ỌTỤTỤ ndị na-agbalịsi ike ịzụta ihe ọ bụla ha nwere ike, ya sọkwa ya ya bụrụ na ha ma na a ga-achụ ha n’ọrụ ma ọ bụkwanụ na a ga-achụpụ ha n’ụlọ ha bi. Ha nwekwara ike chọọ ịzụ ihe ọ bụla aka ha ruru n’agbanyeghị na ha nụrụ na a ga-akwụsị ịkwụ ha ụgwọ ezumike nká.

Ọ bụ ụdị ndị ahụ ka ọnyà ndị na-akpọsa ngwá ahịa na-amatakarị. Ndị na-akpọsa ngwá ahịa ma na tiivi ma na redio na-ekwu na mmadụ kwesịrị ịrụ ụlọ ọgbara ọhụrụ, zụọ ụgbọala ọhụrụ, na uwe ndị pụtara ọhụrụ. Ọ bụrụgodị na i nweghị ego, ha na-agwa gị ka ị gaa biri ego zụọ ha. Otú ọtụtụ ndị si ele ya anya bụ: Ọ bụrụhaala na ha dị ka ndị ọzọ, ya sọkwa ya ya bụrụ na ha ji ụgwọ, nsogbu adịghị.

Ma ọ naghị egbu oge, ya efo ha n’anya. Otu akwụkwọ kwuru na mmadụ ibiri ego zụọ ihe maka na ibe ya na-azụ dị ka ebe mmadụ gara na-aṅụ igbó ka o wee chefuo ihe mere ya. Obi nwere ike ịdị onye ahụ mma mgbe ahụ, ma e mechaa anya ga-edo ya. Obi na-adịkwa mmadụ mma ma o biri ego gaa zụọ ihe aka ya na-erughị. Ma, mgbe o ruru n’ịkwụ ụgwọ ahụ, obi agaghị adị ya mma.

Baịbụl kwuru na “oké ngosi nke ihe mmadụ ji ebi ndụ” abaghị uru. (1 Jọn 2:16) Nke bụ́ eziokwu bụ na ọ bụrụ na ebe uche anyị dị bụ naanị n’ihe ego ga-azụtali, ọ ga-eme ka uche anyị ghara ịna-adị n’ihe ego na-agaghị azụtali. Ihe ndị ahụ bụkwanụ ihe ndị kacha mkpa ná ndụ. Ka anyị tụlee atọ n’ime ha.

Otu nwa agbọghọ bi n’Amerika aha ya bụ Sandra * kwuru na ihe na-adị papa ya mkpa mgbe niile bụ ọrụ ya na ego ọ na-akpata. O kwuru, sị: “E nweghị ihe anyị na-enweghị n’ụlọ anyị, ma anyị anaghị ahụ papa anyị anya. Mgbe niile, ọ nọ n’ụzọ. Ama m na ọ bụ ọrụ ya mere na ọ naghị enwe efe, ma anyị na ya kwesịrị ịna-anọ.”

Jụọ onwe gị, sị: Olee ihe ọ ga-abụ papa Sandra cheta echi ya akwaa mmakwaara? Otú ahụ mkpa ya niile bụ ego, ò na-enwe oge ya na nwa ya nwaanyị ji anọrị? Gịnị ka ndị ezinụlọ ya chọrọ ka ọ na-emere ha nke ego na-agaghị azụtali?

Amaokwu Baịbụl ndị ị ga-echebara echiche:

• “Ịhụ ego n’anya bụ mgbọrọgwụ nke ụdị ihe ọjọọ niile. Site n’ịchụso ụdị ịhụnanya a, e duhiewo ụfọdụ, ha wee dapụ n’okwukwe. Ha wee jiri ọtụtụ ihe mgbu maa onwe ha aghara aghara dị ka mma.”—1 Timoti 6:10.

• “Nri e ji naanị akwụkwọ nri sie dị mma n’ebe e nwere ịhụnanya karịa ehi mara abụba n’ebe e nwere ịkpọasị.”—Ilu 15:17.

Nke Bụ́ Eziokwu Bụ: Ego agaghị emeli ka ezinụlọ dịrị n’otu. Naanị ihe ga-eme ka ezinụlọ dịrị n’otu bụ nne na nna na ụmụ ha ịna-anọrị, nne na nna ana-emere ụmụ ha ihe na-egosi na ha hụrụ ha n’anya. —Ndị Kọlọsi 3:18-21.

Otu nwa agbọghọ dị afọ iri na asaa aha ya bụ Sera kwuru na ihe mama ya na-agwakarị ya bụ ka ọ lụta di nwere ego, mụọkwa ezigbo ọrụ ka ọ ga-abụ a chọọ di ya a hụghị ya, ya enwee ihe ga-eme ka obi ruo ya ala. O kwuru na naanị ihe mama ya na-eche bụ ebe ọ ga-esi na-enweta ego.

Jụọ onwe gị, sị: Ebe ọ bụ na iche banyere echi adịghị njọ, olee ihe ndị ị na-eche banyere ọdịnihu? Olee otú ị ga-echeru banyere ọdịnihu ya abụrụ na ichegbuwela onwe gị? Olee otú mama Sera kwesịrị isi na-ele ego anya?

Amaokwu Baịbụl ndị ị ga-echebara echiche:

• “Kwụsịnụ ịkpakọbara onwe unu akụ̀ n’ụwa, ebe nla na nchara na-erichapụ ihe, ebe ndị ohi na-awabakwa zuo ohi.”—Matiu 6:19.

• “Unu amaghị ihe ndụ unu ga-abụ echi.”—Jems 4:14.

Nke Bụ́ Eziokwu Bụ: Ọ bụghị ịkpakọba ego ga-eme ka obi ruo mmadụ ala. A si ka e kwuwe, e nwere ike izuru ego mmadụ nwere. Ego anaghịkwa eme ka onye nwere ya ghara ịrịa ọrịa ma ọ bụ mee ka ọ ghara ịnwụ. (Ekliziastis 7:12) Baịbụl kwuru na ihe ga-eme ka obi ruo mmadụ ala bụ onye ahụ ịma banyere Chineke na nzube ya.—Jọn 17:3.

Otu nwa agbọghọ dị iri afọ abụọ na anọ aha ya bụ Chioma kwuru na nne na nna ya kuziiri ha na ihe ọ bụla ha nwere kwesịrị iju ha afọ. O kwukwara na mgbe ha na-eto, obi na-adị ya na ejima ya ụtọ n’agbanyeghị na e nweghị oké ihe ha nwere.

Jụọ onwe gị, sị: Gịnị mere na afọ anaghị eju ụfọdụ ndị ma ọ bụrụ na ha enweghị ihe niile ndị ọzọ nwere? A jụọ di gị ma ọ bụ nwunye gị ma ọ bụkwanụ ụmụ gị otú i si ele ego anya, gịnị ka ha ga-ekwu?

Amaokwu Baịbụl ndị ị ga-echebara echiche:

• “Ebe anyị nwere ihe oriri na uwe, anyị ga-enwe afọ ojuju n’ihe ndị a.”—1 Timoti 6:8.

• “Obi ụtọ na-adịrị ndị maara mkpa ime mmụọ ha.”—Matiu 5:3.

Nke Bụ́ Eziokwu Bụ: Ego abụghị ihe niile. E nwere ihe ka ego na ihe e ji ya azụ. Ọ bụ ya mere Baịbụl ji sị: “Ọbụna mgbe mmadụ nwere ọtụtụ ihe, ihe o nwere adịghị eme ka ọ dị ndụ.” (Luk 12:15) Mmadụ ga-enwe afọ ajụjụ ná ndụ ma ọ chọta azịza ajụjụ ndị a:

• Gịnị mere anyị ji nọrọ n’ụwa?

• Olee ihe ọdịnihu ga-abụ?

• Olee otú mụ na Chineke ga-esi adị ná mma?

Ọ bụ Ndịàmà Jehova na-ebipụta akwụkwọ a. Obi ga-adị ha ụtọ inyere gị aka ịmata azịza ajụjụ ndị ahụ.