Ba dini-dini endur sigi bisi utai ke enda lurus nyadi. Peratika dua iti chunto ba baruh tu pasal pengawa ke enda lurus.

•   Kena Januari 2018, seiku akim ba Amerika Serikat meri perintah, seiku lelaki ke dijil pengelama 38 taun dilepaska. Pengudah pemutus DNA iya pansut, nya terang nunjukka iya enda besalah.

•   Kena September 1994, tiga iku nembiak lelaki ba Afrika dijil, ketegal sida enggai nyadi soldadu. Nyentukka September 2020, sida agi dijil pengelama 26 taun, lalu kes sida nadai kala dipechara enggau sah.

 Enti nuan kala digaga orang enggau enda lurus, nuan engka faham utai ke diasaika Jop, seiku lelaki ba jeman Bup Kudus. Iya madah, “Nadai orang ninga aku minta atur ti lurus.” (Jop 19:7) Taja pan kemayaharitu baka ke nadai pengelurus, tang dalam Bup Kudus bisi madahka semaya, jemah ila pengelurus deka ditegika. Indah diatu, lalau ari Bup Kudus nulung nuan mutarka utai ti enda lurus nyadi.

 Utai ke enda lurus nyadi ketegal mensia nulak iring ari Petara. Bup Kudus nunjukka, pengelurus ti bendar datai ari Petara. (Isaiah 51:4) Ba Bup Kudus, leka jaku “lurus” kesuah iya bisi kaul enggau ‘utai ti bendar.’ (Masmur 33:5) Enti seseiku orang ngereja utai ti bendar, tauka nitihka standard Petara, reti nya iya lurus. Tang, utai ke enda lurus nyadi ketegal dosa tauka ngelanggar adat Petara. Peratika sekeda chunto tu:

•   Berundingka diri empu. Penyumbung enggau dosa bisi kaul. (James 1:14, 15) Ketegal deka ngulihka pengingin diri, mayuh orang enda lurus enggau orang bukai. Tang, Petara ngajar kitai berundingka orang bukai.—1 Korint 10:24.

•   Kurang penemu. Bisi orang enda sedarka diri ngereja utai ti enda lurus ngagai orang bukai. Taja pia, pengawa nya tetap salah ba mata Petara. (Rome 10:3) Iya ke amat, siti kebuah utai ke enda lurus nyadi ketegal kurang penemu. Ketegal kurang penemu, Jesus Kristus diukum mati.—Surat Kereja Rasul 3:15, 17.

•   Gerempung mensia. Gerempung politik, pengawa dagang, sereta pengarap ba dunya tu ngaku diri ngemeratka pengelurus. Tang ke bendar iya, gerempung tu meh ke suah iya ngereja penyalah sereta makai suap. Sida meh ngepunka penyarut, pengamu, ekonomi ti enda stabil, sereta berundingka diri empu. Semua tu ulih ngujungka utai ti enda lurus nyadi. Amat, sekeda orang ke nyukung gerempung nya engka ngembuan tuju ti manah. Tang ujung iya, enda ngira naka ni mensia bebendar ngereja sesiti pengawa, enti nadai iring Petara sida sigi enda mujur.—Pengajar 8:9; Jeremiah 10:23.

 Au. Laban Iya amat begedika utai ti enda lurus, sereta sebarang pengawa ke ngujungka nya nyadi. (Jaku Dalam 6:16-18) Iya ngasuh Isaiah nulis jaku tu, ‘Aku [Jehovah] a, begedika pengawa ti nekanka pengidup orang, enggau kereja ti salah.’—Isaiah 61:8.

 Ari adat ke diberi Petara ngagai bansa Israel kelia nunjukka, Iya dekaka sida ngereja pengawa ti lurus. Petara nagang bala akim makai suap, tauka ngereja sebarang pengawa ti ngujungka utai ti enda lurus nyadi. (Ulang Adat 16:18-20) Iya amat begedika pengawa orang Israel ke ngambi ulih ari orang ke seranta. Tu ngujungka, Petara enda nerima sida agi laban sida enda ulih ngasika Iya, tauka nitihka standard Iya.—Isaiah 10:1-3.

 Au. Nengah Jesus Kristus, Petara deka nuchi dosa, ngetuka utai ti enda lurus, enggau ngasuh mensia nyadi sempurna baka keterubah. (John 1:29; Rome 6:23) Petara mega udah nirika Perintah, ti deka mai pengelurus ngagai semua orang, lalu ngasuh mensia idup ba dunya baru. (Isaiah 32:1; 2 Peter 3:13) Kena nemu mayuh agi pasal Perintah Petara ke ba serega tu, peda video Nama Reti Perintah Petara?

 Enti utai ti enda lurus nadai agi, dunya penuh enggau pemaik sereta likun. (Isaiah 32:16-18) Ba mata Petara, pengidup tiap iku orang nya berega, nyadi semua orang patut digaga enggau lurus. Indah, maya nya ila, semua pengingat kitai pasal utai ti enda lurus deka belubah-lubah lesap. (Isaiah 65:17; Pemandang 21:3, 4) Kena nemu mayuh agi, peda artikel “Nama Deka Digaga Perintah Petara?”

 Au. Semua utai ke ditulis dalam Bup Kudus patut dipechaya. Iya betul dalam semua sejarah sereta penemu. Jaku dalam Bup Kudus enda kala belaban enggau pangan diri. Tu ngasuh kitai andalka semua semaya ke ditulis dalam Bup Kudus. Kena nemu mayuh agi, peda meh artikel tauka video ba baruh tu:

•   Baka Ni Kitai Nemu Utai Ba Bup Kudus Nya Amat? (video)

•   “Utai ti Dipadahka ba Bup Kudus ke Udah Nyadi”

•   “Nubuatnya Selalu Tergenap” (Dalam Jaku Indonesia)

•   “Alasan untuk Mempercayai Alkitab” (Dalam Jaku Indonesia)

 Ba jeman Bup Kudus, orang ke manah pan bendar ngiga pengelurus. Chunto iya, Rasul Paul digaga enggau enda lurus, lalu ngujungka iya nyauka mati. Maya nya, iya enda diau diri aja, tang iya mai kes tu dipechara.—Surat Kereja Rasul 25:8-12.

 Tang, pengawa mensia ke enda lurus ba dunya tu enda ulih mujur. (Pengajar 1:15) Agi mayuh orang beberatka pengelurus taja pan sida digaga enggau enda lurus. Tu ketegal, sida arapka semaya Petara pasal dunya baru.