Lebuh Orang ti Dikesayauka Sakit
“Lebuh apai kami deka pansut ari sepital, kami ngasuh lutur madahka asil peresa darah iya ngagai kami. Lutur madahka asil peresa nya manah, taja pia iya meda asil peresa nya baru. Tang dua iti ari peresa nya enda manah! Iya minta ampun, lalu ngangauka seiku lutur pakar. Diatu, apai kami udah gerai. Kami gaga ati laban bisi betanya ngagai lutur.”—Maribel.
Sebedau betemu enggau lutur, tuliska tanda penyakit sereta ubat ke diempa
Betemu enggau lutur sereta diau ba sepital ulih ngasuh irau ati. Utai ke nyadi ba Maribel nunjukka bantu ari kawan tauka kaban belayan endang beguna, indah ulih nyelamatka nyawa. Baka ni nuan ulih nulung orang ti dikesayauka nuan.
Sebedau betemu enggau lutur. Nulung pesakit nuliska tanda penyakit sereta bansa ubat ke diempa iya. Pia mega, tuliska sekeda tanya ke deka ditanya ngagai lutur. Asuh kawan nuan ngingatka utai bukai ke bekaul enggau penyakit iya tauka madah pasal sida sebilik ke bisi penyakit ti sama. Anang ngumbai lutur udah nemu semua pekara ke bekaul enggau penyakit nuan tauka lutur deka nanya kita pasal semua pekara nya.
Pendingka enggau manah, betanya ngagai lutur sereta tuliska utai ti dipadah lutur
Lebuh betemu enggau lutur. Nentuka nuan enggau pesakit meretika utai ti dipadah lutur. Betanya ngagai lutur, tang anang ngena penemu diri empu. Asuh pesakit betanya ngagai lutur sereta bejaku enggau lutur kediri empu. Pendingka enggau manah sereta tuliska utai ti dipadah lutur. Tanya pasal chara berubat ke bukai. Ba sekeda pekara, engka manah agi ngasuh pesakit ningaka penemu ari lutur bukai.
Padahka baru utai ti disebut lutur sereta peresa ubat ke diempa
Pengudah betemu enggau lutur. Padahka ngagai pesakit utai ti disebut lutur. Nentuka iya makai ubat ke betul. Ngasuh iya makai ubat nitihka penyampau ke diasuh lutur sereta madah ngagai lutur enggau jampat enti ubat nya enda ngam. Asuh pesakit anang kelalu irau ati, lalu meransang iya nitihka utai bukai ke diasuh lutur, baka betemu baru enggau lutur. Nulung iya nemu mayuh agi pasal utai bukai ke bekaul enggau penyakit iya.
Ba Sepital
Nentuka semua pom diisi enggau betul
Anang kelalu irau sereta mengkang bejaga. Pesakit ke ngagai sepital engka irau ati sereta nadai daya. Enti nuan enda kelalu irau sereta mengkang bejaga, nuan ulih nulung orang enda kelalu irau sereta nyeliah ari ngaga pemutus ti salah. Nentuka pom ke dikena masuk sepital diisi enggau betul. Bebasaka hak pesakit ngaga pemutus pasal chara berubat. Enti iya kelalu balat sakit, bebasa meh ke utai ti dikedekaka iya baka ke udah ditulis iya, sereta titihka pemutus ari orang ke ngibun iya tauka ejensi ke nyaga iya. *
Bekunsi utai ke diperatika nuan enggau staf sepital
Ngepunka dulu. Anang takut bejaku. Chara bejaku ke bebasa sereta ulah ti manah ulih ngasuh staf sepital deka ibuh agi ke pesakit, lalu ulih mega ngasuh sida ngemanahka agi chara ngintu pesakit. Ba mayuh sepital, pesakit diperesa lutur ke enda sama. Nuan ulih nulung madah ngagai pesakit utai ke disebut sida lutur nya. Nuan ngelala pesakit nya, nya alai padahka sebarang utai ke bisi berubah ba tubuh tauka ba runding pesakit.
Gaga sebarang utai ke patut asalka enda ngachau
Ngayanka basa sereta terima kasih. Bala staf sepital enda senang bejalaika pengawa sida. Nya alai, kereja ngagai sida baka ke dikedekaka kitai kereja orang ngagai kitai. (Matthew 7:12) Mandangka diri beterima kasih ke latih, peneleba enggau pemendar sida ngereja pengawa. Arapka pengelandik sida. Tu ulih meransang sida bejalaika pengawa enggau naka ulih.
Nadai orang ulih nyeliahka diri ari sakit. Tang, enti nuan udah ngaga pansik dulu sereta meri tulung ke patut, nuan ulih nulung kawan tauka kaban belayan lebuh sida dituntung penusah maya sakit.—Jaku-Dalam 17:17.
^ per. 8 Undang-undang enggau pekara ke digaga bekaul enggau hak pesakit enda sebaka ba siti-siti endur. Nentuka dokumen pesakit ngembuan chara berubat ti dikedekaka iya diisi manah sereta seruran diaduka baru.
