À YẸ nyori iru nya angịnyị odehe ọlẹ alẹ kaa tịtọ kị ka kpaa ụ-ụgbẹyị ọnyịịla gụ́ angịkịla bala ọ-la iwe-ahụrụ ọhẹ bala ọkịla? Jaabwọ myị́ abwọ kị họ ang haa kaka ba, ị kaa me irya nyori ọ baba kị ka họ haa gụ ọọwa wẹẹ. Angịlẹ kịị kụ irya ịịwẹ kaa yẹ ịlaa-ịlaa kem, ị́ tị la olegu nya obe o-jiji ka ịnyịnyị. Jaabwọ ká ịBayịbụụ ya angịnyị nyị ka la, la ahyẹẹnụ ihyẹẹkpẹ à wẹ lẹ.—2 Tim. 3:2.

O ri ịnyịlẹhị nyori angịnyị ọ-yẹ ịlaa-ịlaa kem á ri ang onyeewe kaka. Ọ-chụ pwokwita, Adam bala Iivu tịtọ kị ka la ịlaa nyọka chụ ang ọlẹ ko ri ọnyịịla bala ọtịpyọ ha ịlaa. Ahị wuu tị jam yẹ akama ọọlajị nya eje ọchịchị nyaa ọọwa. Ọngọkịla ri Usiya, adịrahụ nya ala iJuda. O me irya nyori nyị chịla kị ka ya ẹga da họọ nyọka kịliya u-ube ịgọgọ, ma ọ́ tị pwoku kọ ka họ ịnyị kpongkpong ka. (2 Ego. 26:18, 19) Ịnyịnyị-ịnyịnyị, ala ịFarịsii bala ala ịSadusii la irya nyori Ohe ka kpaa ụ-ụgbẹyị ọnyịịla gụ angịkịla chajị nyori ị ri anyị ịtụma nya Ebiraham.—Mat. 3:9.

Angịnyị ịlẹ kị kaa yẹ ịlaa-ịlaa bala o-hu ịlaa hwaa dagaga juhi alẹ, abwẹla nyaa tị ka chị wuhi ịnyịnyị myị́. (Gal. 5:26) Ahị ka dọmwụ nyọka kụ irya nyori ọ chịla kị ka kpahị ụ-ụgbẹyị ọdatị lee ọ-ya iwe ọhẹ hahị myị́. Ịyẹ à tị́ ka dahị ụbwọ kahị ka kụ irya ụ-ụgbẹyị ọlịịwẹ ka? Ahị baba nyọka jẹ́ irya nya iJihova u-uhye nya ẹlẹwẹ. Itiwe nya ehile ịla ịBayịbụụ imiiye ka dahị ụbwọ.

IJihova à kaa cheje nya ang ọlẹ kọ chịla kahị ka ye lẹ. Kụ ẹhị yẹ ọ-chụ pwokwita ịhyẹ wẹẹ.

• IJihova tịtọ ká ahụ ka ju ọrụmwụ ihi, ká ọrụ tị ka la ọháha ẹ-ẹga nya ahụ nyamwụ ịnyịnyị. (Efe.  5:33) Ahụ bala ọrụ tị ka mẹ ọháha nya ẹga nya awụlẹ ọkaka jẹ ẹ-ẹga nya ọngọ oheeye nyaa kem. (1 Kọr. 7:3) Ịnyịnyị, adịda bala ịnịna ka jẹ́-ẹ yẹhị rịrị nyori anyị nyaa ka jwaa ihi, anyị tị ka jẹ́-ẹ dahịhile nyori adaa bala ịnaa ka kpahị jwaa bala ọ-mẹ ọháha jẹ ẹ-ẹga nyaa.—2 Kọr. 12:14; Efe. 6:2.

• IJihova ya nyori ahị nyị ju angịgbahị nya ọjịra-jịra ihi chajị nya ụkụrwọ ọtụka ọlẹ kị kaa họ. (1 Tẹs. 5:12) Ma, angịgbahị á tị la ọngịrị nyọka byi alọjịra-jịra nyị họ ang ọlẹ ko ri irya nyaa ịwa ka.—1 Pit. 5:2, 3.

• Ohe ya iwe ha igomenti nya angịnyị ehe kị ka ye ẹpwa ọnyẹnyẹ bwu ẹga nya alekpeleji nyaa bala ọ-tịtọ nya ihi ojuju nyaa ịnyịnyị.—Rom. 13:1, 6, 7.

IJihova ya ang hahị kpoye nya abwọlẹ kahị chịla nyọka la ọọlajị nya ọháha. Chajị nyọlẹ kahị ri ugu nya ọhọbịrị bwu ẹga nya Adam lẹ, ahị chịla kahị ka gbu. (Rom. 6:23) Ma, iJihova tị ya ahị ọwawa lụmẹ-lụmẹ hahị ọọlajị nya ọháha o-gbu enyi-ka ọlẹ kọ la ẹ-ẹga nyahị. (Eje. 103:10, 11) Iwe lee ahị ọwawa ọnyị myị́ ọnyị ọlẹ kahị ye bwu ẹga nyamwụ ri o-bwula ọnahị ọgahị nyamwụ ịnyị.—Rom. 12:6-8; Efe. 2:8.

Dụmwọ-dụmwọ ẹ-ẹga nya abwẹla nya alodehe. Ahị ka dọmwụ nyọka kụ irya nyori ọ chịla kị ka họ ang hahị gụ angịkịla, la ọ-jẹ́jẹ ka myị́. IJisọsị kpa ọ-chụ pwokwita nya alụkụrwọ ịlẹ kị nwaa uri nya ahị ọpyẹpyẹ nyọka mẹjẹ jaabwọ kọ chịkpẹẹ kaka ba ká irya ọkụkụ ụma ọlịịwẹ ka wẹ ẹpwụ nyahị myị́. Alụkụrwọ ịhyẹ dọmwụ nya ụkụrwọ lụtụrụ gbee da ka alobyi ẹ-ẹpwụ nya ẹnụ ọnyọọngịrị; angịkịla tị họ ụkụrwọ ẹ-ẹpwụ nya awa ookpokpo kem. Angịlẹ kị kà nya ọgbanyẹ me irya nyori ị ka nwaa uri gụ ọọlajị nya ụkụrwọ ọlẹ kị họ. (Mat. 20:1-16) IJisọsị da ẹla ọ-chụ pwokwita ọwẹ wụlẹ bwula ọ-mẹjẹ angịjụgbẹyị nyamwụ nyori ang myị́ ang ọlẹ ká Ohe ya haa chịla kọ ka myaa lẹhị.

Ang a myịng lẹhị, a tị juwa tịtọ nya ang bwu ẹga nya angịkịla ka. (1 Tẹs. 5:18) Gbịla ọlẹrụ ịPọlụ. Ọ́ byi angịnyị nya ịKịrayịsị ịla ịKọrịntị nyị ya ang ịlẹ kọ baba họọ ka, nanana nyori ọ la ọngịrị nyọka họ ịnyị. (1 Kọr. 9:11-14) Ang myị́ ang ọlẹ ká angịnyị ya hahị a myịhị lẹhị, ahị tị juwa tịtọ nya ang bwu ẹga nya angịkịla ka ịnyịnyị.

 Kpa ịlọng keji. Ụka ká ọngịnyị-ị́ ja hu ịlọmwụ hwaa lụmẹ kpoye, ọ kaa dọmwụ nyọka me irya nyori ọ baba nyọka la ang gụ ịlẹ kọ la-à wẹ. Ịlọhị ọ-kpa keji à ka dahị ụbwọ nyọka kụrụ irya ọtịpyọ ọlịịwẹ lẹ.

Ọlọmwụ ịDanẹlụ ri ọgụ-ẹpẹtẹ ọnyịịla nya ọngịnyị ọlẹ kọ kpa ịlọmwụ keji. Ọ bwu ugbiyegu ọlẹ kọ lihi. Ọ rụ okolobya, jẹ́ ang yẹẹyẹẹ bala ọ-jẹ́ họ ang ịkịla lụmẹ-lụmẹ ịnyịnyị. Lẹ, ọ ka me irya myị́ nyori iwe ọlẹ kọ la bala ụgbẹyị ọdatị ọlẹ kị kpọọ ri ang ọlẹ kọ chịla kọ ka ye ịlẹhị. (Dan. 1:3, 4, 19, 20) Ma, ịDanẹlụ kịnyaa la ọ-kpa ịlọmwụ keji, ọọwa tị du kọ há iJihova yẹẹyẹẹ.—Dan. 2:30; 10:11, 12.

Ahị cheji ba hi olegu nya ọngịnyị ọ-yẹ ịlọmwụ-ịlọmwụ bala ọngịnyị o-hu ịlọmwụ hwaa ọlẹ kọ myị odehe lẹẹ kpọrịkọọ alẹ. Ọkọkọ nyọọwa, ahị kịnyaa la ọ-chị ọkẹkẹnị ju ahị ọwawa ọnyị myị́ ọnyị ọlẹ ká iJihova ya hahị bwula ọnahị ọgahị nyamwụ.