Ti Maikadua nga Ar-ari 13:1-25
13 Iti maika-23 a tawen ti panagturay ni Jehoas+ nga anak ni Ahazias+ nga ari ti Juda, ni Jehoahaz nga anak ni Jehu+ ti nagbalin nga ari iti Israel idiay Samaria, ket nagturay iti 17 a tawen.
2 Inar-aramidna ti dakes iti imatang ni Jehova, ken tinuladna ti basol ni Jeroboam nga anak ni Nebat a nakaigapuan ti panagbasol ti Israel.+ Saanna nga insardeng dayta.
3 Gapuna, nakaro ti pungtot ni Jehova+ iti Israel,+ ket maulit-ulit nga inyawatna ida ken Ari Hazael+ ti Siria ken ni Ben-hadad+ nga anak ni Hazael.
4 Idi agangay, impakaasi ni Jehoahaz ti pabor* ni Jehova, ket impangag ni Jehova, ta nakitana ti panangirurumen ti ari ti Siria iti Israel.+
5 Gapuna, nangipaay ni Jehova iti mangisalakan iti Israel+ manipud iti Siria, ket nagnaed manen dagiti Israelita kadagiti balayda kas iti dati.*
6 (Nupay kasta, tinuladda ti basol ti sangakabbalayan ni Jeroboam a nakaigapuan ti panagbasol ti Israel.+ Intultuloyda nga inaramid dayta a basol,* ken nagtalinaed ti sagrado a poste*+ idiay Samaria.)
7 Ti laeng nabati ken Jehoahaz ket ti armada a buklen ti 50 a kumakabalio, 10 a karuahe, ken 10,000 a soldado, ta pinarmek ida ti ari ti Siria,+ a pinayatpayatanna ida a kasla tapok iti tiempo ti panagirik.+
8 Ti dadduma pay a pasamak iti pakasaritaan ni Jehoahaz, ti amin nga inaramid ken panagballigina, ket naisurat iti libro dagiti pasamak idi tiempo dagiti ari ti Israel.
9 Naginana ni Jehoahaz a kas kadagidi ammana, ket intabonda idiay Samaria.+ Ni Jehoas nga anakna ti simmaruno nga ari.
10 Iti maika-37 a tawen ti panagturay ni Ari Jehoas ti Juda, ni Jehoas+ nga anak ni Jehoahaz ti nagbalin nga ari ti Israel idiay Samaria, ket nagturay iti 16 a tawen.
11 Inar-aramidna ti dakes iti imatang ni Jehova, ken tinuladna ti basol ni Jeroboam nga anak ni Nebat a nakaigapuan ti panagbasol ti Israel.+ Nagtultuloy* kadagitoy a basol.
12 Ti dadduma pay a pasamak iti pakasaritaan ni Jehoas, ti amin nga inaramid ken panagballigina ken ti pannakilabanna ken Ari Amazias ti Juda,+ ket naisurat iti libro dagiti pasamak idi tiempo dagiti ari ti Israel.
13 Naginana ni Jehoas a kas kadagidi ammana, ket nagtugaw ni Jeroboam*+ iti tronona. Naitabon ni Jehoas idiay Samaria, iti nakaitaneman dagiti ari ti Israel.+
14 Idi naaddaan ni Eliseo+ iti sakit a nakatayanna idi agangay, napan kenkuana ni Jehoas nga ari ti Israel ket nagsangit sa kinunana: “Apok, apok!* Ti karuahe ti Israel ken dagiti kumakabaliona!”+
15 Kinuna kenkuana ni Eliseo: “Mangalaka iti bai ken kadagiti pana.” Gapuna, nangala iti bai ken kadagiti pana.
16 Kinuna ni Eliseo iti ari ti Israel: “Iggamam ti bai.” Iniggamanna ti bai, ket imparabaw ni Eliseo dagiti imana kadagiti ima ti ari.
17 Kalpasanna, kinunana: “Luktam ti tawa iti daya.” Linuktan ngarud dayta ti ari. Kinuna ni Eliseo: “Ibiatmo!” Gapuna, imbiatna dayta. Kinuna manen ni Eliseo: “Ti pana ti panagballigi* ni Jehova, ti pana ti panagballigi* maibusor iti Siria! Abakemto ti Siria idiay Afek+ agingga a maibusmo ida.”
18 Intuloyna: “Alaem dagiti pana,” ket innalana dagita. Kinunana iti ari ti Israel: “Ibautmo iti daga.” Namitlo a binautna ti daga sa nagsardengen.
19 Gapuna, nakaunget ti adipen ti pudno a Dios ket kinunana: “Naminlima wenno namin-innem koma a binautmo ti daga! Iti kasta, abakemto ti Siria agingga a maibusmo, ngem mamitlonto laeng nga abakem ti Siria.”+
20 Kalpasan dayta, natay ni Eliseo sa naitabon. Adda idi dagiti grupo dagiti Moabita a tulisan+ a mapan iti daga iti rugrugi ti tawen.*
21 Madama idi nga itabtabon dagiti lallaki ti bangkay ti maysa a lalaki. Idi nakitada dagiti tulisan, dagus nga impalladawda ti bangkay iti nakaitabonan ni Eliseo sa nagtatarayda. Idi naisagid ti bangkay kadagiti tulang ni Eliseo, nagbiag ti bangkay+ ket timmakder.
22 Inrurumen ni Hazael+ nga ari ti Siria ti Israel+ iti intero a panagturay ni Jehoahaz.
23 Ngem pinaboran ken kinaasian ida ni Jehova ken impakitana ti pannakaseknanna kadakuada+ maigapu iti tulagna kada Abraham,+ Isaac,+ ken Jacob.+ Dina kayat a dadaelen ida, ken saanna a pinapanaw ida iti sanguananna agingga ita nga aldaw.
24 Idi natay ni Ari Hazael ti Siria, ni Ben-hadad nga anakna ti simmaruno nga ari.
25 Binawi ni Jehoas nga anak ni Jehoahaz manipud ken Ben-hadad nga anak ni Hazael dagiti siudad nga innalana idi ken Jehoahaz nga amana babaen ti gubat. Namitlo nga inabak ni Jehoas ni Ben-hadad,+ ket napasublina dagiti siudad ti Israel.
Footnotes
^ Wenno “pinaluknengna ti rupa.”
^ Kayatna a sawen, sitatalged ken sikakappia.
^ Lit., “Intultuloyda ti nagna iti dayta.”
^ Lit., “Nagna.”
^ Kayatna a sawen, ni Jeroboam II.
^ Lit., “Amak, amak!”
^ Wenno “panangisalakan.”
^ Wenno “pannakaisalakan.”
^ Lit., “iti iyaay ti tawen,” nalabit iti primavera.
