Ti Umuna a Samuel 9:1-27
-
Agkita da Samuel ken Saul (1-27)
9 Adda idi maysa a lalaki iti tribu ni Benjamin nga agnagan iti Kis.+ Isu ket nagtaud iti pamilia da Abiel, Zeror, Becorat, ken Afias. Nakabakbaknang daytoy a Benjaminita.+
2 Adda anakna nga agnagan iti Saul,+ maysa nga agkabannuag ken naguapo—awan idi kadagiti Israelita ti naguapguapo ngem isuna—nataytayag ngem iti amin nga umili ta pagat-abagana laeng ida.
3 Naminsan, napukaw dagiti asno* ni Kis nga ama ni Saul. Kinuna ni Kis ken Saul nga anakna: “Pangngaasim ta mangikuyogka iti maysa kadagiti katulongan ket mapanyo biroken dagiti asno.”
4 Sinursorda ti kabambantayan ti Efraim ken ti daga ti Salisa, ngem saanda a nabirokan ida. Napanda iti rehion ti Saalim, ngem saanda latta a nakita dagiti asno. Sinursorda ti intero a daga dagiti Benjaminita, ngem saanda a nabirokan ida.
5 Idi nakadanonda iti daga ti Zuf, kinuna ni Saul iti kaduana a katulonganna: “Agawidtan di la ket ta datan ti pagdandanagan ni amak imbes a dagiti asno.”+
6 Ngem kinuna ti katulonganna: “Adda lalaki nga adipen ti Dios iti daytoy a siudad a raraemen ti amin. Pumudno ti amin nga ibagana.+ Inta agdamag kenkuana bareng maibagana no sadino ti rumbeng a papananta.”
7 Gapu iti dayta, kinuna ni Saul iti katulonganna: “No mapanta, ania ti itedta kenkuana? Awanen ti tinapay kadagiti pagkargaanta; awan ti maisagutta iti lalaki nga adipen ti pudno a Dios. Ania ti itedta?”
8 Isu a kinuna ti katulongan ni Saul: “Kitaem! Adda awitko a kakapat ti maysa a siklo* a pirak. Daytanto ti itedko iti adipen ti pudno a Dios, ket ibagananto kadata ti rumbeng a papananta.”
9 (Idi un-unana idiay Israel, kastoy ti ibagbaga ti maysa a tao no mapan agpaiwanwan iti Dios: “Umaykayo, ket intayo iti pumaparmata.”+ Ta ti propeta ita ket maaw-awagan idi iti pumaparmata.)
10 Kinuna ni Saul iti katulonganna: “Nasayaat ti imbagam. Intan.” Isu a napanda iti siudad nga ayan ti adipen ti pudno a Dios.
11 Bayat a sumangsang-atda iti siudad, nasabatda dagiti babbai a mapan agsakdo iti danum. Dinamagda kadakuada: “Adda kadi ditoy ti pumaparmata?”+
12 Insungbatda: “Wen, adda. Immun-una la bassit ngem kadakayo. Darasenyo, immay ita ditoy siudad ta dagiti tattao ket agdaton+ ita iti nangato a disso.+
13 Apaman a makadanonkayo iti siudad, masarakanyonto sakbay a sumang-at iti nangato a disso tapno mangan. Saan a mangan dagiti umili agingga a sumangpet ta isu ti mangbendision iti daton. Inton nalpasen, mabalinen a mangan dagidiay naawis. Isu a darasenyo tapno madanonyo.”
14 Ket napanda iti siudad. Idi nakasangpetdan iti sentro ti siudad, sinabat ida ni Samuel bayat nga agturturong iti nangato a disso.
15 Iti aldaw sakbay a simmangpet ni Saul, ni Jehova imbagana ken* Samuel:
16 “Inton bigat iti agarup kastoy met la nga oras, ibaonkonto kenka ti maysa a lalaki manipud iti daga ti Benjamin.+ Bukbokam ti ulona iti nasantuan a lana kas lider iti ilik nga Israel,+ ket isalakannanto ti ilik iti ima dagiti Filisteo. Ta nakitak ti panagrigat dagiti tattaok ken nangngegko ti ikkisda.”+
17 Idi nakita ni Samuel ni Saul, kinuna ni Jehova: “Isu daytoy ti lalaki nga ibagbagak kenka, ‘Isunto ti mangituray iti ilik.’”+
18 Immasideg ni Saul ken Samuel iti tengnga ti ruangan ket kinunana: “Pangngaasim ta ibagam kaniak no sadino ti balay ti pumaparmata.”
19 Simmungbat ni Samuel ken Saul: “Siak ti pumaparmata. Umun-unakan a sumang-at agingga iti nangato a disso, ket makipangankanto kaniak ita nga aldaw.+ Ibagakto ti amin a kayatmo a maammuan* ket parubbuatankanto inton bigat.
20 No maipapan kadagiti asno a napukaw tallo nga aldaw ti napalabasen,+ saankan a madanagan ta nasarakanda dagitan. Malaksid iti dayta, saan kadi a kukuam ken ti intero a pamilia ni amam ti amin a sanikua ti Israel?”+
21 Gapuna, insungbat ni Saul: “Saan aya a maysaak a Benjaminita a kabassitan kadagiti tribu ti Israel,+ ket ti pamiliak ti kanunumuan iti amin a pamilia iti tribu ni Benjamin? Isu nga apay a kasta ti ibagbagam kaniak?”
22 Kalpasanna, inkuyog ni Samuel ni Saul ken ti katulonganna ket impanna ida iti kuarto a panganan. Pinagtugawna ida iti kabesera ti lamisaan, a kasangoda dagiti naawis nga agarup 30 a lallaki.
23 Kinuna ni Samuel iti kosinero: “Idasarmo ti impailasinko kenka.”
24 Innala ti kosinero ti luppo, ket indasarna iti sango ni Saul. Kinuna ni Samuel: “Daytoy ti nailasin para kenka. Kanem ta inlasinda dayta para kenka iti daytoy nga okasion. Ta imbagak nga adda dagiti inawisko a bisita.” Nakipangan ngarud ni Saul ken ni Samuel iti dayta nga aldaw.
25 Kalpasanna, napanda iti siudad manipud iti nangato a disso,+ ket intultuloy ni Samuel ti nakitungtong ken Saul iti tuktok ti balay.
26 Bimmangonda a nasapa, ket idi aglawagen, inayaban ni Samuel ni Saul a mapanda iti tuktok ti balay, ket kinunana: “Agsaganakan ta parubbuatankan.” Nagsagana ni Saul sada rimmuar a dua ken Samuel.
27 Bayat a sumalsalogda iti ruar ti siudad, kinuna ni Samuel ken Saul: “Ibagam iti katulongan+ nga umun-unan,” isu nga immun-unan a nagna. “Ngem ditoyka pay laeng tapno maibagak kenka ti imbaga ti Dios.”
Footnotes
^ Lit., “kabaian nga asno.”
^ Lit., “linuktanna ti lapayag ni.”
^ Lit., “amin nga adda iti pusom.”
