Isaias 33:1-24
33 Kaasika pay, sika a manangdadael a saan pay a nadadael;+Sika a traidor a saan pay a natraidor!
Inton malpaska a mangdadael, madadaelkanto.+
Inton malpaska a mangtraidor, matraidorkanto.
2 O Jehova, kaasiannakami.+
Mangnamnamakami kenka.
Agbalinka a takiagmi*+ iti tunggal bigat,Wen, ti mangisalakan kadakami iti tiempo ti rigat.+
3 Agtalaw dagiti tattao gapu iti napigsa a timekmo.
No tumakderka, mawarawara dagiti nasion.+
4 Kas iti panaguurnong dagiti narawet a dudon, maurnongto dagiti samsamyo;Agdudupudopto iti dayta dagiti tattao kas iti pangen dagiti dudon.
5 Maitan-okto ni Jehova,Ta agnanaed iti kangatuan.
Punnuennanto ti Sion iti kinahustisia ken kinalinteg.
6 Isu ti mamagbalin a natalged kadagiti tiempom;Ti naindaklan a panangisalakan,+ sirib, pannakaammo, ken panagbuteng ken Jehova+—Daytoy ti gamengna.
7 Agpukpukkaw dagiti natured a lallaki iti kalsada;Agsangsangit a sipapait dagiti mensahero ti kappia.
8 Napanawan dagiti kalsada;Awan ti magmagna kadagiti dalan.
Winaswasna* ti tulagan;Linaksidna dagiti siudad;Saanna nga ikabkabilangan ti tao.+
9 Agladladingit* ken nalaylay ti daga.
Naibabain ti Lebanon;+ nagrunot dayta.
Nagbalin a desierto ti Sharon,Ken naregreg dagiti bulong ti Basan ken Carmelo.+
10 “Ita, tumakderak,” kuna ni Jehova,“Itan-okkon ti bagik;+Ipadayagkon ti bagik.
11 Mangyinawkayo iti nagango a ruot ket mangyanakkayo iti garami.
Ibusennakayto ti espirituyo a kas iti apuy.+
12 Agbalinto dagiti tattao a kas iti napuoran nga apug.
Mauramdanto a kas kadagiti napukan a siit.+
13 Denggenyo ti aramidek, dakayo nga adda iti adayo!
Bigbigenyo ti pannakabalinko, dakayo nga adda iti asideg!
14 Mabutbuteng dagiti managbasol idiay Sion;+
Agpigpigerger dagiti apostata:‘Asino kadatayo ti makapagnaed iti ayan ti mangibus nga apuy?+
Asino kadatayo ti makapagnaed iti saan a maiddep nga apuy?’
15 Daydiay agtultuloy a magna iti kinalinteg,+Nga agsao iti nalinteg,+A saan nga agkusit, ken mangallilaw,Saan nga umawat iti pasuksok,+Saan a dumngeg kadagiti plano a panangpapatay,Ken saan a kumita iti dakes
16 —Agnaedto iti kangatuan;
Dagiti kabatuan ti natalgedto a pagkamanganna,Maitedto ti taraonna,Ken saanto a maibus ti danum a suplayna.”+
17 Makitamto ti nadayag nga ari;Makakitadanto iti daga iti adayo.
18 Malagipto* ti pusom ti nakabutbuteng a banag:“Ayan ti sekretario?
Ayan ti nagbayad iti buis?+
Ayan ti nangbilang kadagiti torre?”
19 Saanmonton a makita ti natangsit nga ili,Ti ili a narigat a tarusan* ti lengguahena,A saan a maawatan ti beddal a dilana.+
20 Kitaem ti Sion, ti siudad a pagpipiestaantayo!+
Makitamto ti Jerusalem kas natalna a pagnaedan,Maysa a tolda a saan a mayakar.+
Saanto a maparut dagiti pasokna,Ken awanto ti mapugsat a talina.
21 Ngem iti dayta a lugar, ti nadayag a Dios a ni Jehova,Salaknibannatayto a kas kadagiti karayan ken nalawa a kanal,Awanto ti barko a mapan kadagitaKen awanto ti dadakkel a barko a lumasat kadagita.
22 Ta ni Jehova ti Ukomtayo,+Ni Jehova ti nangted iti lintegtayo,+Ni Jehova ti Aritayo;+Isu ti mangisalakan kadatayo.+
23 Lumukayto dagiti tali ti barko dagiti kabusor;Saandanto a matengngel ti poste ken saanda a mayukrad ti layag.
Iti dayta a tiempo, adunto ti samsam a pagbibingayan;Adunto ti maala uray dagiti pilay.+
24 Ket awanto ti residente* a mangibaga: “Masakitak.”+
Mapakawanton ti basol dagiti agnanaed iti daga.+
Footnotes
^ Wenno “bilegmi.”
^ Tumukoy iti kabusor.
^ Wenno mabalin a, “Namagaan.”
^ Wenno “Utobento.”
^ Lit., “nauneg.”
^ Wenno “agnanaed.”
