Clodean, seiku ari Saksi Jehovah ke diau ba Afrika Selatan, dianjung ngagai sepital kena beputung. Iya bisi mayuh penanggul ba pengerai lalu iya patut milih pemutus pasal chara berubat. Sebedau enggau pengudah beputung, iya berasai balat lelak, pedis sereta stress. Nyauka sepuluh minggu pengudah iya pulai ke rumah iya agi enda ulih bediri. Lalu ketegal pandemik COVID-19, iya enda ulih nerima temuai.

 Iya enggai berasai besalah pasal diri empu, lalu iya minta Petara meri iya pengering kena merindang ati orang bukai. Enda lama pengudah iya ulih bediri, iya berandau enggau seiku indu ke diau berimbai enggau iya ke kala belajarka Bup Kudus enggau Saksi. Clodean bekunsika utai ti meransang ari Bup Kudus enggau iya lalu tu meransang iya deka belajarka Bup Kudus baru. Clodean mega nerangka penguntung iya datai begempuru lalu ba maya ti sama, iya nentuka pemelajar iya ulih enggau pengawa begempuru nengah konferen video. Indu nya lalu datai ke gempuru sereta meri saut maya begian tanya saut.

 Clodean mega bejaku enggau madi indu nya ke bisi minat belajarka Bup Kudus. Iya madahka ngagai Clodean pasal orang bukai ke bisi minat mega. Nama asil iya? Clodean berengkah belajarka Bup Kudus enggau empat iku da agi indu. Tang, bisi mayuh utai ti manah agi nyadi!

 Ketegal Clodean ibuhka orang bukai, iya ulih berengkah belajarka Bup Kudus enggau sepuluh iku da agi indu—semua nya lebuh pandemik—penyampau iya 16 iku! Sekeda ari sida seruran datai ke gempuru nengah konferen video. Ketegal Clodean mengkang kisuk nulung orang bukai nemu pasal Jehovah, iya enda befokus ba penanggul iya empu. Iya mega ngasaika Jehovah nya Petara ti “pun semua pengelantang” ke udah nulung iya napi penanggul lalu tu meransang iya merindang orang bukai.—2 Korint 1:3, 4.

 Nama utai ke diasaika pemelajar Bup Kudus Clodean pasal utai ke dipelajar sida? Seiku ari sida madahka: “Aku bulih mayuh penguntung ba mayuh chara. Tang penguntung ti pemadu besai ba aku, iya nya belajarka nama Petara. Tu nulung aku semak ngagai Jehovah.” Indu ti keterubah berandau enggau Clodean ngarapka diri deka dibaptisa enda lama da agi. Peneleba tu udah meri mayuh pengaga ati ngagai Clodean lalu diatu iya udah amat gerai.