Ohe Oluhye à ri ọngọ họ ang myị́ ang ilodehe wuu lẹ. Ọ́ la ọmwụ ọdada ka, ọ́ tị ka la ocheju ka ịnyịnyị. (Eje Ọnyịịla 90:2) Oja ịnyịịla ịlẹpwụ nya ịBayịbụụ bwu ẹga nyamwụ. (1 ITimoti 1:11) Ọ chịla káhị ka gbịgba ha Ohe Oluhye kem, chajị ọwa à ya ọhịhị hahị lẹ.—Wa Ọwụrụụ-wụrụ 4:11.

Ọngịnyị ehe ọhẹ-lọhẹ á yẹ Ohe Oluhye ẹ-ẹhị ẹnẹnẹhẹ lẹka chajị ọ ri olegu. Ọọwa ri, ụma nya ọhịhị ọlẹ kọ́ la datị gbanggbang hi ọlẹ ká ang ịhịhị ilodehe ịlẹ wuu la. (ỊJọn 1:18; 4:24) Tị wẹẹ, angịnyị ehe ka jẹ́-ẹ jẹ́ abwụma nya Ohe Oluhye bwula ang ịlẹ kọ họ. Lala ọ-chụ pwokwịta, egbe nya ekeji bala ịFịlawa ịdatị-datị ilodehe ọlẹ, mẹ ọhaha bala ẹla ọjẹ́jẹ nyamwụ jẹẹhị. Ẹpwụ ojuju nya uhye-ọgba, odehe bala ịdịchụ mẹ ụmụmẹ nya ọngịrị nyamwụ jẹ.—Wa Ala iRom 1:20.

Ahị ka jẹ́ ang chajị nya abwụma nya Ohe Oluhye gụ ọwọwa bwula ọ wa ịBayịbụụ. O ya ang ịlẹ kị́ họọ bala ịlẹ kị́ wọọ ẹjẹ jehi, jaabwọ kọ́ kaa kpa angịnyị ehe bala abwọlẹ kọ́ kaa họ ụka ká angịnyị-ị́ họ ẹla ọnyịịla lee ọtịpyọ.—Wa Eje Ọnyịịla 103:7-10.

IJịsọsị yẹkẹẹ: “Adahị ọlẹ ká juwa e-epwoohe, káhị chị ịgọgọ ju ẹnyị nyang.” (ỊMatiyu 6:9.) Nanana nyori angịhyẹ ya nya Ohe Oluhye nyị la ẹnyị lụmẹ-lụmẹ lala agụgụ, ọkpanchọ lee ọngọlahị, ịwẹ wuu ri ẹnyị ọ-chịchị. Ẹnyị okpokpo ọ la lẹ. Oja ọnyị myị́ ọnyị la abwọlẹ kịị ya ọnụ nọ kpa wụrụ ẹnyị ọwẹ. Lala oja nya igede lẹ, ịị wụrọọ nya “iJihova.” Ma, angịkịla kaa wụrọọ nya “iYawe.”—Wa Eje Ọnyịịla 83:18. *

Ị gba ẹnyị nya Ohe Oluhye hi ịBayịbụụ lụmẹ-lụmẹ, ya ẹnyị  ịkịla lala Ọngọlahị lee Amkpaa ku ọmwakpa nyamwụ. Ma, lụka ọlẹ kị́ da ịBayịbụụ nya ọgbanyẹ-ọgbanyẹ, ẹnyị nya Ohe Oluhye juwa ẹ-ẹpwụ nyamwụ lala ụka ụnọ irwiye (7,000). IJisọsị chị ẹnyị nya Ohe Oluhye ehe lụka kọ́ mẹ ang jẹ angịnyị ám̀ odehe.—Wa ỊJọn 17:26.

Yẹ ifim Does God Have a Name?

Ajụjụ bala akama ilodehe ọlẹ mẹjẹ nyori iJihova Ohe Oluhye á kpahị juhi ka? Angịhyẹ ya nyori, Ohe nyị kaa kpa akama chịhị ọgụ nyọka mahị yẹ, ma ọọwa á ri ẹlịlẹhị ka.—Wa IJemsi 1:13.

Ohe Oluhye ya iwe hahị nyọka chụ ang ọlẹ káhị tịtọ nyọka họ la ọhịhị nyahị. Iwe ọlẹ káhị la wẹ á myịhị lẹhị ka? (IJochuwa 24:15) Ma, angịhyẹ chụ nyọka họ ẹla ọtịpyọ ẹ-ẹga nya angịkịla dudu ká akama pyẹ yịrị ẹga yịrị alẹ. Ẹla ọwẹ tọ iJihova olujwo lụmẹ ka kpoye.—Wa Ọmwụ Ọdada 6:5, 6.

IJihova ri Ohe ọlẹ kọ́ kaa kpahị juhi yẹẹyẹẹ. Ọ tịtọ káhị wuu ka chị ọkẹkẹnị ẹ-ẹpwụ nya ọhịhị. Lụka kpii ọ ka myị akama ilodehe ọlẹ bala ọ-ta angịlẹ kị́ ju ọmwụ nyamwụ wuu ayịreji. Lẹelẹ, ọ lang odudu ọlẹ kọ ya ẹga da ka akama ji. Ahị ka jẹ́ ang odudu ọọwa e-egbeju nya ẹla ọhaneku (8) nya ụpwụ ọlẹ.—Wa 2 IPita 2:9; 3:7, 13.

IJihova ya iwe hahị nyọka tụ jwọọ chwẹẹ bwula ọ-ya ẹla tọọ ẹ-ẹpwụ nya abwọ ọrịrị. Ọ la irya ọnyịịla ẹ-ẹga nya ọng myị́ ọng nyahị. (Eje Ọnyịịla 65:2; 145:18) Ọ ti nwụlanọ nyọka hịnyọhi hahị ụka wuu. Ọ myịmyị jẹ́ aga ọmama nyahị nyọka họ irya nyamwụ, tụ ụka ọlẹ kọ́ lujwo hahị. Lẹ, nanana nyori áhị la kpẹẹkpẹẹ ka, ahị ka jẹ́-ẹ tụ ju Ohe Oluhye chwẹẹ myị.—Wa Eje Ọnyịịla 103:12-14; IJemsi 4:8.

Ọ chịla ká iJihova ka háahị gụ ọng myị́ ọng wuu, chajị ọwa à ya ọhịhị hahị lẹ. (ịMakị 12:30) Jaabwọ ká wẹẹ mẹ ọháha nyang jẹ ẹ-ẹga nya Ohe Oluye bwula ọ-jẹ́ ang chajị nyamwụ bala ọ-kpa ẹla ọọwa họ ụkụrwọ, à ka tụ jwọọ chwẹẹ gụ ọwọwa.—Wa 1 ITimoti 2:4; 1 ỊJọn 5:3.