Semina sida ti ransing nusui berita manah pasal Perintah Petara ninting bulan nya dikumbai Saksi-Saksi Jehovah. (Matthew 24:14) Tu nyengkaum sida ti udah dibaptisa nyadi seiku ari Saksi-Saksi Jehovah, pia mega sida ti bedau dibaptisa tang udah enggau ba pengawa nginjil.

 Nadai. Tu siti peluang ti amat istimewa dalam gerempung kami, nadai kaul enggau pemeri ke diberi. (Kereja Rasul 8:18-20) Iya ke amat, mayuh ari nama orang ke meri nya enda ditemu. Tiap iku Saksi-Saksi Jehovah gaga ati meri awak, pengering, enggau pemisi, kena nyukung pengawa kami ba serata dunya nitihka utai ti ulih dikereja seseiku orang.​—2 Korint 9:7.

 Ninting bulan, semua Saksi meri riput nginjil sida ngagai raban gempuru ba endur nya empu. Sida ngereja nya enggau sukarela.

 Semua riput ari raban gempuru nya deka diintung lalu penyampau nya deka dianjung ngagai pampang opis ke semak endur nya. Udah nya, pampang opis nganjung penyampau semua Saksi ngarika menua tauka endur nya ngagai indu opis.

 Ba ujung taun riput nginjil a, penyampau ti pemadu mayuh Saksi ngarika tiap iti menua tauka endur ulih ditemu. Udah nya, semua penyampau nya ditambah enggau tiap iti menua bukai ba serata dunya. Riput ti silik ari tiap iti menua deka ditepu dalam laman web kami ba begian “Ba Serata Dunya.“ Semua riput tu meransang kami, baka orang Kristian abad kesatu ti diperansang lebuh ninga pasal riput ke baka tu.​—Kereja Rasul 2:41; 4:4; 15:3.

 Taja pan sida ukai Saksi, tang sida dikenaluka ngagai gempuru. Mayuh ari sida datai Ngingatka Pemati Jesus ninting taun. Penyampau sida ulih dipeda ari bida penyampau semua ke datai maya nya sereta enggau bala Saksi. Ba taun 2023, orang ke datai ngagai malam Ngingatka Pemati Jesus nya 20,461,767 iku.

 Bisi sekeda nya bedau datai begempuru tang sida agi bulih penguntung ari belajarka Bup Kudus engga pechuma. Ba taun 2023, urung 7,281,212 iku pemelajar Bup Kudus digaga tiap bulan. Tiap iti pemelajar nya engka enggau seiku tauka lebih.

 Perintah deka ngaga siti banci pasal pengarap enggau chara nanya sida nama pengarap ke dititihka sida. Chunto, U.S. Census Bureau (Biro Pembancian A.S.) bejalaika pansik kena nemu “sekalika orang ti dibanci nya nitihka sesiti pengarap tauka enda.” Biro nya madahka, “asil ari pansik nya, kemayuh agi ari sida mina ngumbai diri bisi pengarap tang ukai amat-amat nitihka pengarap nya.” Kami enda ngira semua orang ke ngaku diri empu Saksi-Saksi Jehovah. Kami mina ngira sapa ke enggau pengawa nginjil sereta meri riput nginjil sida.