Saksi-Saksi Jehovah enda enggau beperang laban:

1.   Ngasika Petara. Bup Kudus madahka, nembiak Petara deka “nempa pedang sida nyadi pengeradu tanah” enggau “badu agi beperang.”—Isaiah 2:4.

2.   Ngasika Jesus. Jesus kala madahka rasul Peter, “Selitka pedang nuan. Semua orang ke ngena pedang deka mati laban pedang.” (Matthew 26:52) Nya alai, Jesus enggai murid iya enggau pengawa beperang.

    Bala murid Jesus ngasika pesan Jesus, iya nya “ukai enggi dunya,” lalu enda masuk champur dalam semua utai ke bekaul enggau politik. (John 17:16) Sida enda nyakal pengawa soldadu tauka masuk champur pengawa orang bukai ke milih deka enggau pengawa soldadu.

3.   Rinduka pangan diri. Jesus mesan bala murid iya, “rinduka pangan diri.” (John 13:34, 35) Nya kebuah, sida beserakup enggau pangan diri ba serata dunya, lalu enda beperang ngelaban menyadi Kristian sida.—1 John 3:10-12.

4.   Neladan orang Kristian kelia. Bup Encyclopedia of Religion and War madahka, “Saksi-Saksi Jehovah kelia enggai enggau pengawa beperang tauka nyadi soldadu,” laban sida nemu pengawa tu “enda sejalai enggau pengerindu ke diajar Jesus sereta pesan iya pasal rinduka munsuh.” Seiku pakar teologi ari Jerman ke benama Peter Meinhold mega madahka, “Seiku orang Kristian ke nyadi soldadu dikumbai ngereja siti utai ke enda ulih diterima.”

 Saksi-Saksi Jehovah siti gerempung ti betanggungjawap. Kami nadai ngachau pengelikun menua, lalu kami nitihka atur pemerintah. Tu sejalai enggau prinsip Bup Kudus ke madahka:

•   “Awakka semua orang nunduk ngagai perintah ti megai menua.”—Rome 13:1.

•   ‘Utai Raja Besai, beri ngagai Raja Besai, utai Petara, beri ngagai Petara.’—Matthew 22:21.

 Nambahka nya, kami nitihka undang-undang, mayar chukai, enggau bekerejasama enggau pemerintah ngambika bisi pemaik enggau semua orang.