Saksi-Saksi Jehovah enda masuk champur ba politik laban kami nitihka ajar ari Bup Kudus. Kami enda bekimpin, ngundi, enda bediri ba politik, tauka bebendar deka ngubah politik. Kami pechaya ajar Bup Kudus ngembuan kebuah ti manah baka ba baruh.

•   Kami neladan Jesus ke enda masuk champur ba politik. (John 6:15) Iya ngajar murid iya, sida “ukai enggi dunya” lalu nerangka sida enda patut masuk champur ba politik.—John 17:14, 16; 18:36; Mark 12:13-17.

•   Kami tetap ati ngagai Perintah Petara ke dikerembaika Jesus. Iya madahka, ‘Berita Manah pasal Perintah Petara deka ditusui di serata dunya.’ (Matthew 24:14) Ketegal kami pengari ari Petara, kami diasuh ngerembaika berita pasal Perintah Petara tu. Nya kebuah, kami enda masuk champur ba politik.—2 Korint 5:20; Epesus 6:20.

•   Ketegal kami nadai masuk champur ba politik, kami ulih bejaku pasal Perintah Petara ngagai semua orang. Nengah jaku sereta ulah, kami nunjukka diri bepanggai ngagai Perintah Petara mutarka penanggul ba dunya.—Masmur 56:11.

•   Pia mega, laban nadai masuk champur ba politik, kami ulih beserakup enggau semua menyadi Kristian kami. (Kolosi 3:14; 1 Peter 2:17) Tang, pengarap ke bekaul enggau politik pedis deka beserakup enggau pangan diri.—1 Korint 1:10.

 Bebasaka perintah menua. Taja pan kami enda masuk champur ba politik, tang kami tetap bebasaka perintah menua. Bup Kudus madahka, “Awakka semua orang nunduk ngagai perintah ti megai menua.” (Rome 13:1) Kami nitihka atur undang-undang, mayar chukai, sereta bekerejasama enggau piak bekuasa ke nyaga pengelikun semua rayat. Kami enda nyakal perintah, tang kami ngasika pesan ari Bup Kudus ti nyebut sampi “ke raja enggau ke semua orang ke megai kuasa”, kelebih agi enti pemutus sida bisi kaul enggau pengelepas ba sembah.—1 Timoti 2:1, 2.

 Kami mega bebasaka hak orang bukai ngaga pemutus ke bekaul enggau politik. Ngambika chunto, kami enda ngachau pengawa orang ke bediri ba politik tauka enda nagang orang ngundi.

 Kati pengawa kami ke enda masuk champur ba politik tu penemu ti baru? Ukai. Bala rasul enggau murid Jesus ba abad keterubah mega enda enggau politik. Bup Beyond Good Intentions madahka, “Taja pan orang Kristian abad keterubah nemu diri patut bebasaka pemerintah, tang ukai reti iya sida patut masuk champur ba politik.” Bup On the Road to Civilization mega madahka orang Kristian kelia “enda nerima penuduk ba politik.”

 Kati enti kami enda masuk champur ba politik ulih ngachau pengelikun menua? Enda. Kami rinduka pemaik, nya kebuah perintah menua enda ibuh nangi pasal kami. Siti riput ari National Academy of Sciences ari Ukraine kena taun 2001 madah pasal kami, “Kemayaharitu sekeda orang engka enda rinduka Saksi-Saksi Jehovah ketegal sida enda masuk champur ba politik. Nya kebuah sida diperinsa maya Nazi enggau Komunis merintah.” Tang, ba baruh perintah Soviet, bala Saksi terus nyadi “rayat ke ngasika undang-undang. Sida enda nipu maya kereja sereta amat bagas maya sida gawa ba lading tauka kilang. Sida nadai kala ngemediska bala Komunis.” Indah kemayaharitu mega, pengarap Saksi-Saksi Jehovah enda kala “ngachau pengelikun menua.”