Alɔ i cika ō gbɛla ka ohigbu ka ayikpo ofu ɛta ce igwo a i yɔ eko nɛ Ujisɔsi lɛ Ɔdole Ɔnɔɔnɛ Ku Ondu a kwaajɛ ŋ ma, i wɛ ka Ujisɔsi i cɛla ku uwa amāŋ ka é habɔ ta nɛɛ ŋ. Ɔdā nōo ya a wɛ ka Ujisɔsi dɔka ō yɔ mla ayikpo ku nu igwɛɛpa a foofunu ɛpleeko ɔɔma.

Ayikpo igwɛɛpa mla ācɛ ofu ɛta ce igwo nōo gē yɛce ɔ a, ɛjɛɛji uwa wɛ ayikpo ku Ujisɔsi. Ujisɔsi fu ayikpo igwɛɛpa a aflɛyi ŋma ipu ayikpo alɛwa nɛ ó lɛ a. (Ulúk. 6:​12-16) Ó yɔ Ugalili eko nɛ ó hi “ayíkpó igwɛ́ɛpa ā [īgwú] tɔ̄há” klla tu uwa ɛhɔ “gɛcɛ kéē nyɔ̄ gaá tɔ́ɔna kú olɛhɔ̄ kú ajɔ̄ɔ̄cɛ́ kú Ɔwɔicō lɛ ācɛ [mla ō hɛ́ ācɛ tá ŋmá ōcē dóódu] á.” (Ulúk. 9:​1-6) Igbihaajɛ ipu Ujudiya, Ujisɔsi lɛ “ācɛ nēe yɛce ɔ́ ofɛtá cigwó ɔhá fu, anɔ́ɔ ó lɛ uwá ɛpɛɛpa tɛ̄hɔ̄” a. (Ulúk. 9:51; 10:1) Ɛnyā mafu ka Ujisɔsi lɛ ācɛ nōo gē yɛce ɔ ɛga ɛyɛɛyɛyi nōo gē tɔɔna lɛyikwu ɔ.

Ācɛ Ujiyu nōo je piya ayikpo ku Ujisɔsi a gē lé Ucɛ Ku Onyata a ihayi doodu, á jé ŋ, mla ācɛ apɔlɛ ku uwa. (Oyɛb. 12:​6-11, 17-20) Eko kpii gbɔbu ɛɛ kóō kwū a, Ujisɔsi mla ayikpo ku nu le yɛ gā Ujerusalɛm. Amáŋ ó hi ɛjɛɛji ācɛ nōo gē yɛce ɔ nōo yɔ Ujudiya, Ugalili, mla u Perea a igwú kéē wa gáā lé ucɛ ku onyata a tɔha ŋ. Ó teyi peee ka Ujisɔsi dɔka ō yɔ mla ayikpo ku nu igwɛɛpa a foofunu eko ɔɔma. Ó da uwa kahinii: “N húmáyī ī tíne ká ami mɛ́mla aá kú ālɔ̄ lé ɔdōlé kú ɛ̄cī kú ucɛ kú onyatá nyā gbojī ɛɛ́, gbɔbū ɛ́ɛ́ kéē géē ŋmó um.”—Ulúk. 22:15.

Ó bi ɔdā olɔhi ipu ɔtu ya ɛɛ nɛ ó ya ɔɔma. Ó gboji ŋ, Ujisɔsi géē kwū bɛɛka “Ɔyálá kú Ɔwɔicō, nōo gē kpó íne nɛ̄ ācɛ kú ɛcɛ bīya nyɔ̄ ā.” (Ujɔ́n. 1:29) Ó géē kwū ipu Ujeruslɛm, ɛga néē humayi gwɛɛya lɛ Ɔwɔico gboji gboji ɛ ma. Ucɛ ku onyata nɛ ācɛ ku Isrɛlu gē lé a gē tu uwa ɛlá kwu ɔ ka Ujehofa lɛ uwa nyata ŋma Ijipiti ɛ. Amáŋ oŋma lɛ ɛya ō gwo ku nu, Ujisɔsi géē ya fiyɛ ɔɔma. Ó géē nya ɛjɛɛji alɛɛcɛ ta ŋma íne obiya mla ikwū. (1 Ukɔ́r. 5:​7, 8) Ohigbu ɛya ō gwo ku Ujisɔsi a, ayikpo igwɛɛpa a géē je piya ikpiinu ku ujɔ ku Ācɛ O Yɛce Ukraist. (Āfi. 2:​20-22) Ó wɛ ɔdā olɔhi, ka igeli otiihɔ nōo wɛ Ujerusalɛm a lɛ “aɛ́cɔ̄ kú ikpíinu igwɛ́ɛpa” néē ta “iyē kú ācotɛ̄hɔ̄ igwɛ́ɛpa kú Ɔyí álá ā” tu ɔ a. (Mafú 21:​10-14) Ohigbu ɛnyā, ayikpo igwɛɛpa a géē lɛ uklɔ ocɛgbá ō ya ipu ō ya jila ku ococɛ ku Ɔwɔico. Ɛnyā ya kóō ta alɔ eyī peee ɔdā nōo ya ɛɛ nɛ Ujisɔsi dɔka kéē yɔ mla ɔ eko néē géē lɛ ucɛ amoomɛ ku onyata mla ɔdā nōo gboce ɔ boobu a—Ɔdole Ɔnɔɔnɛ Ku Ondu a.

Ācɛ ofu ɛta ce igwo mla ayikpo ɔhá a i yɔ mla Ujisɔsi eko néē lé ucɛ ɔɔma a ŋ. Naana kpɔ a, ɛjɛɛji ayikpo a géē lɛ itene ŋma Ɔdole Ɔnɔɔnɛ Ku Ondu a ɔdaŋ ka é hayi kpaakpa jaa gā ajaajɛ. Ɛjɛɛji ayikpo a nōo je piya Ācɛ O Yɛce Ukraist néē lɛ anɔ tu uwa ɛyi a, géē gā ipu okonu ō ce ku Ajɔɔcɛ nɛ Ujisɔsi kɛla lɛyikwu ɔ lɛ ayikpo ku nu otu ɔɔma a.—Ulúk. 22:​29, 30.