Exodo 19:1-25
19 Iti maikatlo a bulan kalpasan a pimmanaw dagiti Israelita idiay Egipto, nakadanonda iti let-ang ti Sinai.
2 Iti isu met la nga aldaw kalpasan a pimmanawda idiay Refidim,+ nakadanonda idiay Sinai ket nagkampoda iti let-ang. Nagkampo dagiti Israelita iti sango ti bantay.+
3 Simmang-at ni Moises tapno agparang iti pudno a Dios ket imbaga kenkuana ni Jehova manipud iti bantay:+ “Ibagam iti pamilia ni Jacob ken kadagiti Israelita,
4 ‘Nakitayo ti inaramidko kadagiti Egipcio,+ tapno maawitkayo a kas iti agila a mangitayab kadagiti sibongna ket mayasidegkayo kaniak.+
5 No ikagumaanyo ti agtulnog iti timekko ken surotenyo ti tulagko, sigurado nga agbalinkayto nga espesial a sanikuak* manipud iti amin a nasion,+ ta kukuak ti intero a daga.+
6 Ket agbalinkayto a pagarian a buklen dagiti papadi ken maysa a nasantuan a nasion.’+ Dagita ti ibagam kadagiti Israelita.”
7 Napan inayaban ni Moises dagiti panglakayen dagiti umili ket imbagana kadakuada ti amin nga imbilin ni Jehova kenkuana.+
8 Kalpasan dayta, sangsangkamaysa a simmungbat dagiti tattao: “Situtulokkami a mangaramid iti amin nga imbaga ni Jehova.”+ Dagus nga imbaga ni Moises ken Jehova ti sungbat dagiti tattao.
9 Kinuna ni Jehova ken Moises: “Kitaem! Um-umayak kenka babaen ti napuskol nga ulep, tapno mangngeg dagiti tattao ti pannakisaritak kenka ket kanayonto a mamatida kenka.” Impakaammo ni Moises ken Jehova ti imbaga dagiti tattao.
10 Kinuna ni Jehova ken Moises: “Mapanka kadagiti tattao, ket pagbalinem ida a nasantuan ita nga aldaw ken inton bigat, ket masapul a labaanda dagiti badoda.
11 Masapul a nakasaganada iti maikatlo nga aldaw, ta iti dayta nga aldaw, bumabanto ni Jehova iti Bantay Sinai iti imatang ti amin a tattao.
12 Mangikabilka kadagiti senial iti aglawlaw ti bantay tapno saan a lumbes dagiti tattao ket ibagam kadakuada, ‘Dikay sumang-at iti bantay wenno bumaddek iti sakaananna. Asinoman a bumaddek iti bantay ket sigurado a mapapatay.
13 Awan ti mangsagid iti nakabasol. Masapul a maubor wenno mapana* agingga a matay, tao man dayta wenno animal.’+ Ngem inton mapaguni ti tangguyob a sara ti kalakian a karnero,+ mabalindan ti umasideg iti bantay.”
14 Idi bimmaba ni Moises iti bantay, pinagbalinna a nasantuan dagiti tattao ket linabaanda dagiti badoda.+
15 Kinunana kadagiti tattao: “Agsaganakayo para iti maikatlo nga aldaw. Dikay pay la makikakaidda kadagiti assawayo.”*
16 Iti agsapa ti maikatlo nga aldaw, naggurruod ken nagkimat, ken adda napuskol nga ulep+ iti bantay. Immaweng ti nakapigpigsa nga uni ti tangguyob, ket nagpigerger ti amin a tattao iti kampo gapu iti buteng.+
17 Indauluan ni Moises dagiti tattao a rimmuar iti kampo tapno sabtenda ti pudno a Dios, ket nagtakderda iti sakaanan ti bantay.
18 Immasuk ti intero a Bantay Sinai ta bimmaba ni Jehova babaen ti apuy.+ Nagpangato ti asukna a kas iti asuk ti maysa a pugon, ket nagunggon ti intero a bantay.+
19 Pimmigsa a pimmigsa ti uni ti tangguyob. Nagsao ni Moises ket simmungbat ti pudno a Dios.
20 Ket bimmaba ni Jehova iti tuktok ti Bantay Sinai. Kalpasanna, inayaban ni Jehova ni Moises a mapan iti tuktok ti bantay isu a simmang-at ni Moises.+
21 Kinuna ni Jehova ken Moises: “Sumalogka ket pakdaaram dagiti tattao a dida padpadasen ti umasideg a kumita ken Jehova ta no aramidenda dayta, adu kadakuada ti matay.
22 Uray dagiti papadi a kanayon nga umas-asideg ken Jehova pagbalinenda a nasantuan ti bagida, tapno saan ida a papatayen* ni Jehova.”+
23 Kinuna ni Moises ken Jehova: “Saan a mabalin a sumang-at dagiti tattao iti Bantay Sinai gapu ta pinakdaarannakami idin, ‘Mangikabilka kadagiti senial iti aglawlaw ti bantay ket pagbalinem dayta a sagrado.’”+
24 Ngem kinuna ni Jehova kenkuana: “Sumalogka sa agsublika ditoy a kaduam ni Aaron, ngem saanmo a palubosan nga umay dagiti papadi ken dagiti tattao a mangkita ken Jehova, tapno saanna ida a patayen.”+
25 Isu a simmalog ni Moises a napan kadagiti tattao ket imbagana dagita kadakuada.
Footnotes
^ Wenno “a napateg a sanikuak.”
^ Nalabit maduyok iti pika wenno gayang.
^ Lit., “Dikay umas-asideg iti babai.”
^ Lit., “rauten.”
