IKPƐYI ƐLĀ Ō KLƆCƐ ƆMƐ 10
Ō Yihɔtu Ku Ujehofa Géē Ya Ku A Ya Ubatisim
“Ɔdí géē ci ubatísim ō yá um mɛ́ ā?”—ĀCOT. 8:36.
IJÉ ƆMƐ 37 Serving Jehovah Whole-Souled
ƆDĀ NƐ ALƆ GÁĀ NWU A *
1-2. Ɛgɛ nɛ ɔkpá ku Úklɔ́ kú Ācotɛ̄hɔ̄ 8:27-31, 35-38 mafu a, ɔdi lɛ abɔ kwu ɔcɛ Itiyopiya éyi ɔtu kóō ya ubatisim a?
A DƆKA ō ya ubatisim, o ya ɛɛ ku a je piya Ɔcɛ O Yɛce Ukraist nɛɛ? Ācɛ alɛwa gē ya ubatisim, ohigbu ihɔtu néē lɛ lɛ Ujehofa mla ɛgɛ nɛ aɔdā nɛ Ujehofa ya lɛ uwa a jɛ uwa eyī lɛ a. Alɔ leyi yɛ ocabɔ ku igabɔ éyi nōo gē yuklɔ lɛ ɔcánya ku Itiyopiya a ka a.
2 Ɔcɛ Itiyopiya a lɛ ubatisim ya boobu nōó gáā le nwu ka ó cika ō ya lɛ a. (Jé Úklɔ́ kú Ācotɛ̄hɔ̄ 8:27-31, 35-38.) Ɔdi lɛ abɔ kwu ɔ ɔtu a? Ɛlā nɛ ó nwu ŋma ɛlā Ɔwɔico a jɛ ɔ eyī nɛhi, ohigbu ka ó yɔ i jé ɛga éyi ŋma ipu ɔkpá ku Ayisáya abɔ ó cice ipu ugbɔnya a. Eko nɛ Ufilipu gbɔɔ ō kɛla lɛ adā a, ɔdā nɛ Ujisɔsi ya lɛ adā a gbɔɔ ō jɛ ɔ ēyi nɛɛnɛhi. Ɔcɛ Itiyopiya nyā kē yihɔtu ku Ujehofa nɛɛnɛhi. Ɛgɛnyá nɛ alɔ bi le jé a? Ohigbu ka ó nyɔ gā Ujerusalɛm ɔɔma kóō gáā gba Ujehofa ɛ̄gbā. Ɛnyā mafu ku adā nyā habɔ ɔwɛ nōó humayi gba ɛ̄gbā ŋmiifi néē ma ɔ a ta, anu ō gáā wɛ ipu ɔwɛ ō gba ɛ̄gbā ku éwo foofunu nōo je iyi uwa gwɛɛya ō gba ɔwɔ ɔkwɛyi ɛ̄gbā a. Ihɔtu ō lɛ lɛ Ujehofa klla wɛ ɔdā okpɔcii nōo lɛ abɔ kwu adā nyā ɔtu kóō miya ɔdā ō cɛgbá nɛhi ɔhá a. Ó lɛ ubatisim ya klla gáā je piya Ɔcɛ O Yɛce Ukraist.—Umát. 28:19.
3. Ɔdi lɔfu ci ɔcɛ ŋma ō ya ubatisim a? (Má ikpati nōo kahinii: “ Ɔdi Yɔ Ipu Ɔtu Ku Uwɔ A?”)
3 Ihɔtu ō lɛ lɛ Ujehofa lɔfu lɛ abɔ kwu uwɔ ɔtu ku a ya ubatisim. Amáŋ, ihɔtu ō lɛ nɛɛnɛhi lɔfu ci alɔ ŋma ō ya ubatisim. Ɛgɛnyá a? Leyi yɛ aocabɔ mafu nyā ɛ. A lɔfu lɛ ihɔtu nɛɛnɛhi lɛ ācɛ apɔlɛ ku uwɔ nōó gē gba Ujehofa ɛ̄gbā ŋ, amāŋ aoklobiya mɛmla ancɛnya uwɔ. Ihɔtu ɛgɛnyā lɔfu ya ku a gbɔɔ ō yuufi ka é géē gbɔɔ ō wɔtu uwɔ ɔdaŋ ku a lɛ ubatisim ya. (Umát. 10:37) Amāŋ, ó lɔfu lɛ uce ōhī nɛ a gē dɔka ō ya, nɛ a kē jé ku Ujehofa i dɔka ŋ. Ó lɔfu lɔnɔ ta uwɔ ō habɔ uce ō ya ɛgɔɔma ta. (Aíjē 97:10) Amāŋ, eko nɛ a yɔ i jɛ a, a yɔ i yɛce apɔlɛ ku uwɔ gē ya uculo ōhī nōo tɛɛma kwu ɛ̄gbā ō gba ku ɛkɛmgbɛ. A lɔfu dɔka ɛdɔ ɛlá olɔhi nōo gē wa ipu ɔtu ku uwɔ, eko duuma nɛ a gē gbɛla lɛyikwu eko nɛ a gē ya auculo nyā a. Ohigbu ɛnyā a, ó lɔfu lɔnɔ ta uwɔ ō habɔ auculo nɛ Ujehofa i dɔka ŋ ma ta. (1 Ukɔ́r. 10:20, 21) Ɔka nɛ ɛnyā lɔfu bi wa ipu ɔtu ku uwɔ a wɛ kahinii: “Ɔdi amāŋ ɔnyɛ nɛ um yihɔtu fiyɛ duu a?”
ƆCƐ NƐ ALƆ CIKA Ō YIHƆTU NU FIYƐ DUU A
4. Ɔdi wɛ ɔdā ō kpɔcii nōo cika ō lɛ abɔ kwu uwɔ ɔtu ku a ya ubatisim a?
4 Gbɔbu ɛɛ ku a gbɔɔ ō klɔcɛ mla Ācɛ Ocijali Ku Ujehofa a, ó lɔfu wɛ ku a gē lɛ ojilima cɛ aɛlā nōo yɔ ipu Ubáyíbu a nɛɛnɛhi. A kē lɔfu yihɔtu ku Ujisɔsi duu. Babanya nɛ a gáā lɛ Ācɛ Ocijali Ku Ujehofa jé ɛ ma, ó lɔfu gē ŋmo uwɔ unwu ō yɔ mla uwa eko doodu. Ó lɛ aafu ŋ, a dɔka aɔdā olɔhi nyā, é klla jɛ uwɔ eyī nɛhi. Amáŋ, ō dɔka aɔdā olɔhi nyā foofunu, i gáā lɔfu ya ku a dɔka ō lɛ oyeeyi ku uwɔ gwɛɛya lɛ Ujehofa klla ya ubatisim ŋ. Ɔdā ō kpɔcii nōo cika ō lɛ abɔ kwu uwɔ ɔtu ō ya ubatisim a, wɛ ihɔtu ō lɛ lɛ Ujehofa nɛ. Ɔdaŋ ku a yihɔtu ku Ujehofa fiyɛ ɔdā ɔhā duuma, a gáā cɛ lɛ ɔdā duuma kóō ci uwɔ ŋma ō gba Ujehofa ɛ̄gbā ŋ. Ihɔtu ō lɛ lɛ Ujehofa géē lɛ abɔ kwu uwɔ ɔtu ku a ya ubatisim. Ó klla géē ta uwɔ abɔ ku a hayi kpaakpa ɔdaŋ ku a lɛ ubatisim ya.
5. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
5 Ujisɔsi ka ka alɔ cika ō yihɔtu ku Ujehofa mla ɛjɛɛji ɔtu, odo, ɛlá nɛ alɔ gē gbo mɛmla ɛjɛɛji ɔfu ku alɔ. (Umák. 12:30) Ɛgɛnyá nɛ a gáā ya ku a yihɔtu ku Ujehofa, klla lɛ ojilima nɛhi ɛgɛnyā ce ɔ a? Ɔdaŋ ku alɔ gē gbɛla tu ɛgɛ nɛ Ujehofa yihɔtu alɔ lɛ a, ó géē ta alɔ abɔ ku alɔ yihɔtu nu cigbihi. (1 Ujɔ́n. 4:19) Ipu ikpɛyi ɛlā nyā, alɔ géē kɛla lɛyikwu aɔdā ɛyɛɛyɛyi nōo géē ta uwɔ abɔ ku a yihɔtu ku Ujehofa klla ya ubatisim. Alɔ klla géē kɛla lɛyikwu ɛlá ō gbo mla uce ō ya ɔhá nɛ a géē lɛ, ɔdaŋ ku a gáā lɛ ihɔtu ō cɛgbá nɛhi ɛgɛnyā lɛ lɛ Ujehofa. *
6. Oŋma ɛlā nōo yɔ ipu ɔkpá ku Ācɛ Uróm 1:20 a, ɔdi wɛ ɔwɛ éyi nɛ alɔ lɔfu nwu ɛlā lɛyikwu Ujehofa a?
6 Nwu ɛlā lɛyikwu Ujehofa ō bi ipu aɔdā nɛ ó ya a. (Ācɛ Uróm 1:20; Mafú 4:11) Gbɛla tu aɔcí mɛmla aɛ́bɛ nɛ Ujehofa ya a, mla ɛgɛ néē mafu ka ó jijeeyi nɛɛnɛhi a. Nwu ɔdā ōhī lɛyikwu ɔwɛ ohidago nɛ Ujehofa ya ɔkpiye ku uwɔ a. (Aíjē 139:14) Gbɛla tu ɛdɔ ɔfu nɛ Ujehofa kpo ta ipu ɛnɔ a. Ɛnɔ a kē wɛ éyi foofunu ŋma ipu ubiliyɔn ku ainyinlɔwɔ nɛ Ujehofa ya a. * (Ayis. 40:26) Ɔdaŋ ku a gē gbɛla tu aɔdā nɛ Ujehofa ya, ó géē ya ku a lɛ ojilima ce ɔ nwune fiyɛ. Ō jé ka Ujehofa jijeeyi klla lɔfu nɛɛnɛhi cɛgbá i bi o. Amáŋ, ɔdaŋ ku alɔ dɔka ku ihɔtu nɛ alɔ lɛ lɛ Ujehofa a kóō lɔfu, nɛ alɔ klla dɔka ō wɛ ɔya ku nu, alɔ cika ō jé ɔdā alɛwa lɛyikwu Ujehofa kpɔ.
7. Ɔdi nɛ a cika ō kpɔtuce ɔ, o ya ɛɛ ku a yihɔtu ku Ujehofa nɛɛnɛhi a?
7 A cika ō kpɔtuce lɔfu lɔfu ka Ujehofa yihɔtu uwɔ nɛɛnɛhi. Amáŋ, ó gē lɔnɔ ta uwɔ ō kpɔtuce ku Ujehofa nōo ya ɔkpanco mla ɛcɛ a, jé ku a yɔ klla lɛ ɛlá wu uwɔ? Ɔdaŋ ku a gē gbɛla lɛ a, bla ku Ujehofa “í kē yɔ̄ ligbó lɛ ɔ̄cɛ dúúmā kú alɔ ŋ́.” (Ācot. 17:26-28) Ujehofa “jé odúúdú ɛlá nɛ̄ a ī gbo ā mɛ́mla ɔdā nɛ̄ a tíne ō yá ā,” ó klla cokonu gā uwɔ, ka “ɔ́dāŋ ka a le tá ɛgiyí nū, ó géē mīyɛ awɔ.” (1 Úklɔ́ 28:9.) Ó lɛ aafu ŋ, ɔdā nōo ya nɛ a yɔ i ya oklɔcɛ ku Ubáyíbu babanya a, wɛ ohigbu ɔdā nɛ Ujehofa ka a nɛ, eko nɛ ó kahinii: “N húmáyī ma ihɔtū fú lɛ aá eko dóódu.” (Ujɛr. 31:3) Abɔ a yɔ i jé ɛjɛɛji aɔdā nɛ Ujehofa ya gā uwɔ a, ɛgɔɔma nɛ ihɔtu nɛ a lɛ lɛ ɔ a géē yɔ i lɔfu tōōtɔ̄ɔ̄ a.
8. Ɔwɛ nyá nɛ a lɔfu mafu ku ihɔtu ku Ujehofa jɛ uwɔ eyī a?
8 Ɔwɛ éyi nɛ alɔ lɔfu mafu ku ihɔtu ku Ujehofa jɛ alɔ eyī a, wɛ ō kɛla lɛ ɔ ipu ɔkɔ ō gba nɛ. Ihɔtu nɛ a lɛ lɛ Ɔwɔico a géē yɔ i lɔfu tōōtɔ̄ɔ̄, ɔdaŋ ku a gē da Ujehofa ɔdā nōo wɛ unwalu ku uwɔ, nɛ a klla gē ta ɔ ahinya ku aɔdā nɛ ó gē ya gā uwɔ a. Ɛma ku uwɔ mla Ujehofa klla géē yɔ i lɔfu tōōtɔ̄ɔ̄, abɔ a géē yɔ i má ɛgɛ nɛ ó gē cila ɔkɔ ō gba ku uwɔ a. (Aíjē 116:1) Ɛnyā géē ya ku a kpɔtuce lɔfu lɔfu ka ó jé uwɔ lɔɔlɔhi. Amáŋ, o ya ɛɛ ku a tubla Ujehofa ajaajɛ a, a cika ō jé ɔdā nōo ya ɛɛ nɛ ó dɔka aɔdā ōhī, ɔdā nōo ya nɛ aɔdā ōhī i he ɔ ɔtu ŋ mla ɔwɛ nɛ ó gē ya aɔdā ōhī lɛ a. A kē cika ō jé ɔdā nɛ ó dɔka ŋma ɛgiyi uwɔ a duu. Amáŋ ɔwɛ ofoofunu nɛ a géē jé ɛnyā gla a wɛ ō yɔ i ya oklɔcɛ ku Ɛlā ku nu nōo wɛ Ubáyíbu a nɛ.
Ɔwɛ ō lɔhi fiyɛ duu nɛ alɔ lɔfu tubla Ɔwɔico klla jé ɔdā nɛ ó dɔka ŋma ɛgiyi alɔ a, wɛ o yɔ i ya oklɔcɛ ku Ubáyíbu nɛ (Má ogwotu ɔmɛ 9) *
9. Ɛgɛnyá nɛ a lɔfu mafu ku ɛlā nōo yɔ ipu Ubáyíbu jɛ uwɔ eyī a?
9 Nwu ɛgɛ nɛ a géē ya ku ɛlā ku Ɔwɔico nōo wɛ Ubáyíbu a kóō jɛ uwɔ eyī. Ipu Ubáyíbu foofunu nɛ a gáā lɔfu má ɔkwɛyi lɛyikwu Ujehofa, mla ɔdā nɛ ó miya lɛyikwu uwɔ a. A géē mafu ku aɛlā nōo yɔ ipu Ubáyíbu a jɛ uwɔ eyī, ɔdaŋ ku a gē jé Ubáyíbu ɛ̄cī doodu, gē ya otutu gbɔbu ɛɛ kéē wa i ya oklɔcɛ ku Ubáyíbu mɛmla uwɔ, mɛmla ō bi aɛlā nɛ a gē nwu a le yuklɔ. (Aíjē 119:97, 99; Ujɔ́n. 17:17) A lɛ ōmiya ku ɛgɛ nɛ a géē bēē jé Ubáyíbu ɛ̄cī doodu? A gē yɛce ōmiya ɔɔma a?
10. Ɔdi wɛ ɔdā ɛnɛɛnɛ éyi nōo yɔ ipu Ubáyíbu a?
10 Ɔdā ɛnɛɛnɛ éyi nōo yɔ ipu Ubáyíbu a wɛ ɛlā ku ācɛ nōo má ɔdā nɛ Ujisɔsi ya néē ta ipu nu a nɛ. Ubáyíbu foofunu wɛ ɔkpá nōo mafu aɔdā nɛ Ujisɔsi ya ɔkwɔɔkwɛyi a. Ɔdaŋ ku a gē nwu ɛlā lɛyikwu aɔdā nɛ Ujisɔsi ka mla aɔdā nɛ ó ya a, ó géē ya ku a dɔka ō lɛ ɛma mɛmla ɔ.
11. Ɔdi gáā ta uwɔ abɔ ku a yihɔtu ku Ujehofa a?
11 Nwu ɛgɛ nɛ a géē yihɔtu ku Ujisɔsi, ó géē ya ku ihɔtu nɛ a lɛ lɛ Ujehofa a kóō lɔfu fiyɛ. Ɔdiya a? Ohigbu ku Ujisɔsi wɛ ɛgbla ku Adā nu yiili. (Ujɔ́n. 14:9) Ó lɛ a, abɔ a yɔ i gbɔbu ipu ɛlā ō nwu ku uwɔ lɛyikwu Ujisɔsi a, ɛgɔɔma nɛ aɛlā lɛyikwu Ujehofa gáā bēē jɛ uwɔ eyī fiyɛ a. Gbɛla kwu ɛgɛ nɛ Ujisɔsi menyinyi ācɛ nɛ ācɛ ɔhá gē leyi gwo uwa bonu, ohigbu kē wɛ aogbɛha, ācɛ ō doōcē mɛmla ācɛ nōó lɔfu iyē ŋ ma. Gbɛla lɛyikwu aukɔ́ nɛ Ujisɔsi gē tu alɔ nōo lɔfu ta alɔ abɔ ɛ̄cī doodu a, mla ɛgɛ nɛ oyeeyi ku uwɔ lɔfu lɔhi fiyɛ, ɔdaŋ ku a gē bi aukɔ́ a le yuklɔ.—Umát 5:1-11; 7:24-27.
12. Ɔdi nōo nwu ɛlā lɛyikwu Ujisɔsi géē lɛ abɔ kwu uwɔ ɔtu ku a ya a?
12 Ihɔtu nɛ a lɛ lɛ Ujisɔsi a géē wa i lɔfu nɛɛnɛhi, ɔdaŋ ku a gē gbɛla lipu lipu lɛyikwu ikwū nɛ Ujisɔsi kwū, o ya ɛɛ ku Ɔwɔico kóō je oyabiya ku alɔ ya alɔ ɛhi a. (Umát 20:28.) Eko duuma nɛ a gáā jé ka Ujisɔsi cɛ ō gáā kwū ohigbu uwɔ, ó géē lɛ abɔ kwu uwɔ ɔtu ku a piyabɔ ŋma oyabiya ku uwɔ, klla gbɔɔkɔ lɛ Ujehofa kóō kwu ya uwɔ ɛhi. (Ācot. 3:19, 20; 1 Ujɔ́n. 1:9) Abɔ ihɔtu nɛ a lɛ lɛ Ujisɔsi mla Ujehofa a yɔ i lɔfu tōōtɔ̄ɔ̄ a, ɛgɔɔma nɛ a géē dɔka ō tubla ācɛ nōo yihɔtu uwa duu a.
13. Otabɔ nyá nɛ Ujehofa gáā je gā uwɔ a?
13 Nwu ɛgɛ nɛ a géē yihɔtu ācɛ nōo yihɔtu ku Ujehofa a. Ācɛ apɔlɛ ku uwɔ nōó wɛ ācɛ ō gba Ujehofa ɛ̄gbā ŋ ma, mla aoklobiya mɛmla ancɛnya uwɔ tɛtɛ a, i gáā jé ɔdā nōo ya ɛɛ nɛ a dɔka ō je oyeeyi ku uwɔ gwɛɛya lɛ Ujehofa a ŋ. É lɔfu gbɔɔ ō miya uwɔ owe amāŋ ya uwɔ ŋmo. Amáŋ Ujehofa géē ta uwɔ abɔ ŋma lɛ o ya ku ayinɛ nōo yɔ ipu ujɔ a kéē lɛbɛɛka apɔlɛ ku uwɔ a. Ɔdaŋ ku a yɔ kwu apɔlɛ ɔɔma ajaajɛ, é géē mafu ihɔtu klla je otabɔ nɛ a cɛgbá a gā uwɔ. (Umák. 10:29, 30; Uhíb. 10:24, 25) Á jé ŋ, igbihaajɛ apɔlɛ ku uwɔ géē gbɔɔ ō gba Ujehofa ɛ̄gbā, klla tɛyi waajɛ lɛ aíne ku nu.—1 Upít. 2:12.
14. Ɛgɛ nɛ ɔkpá ku 1 Ujɔ́ni 5:3 ka a, ɔdi nɛ a gáā má lɛyikwu aíne amāŋ aukɔ́ ku Ujehofa ɛ ma?
14 Nwu ɛgɛ nɛ a géē lɛ ojilima ce aíne ku Ujehofa klla bi uwa le yuklɔ. Gbɔbu ɛɛ ku a wa i jé Ujehofa a, a gē miya ɔdā nōo wɛ ɔdā ō kpaakpa mɛmla ɔdobɔbi a abɔyi uwɔ a. Amáŋ babanya a, a gáā le má ku ɛ̄nɛ̄ Ujehofa miya a lɔhi fiyɛ a. (Aíjē 1:1-3; Jé 1 Ujɔ́ni 5:3.) Gbɛla tu aukɔ́ nɛ Ubáyíbu tu aɔba, aɔnyā, adā mla ɛ́nɛ́ mɛmla ayipɛ a. (Āfi. 5:22–6:4) Abɔ a yɔ i bi aukɔ́ a le yuklɔ a, a yɔ i má ka oyeeyi ku apɔlɛ ku uwɔ yɔ i lɔhi fiyɛ? Abɔ a yɔ i bi aukɔ́ ku Ujehofa, lɛyikwu ɛdɔ ācɛ nōo cika ō wɛ oklobiya uwɔ mɛmla ancɛnya uwɔ le yuklɔ a, a yɔ i má ku uce ō ya ku uwɔ yɔ i lɔhi fiyɛ? A gē lɛ eeye fiyɛ otɛtɛ?—Aíit. 13:20; 1 Ukɔ́r. 15:33.
15. Ɔdi nɛ a lɔfu ya, ɔdaŋ ku a má ka ó gē lɔnɔ ta uwɔ ō jé ɛgɛ nɛ a géē bi aukɔ́ ku Ubáyíbu le yuklɔ a?
15 Ekoohi ó lɔfu lɔnɔ ta uwɔ ō jé ɛgɛ nɛ a géē bi aukɔ́ ku Ubáyíbu le yuklɔ. Ɛnyā ya ɛɛ nɛ Ujehofa gē bi ɔwa ku nu le yuklɔ a. Ɔwa a gē ya aɔkpá nōo gē je aɛlā ku Ubáyíbu teyī peee, nōo klla géē ta uwɔ abɔ ku a lɔfu jé ɛyɛɛyɛyi ku ɔdā olɔhi mɛmla aɔdobɔbi. (Uhíb. 5:13, 14) Ɔdaŋ ku a gē jé aɔkpá nōo ba nyā klla gē klɔcɛ ku nu, a géē wa i má ɛgɛ nōó géē ta uwɔ abɔ lɛ a. Ɛnyā kē i ya ku a dɔka ō wɛ ipu ɔwa ku Ujehofa a.
16. Ɛgɛnyá nɛ Ujehofa gē leyi kwu ɔwa ku nu a?
16 Nwu ɛgɛ nɛ a géē dɔka ɔwa ku Ujehofa klla je otabɔ lɛ ɔwa a. Ujehofa lɛ ācɛ ɔlɛ nu kɔ ta ipu ujɔ ɛyɛɛyɛyi, Ɔyi nu Ujisɔsi kē wɛ otrɛyi ku ɛjɛɛji uwa a. (Āfi. 1:22; 5:23) Ujisɔsi lɛ ígwu ligii ku ācɛ néē lɛ anɔ tu uwa ɛyi a fu, kéē bēē leyi kwu uklɔ nɛ ó dɔka ku alɔ ya icɛ a. Ujisɔsi hi ígwu ku ācɛ nōo ba nyā ka “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī.” É lɛ uklɔ ō ta uwɔ abɔ ku a tubla Ujehofa ajaajɛ, mɛmla ō gbo uwɔ ŋma ɛgiyi ɔdā duuma nōo lɔfu biya ɛma ku uwɔ mla Ujehofa a. É kē i bi uklɔ nyā le hija ŋ. (Umát. 24:45-47) Ɔwɛ éyi nɛ ɔcocɛhɔ néē cika ō lɛ ɔtuce ɔ a gē leyi kwu uwɔ a, wɛ ō fu acɛnyilɔ nōo cika jɛ kéē wɛ anyakwɔcɛ ku ujɔ. Anyakwɔcɛ ku ujɔ nyā lɔfu bi uwɔ jé ɔwɛ klla gbo uwɔ. (Ayis. 32:1, 2; Uhíb. 13:17; 1 Upít. 5:2, 3) É le tutu ō ya ɔdā duuma néē ya gla, o ya ɛɛ kéē ta uwɔ ɔtule, klla ta uwɔ abɔ ku a tubla Ujehofa ajaajɛ fiyɛ. Amáŋ, ɔdā ō cɛgbá fiyɛ duu néē lɔfu ya gā uwɔ a, wɛ ō ta uwɔ abɔ ku a nwu ācɛ ɔhá ɛlā lɛyikwu Ujehofa nɛ.—Āfi. 4:11-13.
17. Oŋma ɛlā nōo yɔ ipu ɔkpá ku Ācɛ Uróm 10:10, 13, 14 a, ɔdiya nɛ alɔ gē da ācɛ ɔhá lɛyikwu Ujehofa a?
17 Ta ācɛ ɔhá abɔ kéē wa i yihɔtu ku Ujehofa. Ujisɔsi da ayikpo ku nu kéē nwu ācɛ ɔhá ɛlā lɛyikwu Ujehofa. (Umát. 28:19, 20) Alɔ lɔfu yɛce ɔ́da ɔɔma ohigbu ku alɔ jé ku alɔ cika ō yɛce ɔ. Amáŋ, ɔdaŋ ka ihɔtu nɛ a lɛ lɛ Ujehofa a gbɔɔ ō lɔfu, ɔtu géē gbɔɔ ō ya uwɔ ɛgɛ nōó ya ɔcocɛhɔ Upita mɛmla Ujɔni eko néē kahinii: “Alɔ abɔ̄ alɔ í lɔfú habɔ̄ ō yɔ̄ ī kɛlā kú ɔdā nɛ̄ alɔ abɔ̄yi alɔ má ā klla pó ā tá glá ŋ́.” (Ācot. 4:20) Ó lɛ ɔdā duuma nōo gē bi eeye gē lɛ ɔcɛ bɛɛka ō ta ɔcɛ abɔ kóō wa i yihɔtu ku Ujehofa ŋ. Gbɛla kwu ɛdɔ eeye nɛ Ufilipu gwo a, abɔ ō ta ɔcɛ Itiyopiya ɔɔma abɔ kóō gáā jé ɔkwɛyi nōo yɔ ipu Ɔkpiihɔ a, klla gáā lɛ ubatisim ya a! Ɔdaŋ ku a gē gbla Ufilipu ya, klla gē yɛce ɔ́da ku Ujisɔsi ō yɔ i tɔɔna, a géē yɔ i mafu ku a dɔka ō wɛ Ɔcɛ Ocijali Ku Ujehofa. (Jé Ācɛ Uróm 10:10, 13, 14.) Ɛpleeko ɔɔma, a géē da ɔka ekponu nɛ ɔcɛ Itiyopiya ɔɔma da a: “Ɔdí géē ci ubatísim ō yá um mɛ́ ā?”—Ācot. 8:36.
18. Ɔdi nɛ alɔ gáā kɛla lɛyikwu ɔ ipu ikpɛyi ɛlā nōo gboce ɛnyā a?
18 Ō cɛ ku a géē ya ubatisim, wɛ ɔdā ō cɛgbá fiyɛ duu nɛ a lɔfu miya ipu oyeeyi ku uwɔ a. Ubatisim i wɛ ɔdā nɛ alɔ cika ō bi le hija ŋ. Ohigbu ɔɔma a, a cika ō gbɛla tu ɔ lɔɔlɔhi ku a jé ɔdā nōo wɛ ɛyi nu a. Ɔdi nɛ a cika ō jé lɛyikwu ubatisim a? Ɔdi nɛ a cika ō ya gbɔbu ɛɛ ku a ya ubatisim mla igbihi nɛ a lɛ ubatisim ya a? Alɔ géē cila aɔka nyā ipu ikpɛyi ɛlā nōo gboce ɛnyā a.
IJÉ ƆMƐ 2 Ujehofa Wɛ Iye Ku Uwɔ A
^ par. 5 Ācɛ ōhī nōo yihɔtu ku Ujehofa i jé kpɔcii ɔdáŋ kē le tutu ō ya ubatisim, klla je piya Ɔcɛ Ocijali ku Ujehofa ɛ ŋ. Ɔdaŋ ku a gē gbɛla lɛ a, oklɔcɛ nyā géē ta uwɔ abɔ ku a gbɛla kpɔ, lɛyikwu aɔdā ōhī nɛ a lɔfu ya, nōo géē ta uwɔ abɔ ku a ya ubatisim a.
^ par. 5 Ācɛ wɛ ɛyɛɛyɛyi, ācɛ ōhī lɔfu bi ɛlā néē ka ipu ikpɛyi ɛlā nyā le yuklɔ ɔwɛ ɔhá gwo ɛgɛ néē cɔci ku nu eyeeye amanya.
^ par. 6 Ɔdaŋ ku a dɔka ō má aocabɔ mafu ɔhá, má ubrociɔ ɛpa nyā nōo kahinii: Was Life Created? mɛmla The Origin of Life—Five Questions Worth Asking.
^ par. 61 ƆDĀ NŌO YƆ I YA IPU IFOTO A: Ɔyinɛ alɔ nɔnya éyi je utrat lɛ ɔyipɔnɔnya éyi nɛ ó yɔ i lá odee ŋma abɔ nu a.
