Adu a tawenen nga ar-arestuen ken ibalbalud ti gobierno ti Eritrea dagiti Saksi ni Jehova a pakairamanan dagiti babbai ken nataengan uray no saanda a nabista wenno naidarum gapu iti narelihiosuan nga aktibidad wenno gapu iti di ammo a rason. Iti presidential decree a napetsaan iti Oktubre 25, 1994, winaswas ni Presidente Afwerki ti pannakipagili (citizenship) dagiti Saksi gapu ta saanda a nakipartisipar idi 1993 para iti pannakaisinada kas pagilian ken saanda a kayat ti agsoldado gapu ta saan nga ipalubos ti konsiensiada. Sakbay a naipaulog ti inkapilitan a panagsoldado, nangted dagiti agtuturay iti Eritrea iti alternatibo a panagserbi para kadagiti saan a mayat nga agsoldado. Adu a Saksi ti nakiraman iti kastoy a panagserbi iti sidong ti nagduduma nga administrasion ti gobierno. Nangnangted pay idi ti gobierno iti “Certificate of Completed National Service” ken masansan a padpadayawanda dagiti makiramraman iti kasta a panagserbi. Ngem gapu iti dayta a presidential decree, dagiti Saksi ni Jehova ket ibalbalud, malmaltratuen, ken parparigaten dagiti polis iti Eritrea tapno mapilitanda a mangtallikud iti pammatida.

Innem a pulo ket uppat a Saksi ni Jehova ti nakabalud pay laeng ita (34 a lallaki ken 30 a babbai). Duapulo ket walo a Saksi ni Jehova (26 a lallaki ken 2 a babbai) ti nawayawayaan idi Disiembre 4, 2020. Tunggal maysa kadakuada ket naibalud iti 5 agingga iti 26 a tawen gapu iti pammatida. Idi Enero 29, 2021, nawayawayaan ti maysa a lalaki a Saksi kalpasan ti nasurok a 12 a tawen a pannakaibaludna, ken tallo pay a Saksi ti nawayawayaan idi Pebrero 1, 2021 (maysa a lalaki ken dua a babbai). Naibaludda iti uppat agingga iti siam a tawen.

Uppat a Saksi ti natay bayat a nakabaludda idiay Eritrea, ken tallo a nataenganen a Saksi ti natay kalpasan a nawayawayaanda gapu kadagiti nagrigat a kasasaad a napasaranda iti pagbaludan.

Idi 2018, dua a Saksi ti natay kalpasan a nayakarda iti Mai Serwa Prison. Natay ni Habtemichael Tesfamariam idi Enero 3 iti edad a 76, ken natay ni Habtemichael Mekonen idi Marso 6 iti edad a 77. Imbalud dagiti autoridad iti Eritrea dagitoy a lallaki idi 2008 uray awan ti kasoda.

Idi 2011 ken 2012, natay ti dua a Saksi gapu iti naranggas a pannakatratoda idiay Meitir Prison Camp. Natay ni Misghina Gebretinsae idi Hulio 2011 iti edad nga 62 gapu iti nakaro a pudot bayat ti kaaddana iti lugar a pagdusaan a maawagan iti “underground.” Natay met ni Yohannes Haile idi Agosto 16, 2012 iti edad nga 68 kalpasan ti dandani uppat a tawen a pannakaibaludna iti kasta met laeng a kasasaad. Natay ti tallo a natataengan a Saksi a da Kahsai Mekonnen, Goitom Gebrekristos, ken Tsehaye Tesfariam kalpasan a nawayawayaanda gapu iti narigat a kasasaad a napasaranda bayat nga addada iti Meitir Camp.

Agtultuloy ti di panangikaskaso ti Eritrea kadagiti internasional a pagalagadan maipapan iti kalintegan ti tao. Dagiti dadakkel nga ahensia a mangilablaban iti kalintegan ti tao kinondenarda ti pannakaipaidam dagiti kangrunaan a kalintegan ken agtultuloy nga idagdagadagda iti Eritrea a balbaliwanna ti situasion.

Idi 2014, naragsakan ti Human Rights Council (HRC) iti report ti Special Rapporteur maipapan iti situasion ti kalintegan ti tao idiay Eritrea, a mangidagdagadag kadagiti autoridad a raemenda ti kalintegan nga agkedked nga agsoldado gapu iti konsiensia “kas panangsurot kadagiti internasional a pagalagadan” ken “siguraduenda a nasayaat ti salun-at ti amin a balud; maipaay ti nasken a pannakaagas dagiti agkasapulan . . . ken pasayaatenda ti kasasaad dagiti pagbaludan maitunos kadagiti internasional a pagalagadan.” Iti resolusion idi 2015, imbaga ti HRC iti gobierno ti Eritrea a “maipalubos koma ti panagkedked nga agsoldado gapu iti konsiensia.”

Idi 2016, inkeddeng ti Commission of Inquiry on Human Rights idiay Eritrea a ti gobierno ti Eritrea ket nakaaramid iti “krimen maibusor iti tao” gapu iti “panangidadanesna maibatay iti relihion ken puli” kadagiti Saksi ni Jehova ken kadagiti dadduma.

Idi 2017, kuna ti African Committee of Experts on the Rights and Welfare of the Child (ACERWC) a madanaganda ta iti laksid ti kaadda dagiti linteg a mangipaay iti proteksion, mapapaidaman latta “dagiti annak dagiti Saksi ni Jehova” kadagiti kalintegan ken saan a nasayaat ti pannakatratoda. Inrekomenda ti ACERWC iti Eritrea a “bigbigen ken ipatungpalna a naan-anay ti kalintegan ti maysa nga ubing a maaddaan iti Wayawaya iti Panagpanunot, Konsiensia, ken Relihion nga awanan iti panangidumduma.”

Idi 2018, inrekomenda ti African Commission on Human and Peoples’ Rights nga “agtignay a dagus [ti Eritrea] tapno maipaayen dagiti napateg a kalintegan ti amin a balud, a pakairamanan . . . dagiti Saksi ni Jehova” ken maimbestigaran ti ipapatay dagiti Saksi iti pagbaludan. Impaganetgetda pay a masapul a siguraduen ti Eritrea a “masalakniban ti kalintegan [dagiti Saksi ni Jehova] kas umili.”

Idi Mayo 2019, indagadag ti UN Human Rights Committee (CCPR) iti Eritrea a siguraduenna a maipatungpal ti wayawaya ti relihion ken pammati ken “mawayawayaan ti amin a naaresto wenno naibalud gapu iti panangsurot iti kalinteganda mainaig iti wayawaya ti relihion, a pakairamanan dagiti Saksi ni Jehova.” Kiniddaw pay ti CCPR iti Eritrea a “siguraduenna a bigbigen ti lintegna ti panagkedked nga agsoldado gapu iti konsiensia ken mangted iti alternatibo a panagserbi para kadagiti sibilian nga agkedked nga agsoldado gapu ta saan nga ipalubos ti konsiensiada.”

Iti maysa a report idi Mayo 12, 2021, imbaga ti UN Special Rapporteur iti gobierno ti Eritrea a “wayawayaanna a dagus ti amin a naibalud gapu iti patpatienda a saan a nakasuan wenno nabista, agraman dagiti 20 a Saksi ni Jehova.” Naibaga pay iti Eritrea a “repasuenna ti naipaulog a desision a mangikkat iti kalintegan dagiti Saksi ni Jehova kas umili (citizen) gapu iti relihionda.” Masapul met a “respetuenna ti rekomendasion ti African Commission on Human and Peoples’ Rights tapno masigurado a maipaay kadagiti Saksi ni Jehova ti amin a kalinteganda kas umili, ken imbestigaranna dagiti naireport a natay a Saksi ni Jehova bayat a nakabalud.”

Awan ti naibaga iti kaaduan a lallaki a Saksi no kasano kapaut ti pannakaibaludda. Posible a maibaludda agingga a matayda wenno mawayawayaandanto laengen inton dandanidan matay. Gapu ta awan ti epektibo a legal a proseso wenno remedio para kadakuada, agparang a tungpal-biag ti pannakaibaludda.

1. Oktubre 17, 2024

   Nakabalud ti 64 a Saksi.

2. Pebrero 1, 2021

   Nawayawayaan ti tallo a Saksi.

3. Enero 29, 2021

   Nawayawayaan ti maysa a Saksi.

4. Disiembre 4, 2020

   Nawayawayaan ti 28 a Saksi.

5. Marso 6, 2018

   Natay ni Habtemichael Mekonen iti edad a 77 kalpasan ti pannakayakarna iti Mai Serwa Prison.

6. Enero 3, 2018

   Natay ni Habtemichael Tesfamariam iti edad a 76 kalpasan ti pannakayakarna iti Mai Serwa Prison.

7. Hulio 2017

   Nayakar iti Mai Serwa Prison iti ruar ti Asmara ti amin a Saksi a nakabalud iti Meitir Camp.

8. Hulio 25, 2014

   Nawayawayaan ti kaaduan kadagiti naaresto idi Abril 14 ngem nakabalud pay laeng ti 20 kadagiti naaresto idi Abril 27.

9. Abril 27, 2014

   Naaresto ti 31 a Saksi bayat ti panagtataripnongda nga agadal iti Biblia.

10. Abril 14, 2014

    Naaresto ti nasurok a 90 a Saksi bayat ti tinawen a Pananglaglagipda iti ipapatay ni Kristo.

11. Agosto 16, 2012

    Natay ni Yohannes Haile iti edad nga 68 gapu iti narigat a kasasaad iti pagbaludan.

12. Hulio 2011

    Natay ni Misghina Gebretinsae iti edad nga 62 gapu iti narigat a kasasaad iti pagbaludan.

13. Hunio 28, 2009

    Sinerrek dagiti autoridad ti balay ti maysa a Saksi bayat ti narelihiosuan a taripnong ket naaresto ti 23 a Saksi nga agtawen iti 2 agingga iti 80.

14. Abril 28, 2009

    Malaksid iti maysa, amin a Saksi ni Jehova a nakabalud kadagiti estasion ti polis ket inyakar dagiti autoridad iti Meitir Prison Camp.

15. Hulio 8, 2008

    Sinerrek dagiti autoridad dagiti balay ken pagtrabahuan tapno arestuenda ti 24 a Saksi. Kaaduan kadagitoy ti mangbibiag iti pamiliada.

16. Mayo 2002

    Imparit ti gobierno ti amin a relihion a saan a sakup ti uppat a relihion nga inaprobaran ti gobierno.

17. Oktubre 25, 1994

    Naipaulog ti bilin ti presidente a mangikkat iti pannakipagili (citizenship) dagiti Saksi ni Jehova ken kadagiti napateg a kalinteganda.

18. Septiembre 17, 1994

    Naibalud da Paulos Eyasu, Isaac Mogos, ken Negede Teklemariam uray no saanda a nakasuan wenno nabista.

19. 1950’s

    Naipasdek idiay Eritrea dagiti immuna a komunidad dagiti Saksi ni Jehova.