Nairugi ti pannakaibangon ti Kingdom Hall iti 1228 Pensacola Street, Honolulu, Hawaii, idi 1935. Adda idi sadiay ni Joseph F. Rutherford a presidente ti Watch Tower Society. Daytoy a bassit a pasdek ti kaunaan a naawagan iti “Kingdom Hall” iti intero a lubong. Iti nasurok a 80 a tawen, adu ti nagdaydayaw ken Jehova iti daytoy a Kingdom Hall. Ita, kalpasan ti 85 a tawen, ti Kingdom Hall iti Pensacola Street ket us-usaren ti uppat a kongregasion nga aggigimong iti lima a lengguahe, a pakairamanan ti Hawaii Pidgin. a

Sakbay ti COVID-19 pandemic, inawis dagiti kakabsattayo dagiti umili, opisial ti gobierno, ken mannursuro tapno makitada ti Kingdom Hall manipud idi Pebrero 11 agingga iti 15, 2020 kalpasan a napabaro dayta. Adda dagiti tour guide ken historical display para kadagiti bisita, ken adda met dagiti kakabsat a nangilawlawag maipapan iti trabaho dagiti Saksi ni Jehova. Idi Pebrero 16, ni Brother David H. Splane, a miembro ti Bagi a Manarawidwid dagiti Saksi ni Jehova, ket nagdiskurso para iti dedikasion.

Imbaga ti maysa a kabsat a timmulong iti panangisagana iti programa: “Saanmi nga inawis dagiti bisita tapno kasabaanmi ida, ngem nakitami a nagdakkel a panangsaksi daytoy kadagiti saan pay a makaam-ammo kadagiti Saksi ni Jehova.”

Nakatulong daytoy nga okasion tapno lallalo a maipateg dagiti kakabsat iti Hawaiian Islands ti nagpintas a pakasaritaan dagiti Saksi ni Jehova ken makitada a mismo ti kaitungpalan ti sasao a “kadagiti isla ti baybay, idaydayawdanto ti nagan ni Jehova a Dios ti Israel.”—Isaias 24:15.