Ajɔɔcɛ Ku Ɔwɔico yɔ i lé ɔcɛ́ babanya. Ó gáā gboji gɛ ŋ, opiyabɔ alɛwa géē ya ipu ɛcɛ nyā. Alɔ leyi yɛ aɔdā olɔhi ōhī nɛ alɔ lɔfu leyice ō jɔɔnyɛ nu ipu Ajɔɔcɛ Ku Ɔwɔico a.

1. Ɛgɛnyá nɛ Ajɔɔcɛ ku Ɔwɔico gáā bi ɛbɔ mla ɔdā okpaakpa ō ya wa ipu ɛcɛ nyā a?

Ujisɔsi nōo wɛ Ɔcɛ́ ku Ajɔɔcɛ ku Ɔwɔico a géē je ācɛ obɔbiipu mla igɔmɛnti ɛyɛɛyɛyi a yiifi ipu ɛfu ō kpo ku Amagɛdɔn. (Ɔdā Nēé Mafú Lɛ Ujɔ́ni 16:14, 16) Eko ɔɔma, ɛlā nɛ ɛga ku Ubáyíbu nyā ka a géē le ya jila. Ó kahinii: “Eko kpií nōo ī wā ā, ācobɔ̄bíipū kē í bí tāajɛ.” (Aíjē Kú Ɛ̄gbā 37:10) O bu ipu Ajɔɔcɛ a Ujisɔsi géē bi ɛbɔ mla ɔdā okpaakpa ō ya wa ipu ɛcɛ nyā.—Jé Ayisáya 11:4.

2. Ɛgɛnyá nɛ oyeeyi gáā lɛ eko nɛ ococɛ ku Ɔwɔico le ya jila ipu ɛcɛ nyā a?

Ɛhaajɛ Ajɔɔcɛ ku Ɔwɔico, “ācɛ o yá ucē okpaakpa ā géē lé úgwū kú ajɛ ā, klla í lā ipú ajɛ ā piyóó.” (Aíjē Kú Ɛ̄gbā 37:29) Leyi yɛ ɔ ku a lā ipu ɛcɛ nɛ ɛjɛɛji ācɛ gē ya ɔdā okpaakpa klla yihɔtu ku Ujehofa mla ɔmpa uwa! Ɛcɛ nɛ ɔcɛ duuma i gáā doōcē gɛ ŋ, ɛjɛɛji ācɛ géē lā oyeeyi opiyoo.

3. Ɔdi nɛ Ajɔɔcɛ ku Ɔwɔico gáā ya igbihi néē lɛ ācɛ ō ya ɔdobɔbi a kpo yiifi a?

Igbihi néē lɛ ācɛ ō ya ɔdobɔbi a kpo yiifi, Ujisɔsi géē ce ɔcɛ́ ihayi ula ɛpa ce ofu igwo (1,000). Ɛpleeko ɔɔma, Ujisɔsi mla ācɛ ula ofu igwaahata (144,000) nōo gáā lé ɔcɛ́ mla anu a géē ta alɛɛcɛ abɔ kéē hii lɛ ɛnyá gɛ ŋ. Eko nɛ ihayi ula ɛpa ce ofu igwo a mɛ, ɛcɛ a géē je piya uparadais oheyifuu nɛhi. Ɛjɛɛji ācɛ nōo gáā yɔ anu a géē wɛ ācɛ nōo géē yɔ i gweeye ohigbu ka é lɛyitaajɛ lɛ aíne ku Ujehofa. Ujisɔsi géē je íkwu ku ɔcɛ́ nɛ ó lé a lɛ Ujehofa Adā nu cigbihi. Ɛgɛ nɛ ó ya jeeje ɛɛ ŋ ma, ‘iye ku Ujehofa géē le ya tiihɔ.’ (Umátiyu 6:9, 10) Eko ɔɔma, ó géē le ta ɛjɛɛji ācɛ eyī peee ka Ujehofa wɛ ɔcɛ́ olɔhi nōo bi olɔhi nɛhi ɔtu lɛyikwu ācɛ nōo yɔ ɛhaajɛ ɔcɛ́ ō lé ku nu a. Ujehofa géē je Usetan, aalelekwu obɔbi ku nu mla ɔcɛ́ duuma ɔhá nōo yikpɛyi olɔfu ta ɔcɛ́ ō lé ku nu a yiifi. (Ɔdā Nēé Mafú Lɛ Ujɔ́ni 20:7-10) Āhɔ̄ olɔhi nɛ Ajɔɔcɛ ku Ɔwɔico géē bi wa géē yɔ ogboogboo ɛcɛ.

 JÉ GƆBU

4. Ajɔɔcɛ ku Ɔwɔico géē bi oŋmɛyi gē lɛ igɔmɛnti ku alɛɛcɛ

“Ācɛ . . . bá ī móowē ipú abɔ̄ kú ācɛ nēe bī ɔfú mɛ́mla íkwú ā.” (Ɔ̄cokóītá 8:9) Ujehofa géē bi Ajɔɔcɛ ku nu le ya ku ɛjɛɛji unwalu nōo wa ohigbu ku ācɛ i géē ya ɔdā okpaakpa ŋ ma kóō mɛ.

Jé Udánīyɛ̄lu 2:44, mla 2 Ācɛ Utesaloníka 1:6-8, NW, cɛɛ ku aa kɔka lɛyikwu aɔka nōo ba nyā:

• Ɔdi nɛ Ujehofa mla ɔyi nu Ujisɔsi gáā ya ācɛ nōo yɔ i lé ɔcɛ́ icɛ nyā mla ācɛ nōo yɔ i cɛtra uwa a?

• Ɛgɛnyá nɛ ɛlā nɛ a nwu lɛyikwu Ujehofa mla Ujisɔsi a, tu uwɔ ɔtu kwu ɔtu ō jé ka aɔdā néē gáā ya a géē wɛ ɔdā okpaakpa a?

5. Ujisɔsi wɛ Ɔcɛ́ nōó lɛ ɛdɔ ŋ

Abɔ Ujisɔsi wɛ Ɔcɛ́ ku Ajɔɔcɛ ku Ɔwɔico a, ó géē ta ācɛ alɛwa abɔ nɛhi ipu ɛcɛ nyā. Lɛ UVIDIO nyā mafu ku a má ɛgɛ nɛ Ujisɔsi lɛ ɔtu caca ō ta ācɛ abɔ a mla ɛgɛ nɛ Ujehofa kéē je ɔfu lɛ ɔ ō ta ācɛ abɔ a.

Eko nɛ Ujisɔsi yɔ ɛcɛ nyā, aɔdā nɛ ó ya a mafu ɔdā nɛ ó géē ya Ajɔɔcɛ ku Ɔwɔico. Ŋma ipu ɔhā nōo ba nyā, ɛnyá he uwɔ ɔtu fiyɛ duu nɛ a yɔ i leyice a? Jé aɛga ku Ubáyíbu nōo tɛɛma kwu aɔhā nyā.

6. Ajɔɔcɛ ku Ɔwɔico géē bi ɛcɔbu olɔhi wa

 ƆDI NƐ A NWU A?

Ajɔɔcɛ ku Ɔwɔico géē ya ɔdā nɛ Ɔwɔico dɔka a. Ó géē ya ka oduudu ɛcɛ nyā kóō le piya uparadais nɛ ācɛ olɔhi foofunu nōo gē gba Ujehofa ɛ̄gbā géē lā ogboogboo ɛcɛ.

Aɔka ō tu alɔ ɛlá kwu ɔdā nɛ alɔ nwu

• Ɛgɛnyá nɛ Ajɔɔcɛ ku Ɔwɔico géē ya ka iye ku Ujehofa kóō le tiihɔ a?

• Ɔdiya nɛ alɔ kpɔtuce ka Ajɔɔcɛ ku Ɔwɔico géē ya okonu ō ce nōo yɔ ipu Ubáyíbu a jila a?

• Ŋma ɛjɛɛji aɔdā olɔhi nɛ Ajɔɔcɛ ku Ɔwɔico gáā bi wa a, ɛnyá nɛ a yɔ i leyice ō má a?