TOPIK RANDAU | KATI BISI PENGUNTUNG ENTI BESAMPI?
Nama Kebuah Petara Ngasuh Kitai Besampi?
Petara deka kitai nyadi kawan Iya.
Orang ke bekawan bejaku enggau pangan diri kena ngerapatka kaul. Pia mega, Petara ngasuh kitai bejaku enggau Iya, ngambika bisi kaul ti rapat enggau Iya. Ku Iya; “Kita deka ngangauka Aku, datai lalu besampi ngagai Aku, lalu Aku deka ninga kita.” (Jeremiah 29:12) Seraya nuan bejaku enggau Petara, nuan deka “datai semak ngagai [Iya], lalu Iya deka datai semak ngagai kita.” (James 4:8) Bup Kudus madahka: “Iya diau semak sida ke ngangauka Iya.” (Masmur 145:18) Suah agi kitai besampi ngagai Petara, rapat agi kaul kitai enggau Iya.
“Iya diau semak sida ke ngangauka Iya.”—Masmur 145:18.
Petara deka nulung nuan.
Ku Jesus: “Kati kita ke apai meri batu ngagai anak kita enti iya minta roti? Tauka meri iya ular, enti iya minta ikan? Enti kita . . . nemu meri utai ti manah ngagai anak kita, Apai kita ti di serega tentu nemu agi meri utai ti manah ngagai orang ke minta ari Iya!” (Matthew 7:9-11) Amat, Petara ngasuh kitai besampi laban “Iya ngibun” sereta deka nulung kitai. (1 Peter 5:7) Iya mega ngasuh kitai nyerahka semua pengirau kitai ngagai Iya. Bup Kudus ngasuh kitai: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih.’—Pilipi 4:6.
Mensia begunaka pekara rohani.
Orang ke landik pasal gaya pengidup mensia udah meratika beratus juta iku orang ngasaika diri patut besampi. Tu nyengkaum sekeda orang ke enda arapka petara. * Ari tu kitai nemu mensia begunaka pekara rohani. Jesus madahka: “Beberekat meh orang ke seranta dalam roh.” (Matthew 5:3) Siti chara kitai tau bulih pekara rohani, iya nya enggau tetap besampi ngagai Petara.
^ per. 8 Pansik ke digaga Pew Research Center kena 2012 nunjukka 11 peratus orang ke enda arapka Petara ba Amerika Serikat besampi abis kurang sebulan sekali.
