Ti Maikadua a Cronicas 20:1-37
20 Idi agangay, nagkaykaysa dagiti Moabita+ ken Ammonita+ agraman ti sumagmamano nga Amonim* tapno makigubatda ken Jehosafat.
2 Iti kasta, naipadamag ken Jehosafat: “Umay makigubat kenka ti nakaad-adu a tattao a naggapu iti rehion ti baybay,* manipud Edom,+ ket addada idiay Hazazon-tamar, kayatna a sawen, idiay En-gedi.”+
3 Nagbuteng ni Jehosafat, ket inkeddengna* a sapulen ni Jehova.+ Imbilinna nga agayunar ti intero a Juda.
4 Iti kasta, naguummong dagiti umili ti Juda tapno agsaludsodda ken Jehova.+ Naggapuda iti amin a siudad ti Juda tapno agkonsultada ken Jehova.
5 Nagtakder ni Jehosafat iti naguummong nga umili ti Juda ken Jerusalem iti balay ni Jehova iti sango ti baro a paraangan,
6 ket kinunana:
“O Jehova a Dios dagidi ammami, saanka aya a Dios iti langit;+ saan aya nga iturturayam ti amin a nasion?+ Adda ita imam ti pannakabalin ken bileg, ken awan ti makabael a bumusor kenka.+
7 O Diosmi, saan aya a pinagtalawmo dagiti agnanaed iti daytoy a daga iti sanguanan ti ilim nga Israel sa intedmo dayta kas manayon a sanikua ti kaputotan* ti gayyemmo a ni Abraham?+
8 Nagnaedda iti dayta ken nangbangonda iti santuario para iti naganmo,+ ket kinunada,
9 ‘No adda dumteng kadakami a didigra, babaen man ti espada, pannusa, makapapatay a sakit, wenno nakaro a bisin, bay-annakami nga agtakder iti sanguanan daytoy a balay ken iti sanguanam (ta adda ti naganmo iti daytoy a balay)+ tapno agpatulongkami kenka iti rigatmi, ket dumngegka koma ken isalakannakami.’+
10 Ita, immay dagiti lallaki a naggapu iti Ammon, Moab, ken iti kabambantayan ti Seir,+ a saanmo nga impalubos a sakupen ti Israel idi rimmuarda idiay Egipto. Binaybay-anda ida ken saanda ida nga inibus.+
11 Ita, pagtalawendakami ketdin iti sanikuam nga impatawidmo kadakami.+
12 O Diosmi, saanmonto aya a dusaen ida?+ Ta awan labanmi kadagitoy nakaad-adu a tattao nga umay rumaut kadakami. Saanmi nga ammo ti aramidenmi,+ ngem sikikita ti matami nga agpatulong kenka.”*+
13 Agtaktakder idi iti sanguanan ni Jehova ti amin nga umili ti Juda, agraman dagiti ubbing, assawa, ken annakda.*
14 Iti kasta, nagtignay ti espiritu ni Jehova ken ni Jahaziel nga anak ni Zacarias nga anak ni Benaias nga anak ni Jeiel nga anak ni Matanias a Levita a karaman kadagiti annak ni Asaf. Adda idi ni Jahaziel iti tengnga dagiti umili.
15 Kinunana: “Dumngegkayo, dakayo amin nga umili ti Juda ken dakayo nga agnanaed iti Jerusalem ken sika Ari Jehosafat! Kastoy ti kinuna ni Jehova kadakayo, ‘Dikay agbuteng wenno agamak gapu kadagitoy nakaad-adu a tattao, ta saan a dakayo ti makigubat no di ket ti Dios.+
16 Darupenyo ida inton bigat. Aggapudanto iti sang-atan ti Ziz, ket masarakanyonto ida iti ungto ti tanap* iti sango ti let-ang ti Jeruel.
17 Saanto a kasapulan a makigubatkayo. Agpuestokayo, agtakderkayo,+ ket kitaenyo ti panangisalakan ni Jehova kadakayo.*+ O Juda ken Jerusalem, dikay agbuteng wenno agamak.+ Rautenyo ida inton bigat, ket addanto ni Jehova kadakayo.’”+
18 Dagus a nagrukob ni Jehosafat iti daga, ket nagrukob ti amin nga umili ti Juda ken dagiti agnanaed iti Jerusalem iti sanguanan ni Jehova tapno agdayawda ken Jehova.
19 Timmakder dagiti Levita a kaputotan dagiti Cohatita+ ken Korita tapno idaydayawda ni Jehova a Dios ti Israel iti nakapigpigsa a timek.+
20 Nasapada a bimmangon iti bigat ket nagturongda iti let-ang ti Tekoa.+ Bayat a rumrummuarda, timmakder ni Jehosafat ket kinunana: “Denggendak, O Juda ken dakayo nga agnanaed iti Jerusalem! Agtalekkayo ken Jehova a Diosyo tapno makapagtakderkayo a sititibker.* Agtalekkayo kadagiti propetana,+ ket agballigikayto.”
21 Idi nakasaritanan dagiti umili, nangdutok kadagiti lallaki nga agkanta+ ken mangidaydayaw ken Jehova a nakasuotda iti nasantuan a bado ken magmagnada iti sanguanan dagiti armado a lallaki, ket kinunada: “Agyamankayo ken Jehova, ta agnanayon ti napudno nga ayatna.”+
22 Idi nangrugida a siraragsak nga agkanta iti panangidaydayaw, nangipuesto ni Jehova iti mangtambang kadagiti lallaki ti Ammon, Moab, ken ti kabambantayan ti Seir a mangraraut idi iti Juda, ket pinatayda ti tunggal maysa.+
23 Nakilaban dagiti Ammonita ken Moabita kadagiti agnanaed iti kabambantayan ti Seir+ ket inibusda ida. Idi napapataydan dagiti agnanaed iti Seir, isuda metten ti nagpipinnatay.+
24 Ngem idi napan dagiti umili ti Juda iti pagwanawanan ti let-ang+ tapno kitaenda dagiti kabusorda, nakitada a naiwara dagiti bangkayda iti daga;+ awan ti asinoman a nakalasat.
25 Gapuna, immay ni Jehosafat ken dagiti umilina tapno bagkatenda dagiti banag a nabati. Adu ti nasarakanda a sanikua, bado, ken napapateg nga alikamen nga innalada agingga a saandan a kabaelan nga awiten.+ Tallo nga aldaw a binunagda dagiti naalada, ta nakaad-adu.
26 Iti maikapat nga aldaw, naguummongda iti Tanap* ti Beraca, ta sadiay nga indaydayawda* ni Jehova. Dayta ti makagapu a pinanagananda dayta iti Tanap ti Beraca*+ agingga ita nga aldaw.
27 Kalpasanna, amin nga umili ti Juda ken Jerusalem, nga indauluan ni Jehosafat, ket siraragsak a nagsubli idiay Jerusalem ta pinagballigi ida ni Jehova kadagiti kabusorda.+
28 Gapuna, nagturongda idiay Jerusalem a toktokarenda dagiti dekuerdas nga instrumento, arpa,+ ken trumpeta+ ket simrekda iti balay ni Jehova.+
29 Nagbuteng iti Dios ti amin a nasion idi nangngegda a nakilaban ni Jehova kadagiti kabusor ti Israel.+
30 Iti kasta, natalna ti pagarian ni Jehosafat, ket intultuloy ti Diosna nga impaayan iti talna iti amin a kabusorda.+
31 Nagtultuloy a nagturay ni Jehosafat iti Juda. Agtawen iti 35 idi nagbalin nga ari, ket nagturay iti 25 a tawen idiay Jerusalem. Ni Azuba nga anak ni Silhi ti nanangna.+
32 Tinuladna ti inaramid ni amana nga Asa.+ Saan a nagsukir, ket inaramidna ti umiso iti imatang ni Jehova.+
33 Ngem saan a naikkat dagiti nangato a disso,+ ken saan pay a naisagana dagiti umili ti pusoda a mangsapul iti Dios dagidi ammada.+
34 Ti dadduma pay a pasamak iti pakasaritaan ni Jehosafat, manipud rugi agingga iti ngudona, ket naisurat kadagiti sao ni Jehu+ nga anak ni Hanani,+ a nairaman iti Libro ti Ar-ari ti Israel.
35 Kalpasan daytoy, nakialiansa ni Jehosafat nga ari ti Juda ken Ari Ahazias ti Israel, a dakes ti inaramidna.+
36 Gapuna, nakisosio ken Ahazias nga agaramid kadagiti barko a mapan idiay Tarsis,+ ket nagaramidda kadagiti barko idiay Ezion-geber.+
37 Ngem nagipadto ni Eliezer nga anak ni Dodavahu a taga-Maresa maibusor ken Jehosafat, ket kinunana: “Gapu ta nakialiansaka ken Ahazias, dadaelento ni Jehova dagiti aramidmo.”+ Iti kasta, nadadael dagiti barko,+ ket saanda a nakadanon idiay Tarsis.
Footnotes
^ Wenno mabalin a, “Meunita.”
^ Nalawag a ti Natay a Baybay.
^ Lit., “inturongna ti rupana.”
^ Lit., “bin-i.”
^ Lit., “nakakita kenka dagiti matami.”
^ Lit., “annakda a lallaki.”
^ Karayan a maaddaan laeng iti danum no panagtutudo.
^ Wenno “kitaenyo no kasano nga isalakannakayo ni Jehova.”
^ Wenno “makapagibturkayo.”
^ Wenno “Kapatagan.”
^ Lit., “a binendisionanda.”
^ Kaipapananna, “Bendision.”
