ngemenuhka ati kita enggau pengaga.’—Surat Kereja Rasul 14:17.
RETI IYA: Semua utai manah ke diasaika nuan ba dunya tu, siti pemeri ari Penempa kitai. Nuan deka beterima kasih agi ke semua pemeri tu, lebuh nuan nemu Petara ibuhka nuan.
Bulih iring ba pengidup ninting hari
BUP KUDUS MADAH: “Nuan deka nemu utai ti ngena, lurus sereta betul. Nuan deka nemu utai ti patut dikereja nuan.”—Jaku Dalam 2:9.
RETI IYA: Laban Petara nya Penempa, Iya nemu utai ke diguna nuan ngambika nuan lantang. Ari mansik Bup Kudus, nuan deka belajar mayuh utai ke ulih nulung nuan ba pengidup.
Utai ke ditanya nuan bisi saut
BUP KUDUS MADAH: ‘Nuan deka mujur belajarka pasal Petara.’—Jaku Dalam 2:5.
RETI IYA: Lebuh nuan nemu Penempa amat bisi, nuan deka tetemuka saut ngagai tanya ti penting tu. Nama tuju pengidup? Nama kebuah mayuh pemerinsa? Nama nyadi lebuh kitai mati? Nuan ulih tetemuka saut ti ngemuaska ati ari Bup Kudus.
Bisi pengadang ke jemah ila
BUP KUDUS MADAH: “Laban Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.”—Jeremiah 29:11.
RETI IYA: Petara besemaya, jemah ila Iya deka munaska penyai, pemerinsa enggau pemati. Lebuh nuan pechayaka semaya Petara, nuan deka berani agi napi penanggul ba pengidup. Laban, nuan nemu jemah ila bisi pengadang ti manah.
