Konvensyen pelilih menua 2020 nya maya ti besejarah. Konvensyen tu, konvensyen ti keterubah ke dirikut sereta dikeluarka nengah Internet! Tang, ba menua Malawi enggau Mozambique, mayuh bala menyadi meda konvensyen lalu enda begunaka Internet. Baka ni?

 Komiti Ngatur enggau Komiti Ngajar ba baruh jaga Raban ti Ngiring, ngemendarka program konvensyen dikeluarka nengah TV enggau radio ba Malawi sereta Mozambique. Nama kebuah program ke enda ngena Internet tu digaga? Rega data Internet ba Malawi entara rega ti pemadu mar ba dunya. Nya kebuah, semina mimit aja Saksi ke ulih ngena Internet. Baka ke udah diterangka William Chumbi, iya Komiti Pampang Opis ba Malawi, “Radio enggau TV meh chara kena nyalurka utai ke diguna ba pengarap ngagai bala menyadi.” Luka Sibeko, ke mega gawa ba begian Komiti Pampang Opis Malawi nambah: “Enti nadai TV enggau radio, engka semina mimit aja bala menyadi ba endur tu ke ulih meda konvensyen.” Pia mega, ba Mozambique, semina beberapa iku menyadi tebelika perengka elektronik, jauh agi bebelika Internet.

 Ketegal pandemik COVID-19, sekeda stesen radio enggau TV mandangka pengawa begempuru ba eklisia. a Bala menyadi ngiga semua stesen nya lalu minta ngambika program konvensyen mega ulih dikeluarka.

 Ba Malawi, bala menyadi bisi napi siti penanggul. Kesuah iya, jam alai mandangka sesiti program semina diberi sejam aja. Laban orang ke ba stesen nya irau, enggaika program ti kelalu panjai engka ulih ngasuh sida leju. Tang menyadi kitai nerangka, pengawa kitai nulung orang mayuh. Taja pan bisi sekat lebuh mindah, kitai agi ulih madah ngagai orang pasal Berita Manah ari Bup Kudus. Semua tu nulung orang nyadi rayat ti manah, sereta ngasaika pengelantang ba diri sebilik. Pengudah ninga penerang tu, semua stesen nerima utai ke dipinta bala menyadi ke deka ngemanjaika agi jam program nya dikeluarka.

 Ba Malawi, program konvensyen dikeluarka ari siti stesen radio enggau siti stesen TV. Kedua-dua stesen tu, bisi nyiarka berita ba serata menua, lalu ulih dipeda enggau didinga bejuta iku orang. Ba Mozambique, program konvensyen dikeluarka ari siti stesen TV, lalu 85 iti stesen radio.

 Ba kedua-dua menua, bisi $28,227 (tauka RM119,205.34) b udah dikena nyiarka nya ba stesen TV, lalu nyauka $20,000 (tauka RM84,462.58) dikena ba stesen radio. Ungkus kena nyiarka nya ba radio berengkah ari $15 (tauka RM63.34) ba stesen ti mit, lalu nyauka $2,777 (tauka RM11,727.99) dikena nyiarka program ba serata menua.

 Bala menyadi bebendar gawa ngena duit pemeri enggau chara ti manah. Chunto iya, ba Malawi, sida mujur ngulihka diskaun, nyengkaum 30 peratus ke siti diskaun. Nyadi sida ulih ngelimatka duit penyampau $1,711 (tauka RM7,225.81). Ba Mozambique, sekeda stesen sanggup ngurangka rega, laban nemu kitai endang orang ti lurus, sereta enda laun mayar ari ke ditetapka.

 Bala menyadi amat beterima kasih ke atur, meda enggau ninga program konvensyen nengah stesen TV enggau radio. Patrick, seiku tuai gempuru ari Malawi madah, “Kami beterima kasih ngagai Raban ti Ngiring ketegal semua utai ke udah digaga sida ke kami, sepemanjai pandemik tu.” Isaac mega ke ari Malawi nyebut, “Kami nadai perengka elektronik bukai, nyadi kami amat beterima kasih ke atur ti spesial ari gerempung Jehovah, lalu ulih ningaka program konvensyen nengah radio. Asil iya, semua diri sebilik aku bulih penguntung ari konvensyen tu. Kami ulih ngasaika bukti pengerindu Jehovah ngagai nembiak Iya.”

 Konvensyen 2020 nya, konvensyen keterubah ke seiku penginjil ba Mozambique. Iya madah, “Atur meda program konvensyen nengah TV ngingatka aku, Jehovah nya Petara ti pemadu bekuasa. Pandemik tu enda ulih nagang Iya ari meri kami utai ke diguna ba pengarap. Indah, kami bulih utai tu enggau senang ba rumah kami empu. Tu bukti pengerindu entara nembiak Jehovah. Aku pechaya, tu meh pengarap ti bendar.”

 Seiku tuai gempuru ke benama Wyson madah, “Aku deka madahka terima kasih ke chara ulun ke tetap ati nyaga kami sepemanjai pandemik tu. Taja pan mayuh entara kami orang ke seranta, atur ngeluarka program konvensyen nengah radio enggau TV udah nulung kami bulih penguntung.”

 Ba konvensyen pelilih menua 2021, Komiti Ngatur enggau Komiti Ngajar sekali da agi ngaga atur ti sama, ngambika program konvensyen dikeluarka nengah radio enggau TV ba sekeda endur. Baka ni kita ulih melanja ungkus tu? Nengah duit pemeri ke datai ari serata dunya, lalu mayuh ari nya diberi nengah donate.mt1130.com Terima kasih ke pemeri nuan ti gerah jari.