Eko nɛ Ujehofa ya alɔ a, ó ya alɔ ɛhi ku ɛlā ō ka. Ó gē lɛ ɛlá wu ɛgɛ nɛ alɔ gē bi ɛhi ɔɔma le yuklɔ a? Ii gboo, ó lɛ ɛlá wu ɛgɛ nɛ alɔ gē bi ɔ le yuklɔ a! (Jé Ujɛ́mīsi 1:26.) Ó lɛ a, ɛgɛnyá nɛ alɔ géē kɛla lɛ ācɛ ɔwɛ nōo géē he Ujehofa ɔtu a?

1. Ɛgɛnyá nɛ alɔ géē bi ɛhi nɛ Ujehofa je lɛ alɔ ɔɔma le yuklɔ ɔwɛ olɔhi a?

Ubáyíbu da alɔ kahinii: “Aá tá iyī aá ɔtū kwu ɔtū, aá klla tū iyī aá abɔ̄.” (1 Ācɛ Utesaloníka 5:11) A lɔfu gbɛla lɛyikwu ɔcɛ duuma nōo cɛgbá ɔtu ō tu kwu ɔtu? Ɔdi nɛ a lɔfu ya o ya ɛɛ kéē yɔ lɔhi fiyɛ a? Cɛ lɛ uwa le jé kpɔcii ku a lɛ ɛlá wu uwa. A jé ŋ, a lɔfu da uwa ɔdā éyi nōo cɛ lɛ ɛlā ku uwa he uwɔ ɔtu a. A lɔfu gbɛla kwu ɛga ku Ubáyíbu duuma nɛ a lɔfu bi le je ɔtu ō tu kwu lɛ ɔcɛ duuma nɛ a jé? Ó lɛ ɛga ku Ubáyíbu alɛwa nɛ a lɔfu je ō bi le yuklɔ. Klla bla, ka ɔwɛ nɛ a gē kɛla a lɔfu tu ācɛ ɔhá ɔtu kwu ɔtu nɛhi. Ó lɛ a, bēē kɛla ipu eyinyinyi mla ɔtu ogbonɛnɛ eko doodu.—Aíita 15:1.

2. Ɛdɔ ku ɛlā nyá nɛ alɔ i cika ō ka ŋ ma?

Ubáyíbu kahinii: “Aá híīī kɛlā obɔ̄bí dúúmā ŋ́.” (Jé Ācɛ Ɛ́fēsɔsi 4:29.) Ɛyi nu wɛ kahinii, alɔ i gáā kɛla nōo gē kwu ācɛ iyē amāŋ kɛla icɔnu nōo géē biya ācɛ ɔhá ɔtu a ŋ. Alɔ i cika ō ya awanda klla biya ācɛ ɔhá iyē ŋ.—Jé Aíita 16:28.

3. Ɔdi gáā tu alɔ abɔ ku alɔ kɛla nōo géē tu ācɛ ɔhá ɔtu kwu ɔtu a?

Igbalɛwa ɔdā nɛ alɔ gē kɛla lɛyikwu ɔ a gē mafu ɛgɛ nɛ ɔtu gē ya alɔ lɛ mla ɛlá ō gbo ku alɔ. (Ulúku 6:45) Ohigbu ɛnyā, ó cɛgbá ku alɔ nwu iyi alɔ ō lɛ ɔtu ku alɔ kwu aɔdā olɔhi, aɔdā nɛ ɛkɛmgbɛ duu i yɔ anu ŋ, aɔdā nōo gē ya ku eyī ku ācɛ kéē hɛ ɔkɔ nu, mla aɔdā nɛ ācɛ gē gbɛla olɔhi lɛyikwu uwa. (Ācɛ Ufílipāyi 4:8) O ya ɛɛ ku alɔ lɛ ɔtu ku alɔ kwu aɔdā néē ba nyā a, alɔ cika ō bi ijeeyi le fu aɔdā ō bi le jɔɔnyɛ iyi alɔ mla aɔkpa ku alɔ. (Aíita 13:20) Ó klla géē ta alɔ abɔ gbɛla lɔɔlɔhi tu ɛlā nɛ alɔ gáā ka mla ɔwɛ nɛ alɔ gáā ka ɔ a. Leyi yɛ ɛgɛ nɛ ɛlā nɛ a gē ka a gē lɛ abɔ kwu ācɛ ɔhá iyē a. Ubáyíbu kahinii: “Ɛlā nɛ̄ ɔ̄cɛ gē ka í lɛ eyī yɛ ɔ́ ŋ́ mā, gē lɔfú yá ɔ̄cɛ ágbe bɛ̄ɛka ɔkpacaŋ́gelī ā glá. Ɛlā ō ka ipú íjééyī ɛmɛɛma ā gē gbɔtū nɛɛ á.”—Aíita 12:18.

 JÉ GƆBU

4. Leyi kwɛɛcɛ lɛyikwu ɛlā nɛ a gē ka, eko mla ɔwɛ nɛ a gē ka ɔ a

Ekoohi, alɔ gē kɛla nɛ alɔ gē hijema ku nu igbihaajɛ. (Ujɛ́mīsi 3:2) Jé Ācɛ Ugalésīya 5:22, 23, cɛɛ ku aa kɔka lɛyikwu aɔka nōo ba nyā:

• Ŋma ipu auce ō ya nōo ba nyā, ɛnyá nɛ a géē gbɔɔkɔ lɛyikwu ɔ kóō tu uwɔ abɔ ɔwɛ nɛ a géē kɛla a? Ɛgɛnyá nɛ auce ō ya nyā géē ta uwɔ abɔ a?

Jé 1 Ācɛ Ukɔ́rīnti 15:33, cɛɛ ku aa kɔka lɛyikwu ɔka nyā:

• Ɛgɛnyá nɛ aɔkpa ku uwɔ mla aɔdā nɛ a fu ō bi le jɔɔnyɛ iyi uwɔ a géē lɛ abɔ kwu ɔwɛ nɛ a gē kɛla a?

Jé Ɔ̄cokóītá 3:1, 7, cɛɛ ku aa kɔka lɛyikwu aɔka nōo ba nyā:

• Eko nyá nɛ á cika ō kɛla ŋ ma? Eko nyá nɛ a cika ō gbeyi gbeeko nōó lɔhi fiyɛ ku a kɛla a?

 5. Kɛla olɔhi lɛyikwu ācɛ ɔhá

6. Bi ɔtu ogbonɛnɛ eko duuma nɛ a yɔ i kɛla lɛ ācɛ apɔlɛ ku uwɔ

 ƆDI NƐ A NWU A?

Ɛlā nɛ alɔ gē ka a lɔfu ta ācɛ abɔ amāŋ biya uwa ɔtu gla. Ó cɛgbá ku alɔ gbɛla lɔɔlɔhi lɛyikwu ɛlā nɛ alɔ gē ka, eko nɛ alɔ gē ka ɔ mla ɛgɛ nɛ alɔ gē ka ɔ a.

Aɔka ō tu alɔ ɛlá kwu ɔdā nɛ alɔ nwu

• Aɔwɛ ōhī nyá nɛ alɔ lɔfu bi ɛlā ō ka le tu ācɛ ɔhá abɔ a?

• Ɛdɔ ku ɛlā nyá nɛ alɔ i cika ō ka ŋ ma?

• Ɔdi lɔfu tu alɔ abɔ eko doodu ō yɔ i kɛla lɛ ācɛ ɔhá ɔwɛ ogbonɛnɛ nōo klla gē tu uwa ɔtu kwu ɔtu a?