E-EKPELEJI nya Ehile nya iMosisi, iJihova ye enewulo bala ikiripete myị nyọka ya kiliya họọ. Ị kaa gu ẹnyị nya ịchịnụ imiiye ịwẹ ba awụlẹ ba ẹ-ẹpwụ nya ehile nya iya ọkịlaa-kịla, ị tị jẹ́-ẹ yaa nyẹ awụlẹ ịnyịnyị. (Liv. 1:14; 12:8; 14:30) Ịyẹ tị́ du ká ọọwa ju apyobwuna? Ang odudu ọhẹ ri enewulo á ka ji chịpwaa ụka wuu ka. Ịyẹ à tị́ du?

Enewulo ri ịchịnụ ịlẹ kịị mwụ ẹpwa. Ị kaa juwa ẹ-ẹga myị́ ega nya Isirẹlụ ẹ-ẹpwụ nya ọya ịlẹ ká ẹga kaa la bwebwe. Ọya Okiriwo ọnyị myị́ ọnyị, ị kaa mwụ́ ka oye edii nya odehe ka ẹpwụma ịlẹ ká obwebweebwe kaa ji gụ́, lẹ ị kaa nyà lụka nya ụhyọ́ọ lẹlẹ. (Eje. 2:11, 12; Jer. 8:7) Ọọwa ri, ọ ka lujwo lụka onyogo ha ala Isirẹlụ nyọka yé enewulo kiliya lụka nya alogo.

Ma ikiripete ịwa á tị kaa mwụ ka ẹgẹhẹ ka, lẹ ị kaa ji ụ-ụwa Isirẹlụ ẹ-ẹpwụ nya ẹka wuu. Datị hi ọọwa, ị jẹ́-ẹ kpa ikiripete ẹ-ẹpwa. (Kụ ẹhị yẹ ịJọn 2:14, 16.) Jaabwọ ká ụpwụ ọlẹ ko ri Bible Plants and Animals ya, “ẹpwụ nya ẹpwa bala ẹpwa ilodehe nya ala Palestine wuu kaa la ikiripete. Ayịdẹpwa ọnyị myị́ ọnyị kaa lẹ ube nya ikiripete nya ịlọmwụ, ko ri ụjẹ ọlẹ kị kaa wu u-ugulọ haa nyọka kụ.”​—Kụ ẹhị yẹ Ayịsaya 60:8.

Lẹ iJihova mẹjẹ nyori ọ la ọháha bala ọ jẹ́-ẹ yẹ ẹla ẹkpẹ imiiye, bwula ọ-ya iwe da ha ala Isirẹlụ nyọka kpa ịchịnụ ịlẹ kị kaa ji chịpwaa haa ẹ-ẹpwụ nya ẹka wuu kiliya.