EGBEJU 10
Ányị A Tị́ Ka Bwu Jẹ́ Ịgba Ọgbagba Ọlẹ Kọ ri Ịnyịlẹhị?
1. Ịgba ọgbagba nyịlẹhị la ookpokpo kẹnẹ-kẹnẹ?
“Anụ kpahị ju ịlọnụ ọgwọgụ ẹ-ẹga nya alọmwụ ịnịịkịla mẹ!”—ỊMATIYU 7:15.
Ịgba ọgbagba ookpokpo kẹnẹ-kẹnẹ ọlẹ kọ ri ịnyịlẹhị, iJisọsị à mẹjẹ angịjụgbẹyị nyamwụ lẹ. Ọ lala ụgbẹyị ọlẹ kọ́ da ka ẹpwụ nya ọhịhị ọmyịmyị-ka. IJisọsị ya nyori: “Angị ịmanyị-ịmanyị” nya-à wẹẹ dịrẹ ụgbẹyị ọọwa lẹ. (ỊMatiyu 7:14) Ịgba ọgbagba ọlẹ kọ́ bwu ịBayịbụụ kẹnẹ-kẹnẹ, Ohe Oluhye à kaa ye myị lẹ. Angịlẹ kị́ tịị gbịgba nyịlẹhị wuu kaa yẹjula awụlẹ ẹ-ẹpwụ nya ọmyịmyị ookpokpo.—Wa ỊJọn 4:23, 24; 14:6; Ala Efesọsị 4:4, 5.
Yẹ ifim Does God Accept All Forms of Worship?
2. Ẹlịyẹ iJisọsị a tị́ ya rụ́ angịnyị nya Ohe nya ịnịịkịla?
“Ị juwa ya bwu ọnụ nyaa yẹkẹẹ, ịwa nyị jẹ́ Ohe Oluhye lẹ. Ma, abwẹla ọhọhọ nyaa wuu tị juwa pwa Ohe Oluhye ọọwa rwarụ.”—ỊTAYỊTỌSỊ 1:16.
IJisọsị gbile angịnyị nyamwụ ụbwọ ụ-ụrụ nyori alọmwụ nya ịnịịkịla nyị ka warị nyọka hwaa ahị. Ị kaa họ lala angịnyị nya Ohe nyịlẹhị, ị-ịlahị nya aluche. Ịchọọchị nyaa myịmyị kaa wa ịlaa nya angịnyị nya ịKịrayịsị. Ma, à ka jẹ́-ẹ jẹ́ ụma nya angịnyị ịlẹ kị́ ri ịnyịlẹhị myị́. Abwẹla bala ọhịhị nyaa maa jẹ gede-gede. Ịnyịnyị ọ la ẹ-ẹga nya angịnyị nya Ohe nyịlẹhị lẹ.—Wa ỊMatiyu 7:13-23
3. Ányị a tị́ ka bwu jẹ́ angịnyị nya Ohe nyịlẹhị?
Kụ ehi yẹ ang ẹjẹẹ ịrụ ịlẹ:
-
Angịnyị nya Ohe nyịlẹhị kaa ju ịBayịbụụ, Omyi Ẹla nya Ohe ihi. Ị kaa maga nyịlẹhị-ịlẹhị nyọka ba ẹla ọlẹpwụ nyamwụ jẹ. Lẹ, ịgba ọgbagba nyịlẹhị-ị́ ba irya nya angịnyị ehe jẹ́ ka. (ỊMatiyu 15:7-9) Angịnyị nya Ohe nyịlẹhị-ị́ kaa mẹ ẹla ọhẹ jẹ, myịmyị mwọọgịlẹ họ ẹla ọkịla ka.—Wa ỊJọn 17:17; 2 ITimoti 3:16, 17.
-
Angị ba iJisọsị jẹ nyịlẹhị kaa chị ihi ju ẹnyị nya Ohe Oluhye ọlẹ kọ ri, iJihova. IJisọsị chị ihi ju ẹnyị nya Ohe Oluhye bwula ọ-mọọ jẹ. Ọ da angịnyị ụbwọ nyọka jẹ́ Ohe Oluhye, ọ myịmyị mẹjaa nyọka raabwọ kị́ ka chị ịgọgọ ju ẹnyị nya Ohe Oluhye. (ỊMatiyu 6:9) Ebwo nya ịgba ọgbagba oyina à tịị mẹ ẹnyị nya Ohe Oluhye Jẹ, ẹ-ẹga ká kụ?—Wa ỊJọn 17:26; Ụkụrwọ nya Alẹrụ 2:21.
-
Angịnyị nya Ohe nyịlẹhị kaa kpa oja nya Ịpyị-Adịrahụ nyamwụ pyẹ. Ohe Oluhye du iJisọsị ẹrụ nyọka kpa ẹrụ ọnyịịla nya Ịpyị-adịrahụ nyamwụ pyẹ. Ịpyị-adịrahụ ọọwa kẹnẹ-kẹnẹ à ri ahị ọdahile nya angịnyị ehe lẹ. IJisọsị ya ẹla u-uhye nyamwụ gbee ka da ahyẹẹnụ ọlẹ kọ́ gbu. (ILuku 4:43; 8:1; 23:42, 43) Ọ myịmyị ya nyori angịnyị nyọwa nyị ka kpa ẹrụ ọnyịịla ọwẹ pyẹ ịnyịnyị. Oowo anyị à tị́ kaa kpa ẹrụ ọnyịịla nya Ịpyị-Adịrahụ pyẹ ya ju angịnyị bwu ẹpwa ka ẹpwa lala iJisọsị?—Wa ỊMatiyu 24:14.
-
Angị kaa ba iJisọsị jẹ á ri ịnya odehe onyobyi ọlẹ ka. À ka jẹ́-ẹ jaa myị́, chajị ị́ kaa yụbwọ ju ẹla nya upe lee ẹla ọmwọmwọ nya alẹpwụma kpongkpong ka. (ỊJọn 17:16; 18:36) Ị́ myịmyị kaa gbịla abwẹla ọtịpyọ bala ang onyobyi ọhọhọ nya alodehe ọlẹ ka. — Wa IJemsi 4:4.
-
Angịnyị nya Ohe nyịlẹhị kaa mẹ ọháha ọlam-ọlam jẹ ẹ-ẹga nya awụlẹ. Ị jẹ́ ang bwu ịBayịbụụ nyọka ju ihi nya alepwoja myị́ epwoja wuu. Nanana nyori angịnyị nya Ohe nya ịnịịkịla kaa yụbwọ ju ẹla nya ẹwụ ọdada kpọrị-kpọrị, angịnyị nya Ohe nyịlẹhị-ị́ kaa họ ịnyị kpongkpong ka. (ỊMayịka 4:1-3) Ọkọkọ nyọwa lẹ, ị kaa kpa ụka bala ang ịlala nyaa da angịkịla ụbwọ bala ọ-jwaa ọhụ, la ọ-dahịhile uri ọhẹ-lọhẹ ka.—Wa ỊJọn 13:34, 35; 1 ỊJọn 4:20.
4. À jẹ́ ịgba ọgbagba nyịlẹhị datị lẹẹ?
Ịgba ọgbagba oyina ang ọmẹjẹ nyaa wuu à tịị bwu ịBayịbụụ? Oyina à tí kaa chị ihi ju ẹnyị nya Ohe Oluhye bala ọ-kpa oja nya Ịpyị-adịrahụ nyamwụ pyẹ nya ahị ọdahile nya angịnyị ehe kem? Ogu oyina à tịị mẹ ọháha ọlam-ọlam jẹ bala ọ-gba ụbwọ hi ẹla nya ẹwụ gbanggbang? Ányị à tị́ me irya?—Wa 1 ỊJọn 3:10-12.
