Isaias 42:1-25
42 Adtoy! Ti adipenko+ a supsuportarak!
Ti pinilik,+ a pakaragsakak!*+
Inkabilko kenkuana ti espirituk;+Iyegnanto ti hustisia kadagiti nasion.+
2 Saanto nga agikkis wenno agpukkaw,Ken saannanto nga ipangngeg ti timekna iti kalsada.+
3 Awanto ti tukkolenna a naparpar a runo,Ken saannanto nga iddepen ti agkurkuridemdem a pabilo.+
Iyegnanto ti hustisia babaen ti kinamatalekna.+
4 Dinto kumudrep wenno maparpar agingga a maipasdekna ti hustisia iti daga;+Ur-urayen dagiti isla ti lintegna.*
5 Daytoy ti kinuna ti pudno a Dios, ni Jehova,Ti Namarsua iti langit ken ti Naindaklan a nangyukrad iti dayta,+Daydiay nangipasdek iti daga ken nangpataud iti linaonna,+Daydiay nangted iti anges iti tao+Ken espiritu kadagidiay magmagna iti dayta:+
6 “Siak, ni Jehova, inayabanka gapu ta nalintegak,Ig-iggamak ti imam.
Saluadankanto ken itedka kas tulag kadagiti tao+Ken kas silaw dagiti nasion,+
7 Tapno luktam dagiti mata ti bulsek,+Tapno iruarmo ti balud iti bartolinaKen dagidiay agtugtugaw iti nasipnget a pagbaludan.+
8 Siak ni Jehova. Dayta ti naganko;Diak ited ti dayagko iti asinoman,*Wenno ti dayawko kadagiti kinitikitan nga imahen.+
9 Kitaenyo, naglabasen ti immuna a bambanag;Ipakaammok itan ti baro a bambanag.
Ibagak ti maipapan kadagita sakbay a tumaudda.”+
10 Kantaanyo ni Jehova iti baro a kanta,+A pakaidayawanna manipud kadagiti ungto ti daga,+Dakayo nga aglaylayag iti baybay ken dakayo a parsua iti dayta,Dakayo nga isla ken dakayo nga agnanaed kadagita.+
11 Agpukkaw koma ti let-ang ken dagiti siudadna,+Dagiti purok a pagnanaedan ti Kedar.+
Siraragsak koma nga agpukkaw dagiti agnanaed iti dakkel a bato.Agikkisda koma iti tuktok dagiti bantay.
12 Ipadayagda koma ni Jehova,Ken ipakaammoda ti dayawna kadagiti isla.+
13 Rummuarto ni Jehova kas iti nabileg a lalaki.+
Agtignayto a sireregta kas iti mannakigubat.+
Agpukkawto, wen, mangipukkawto iti gubat;Ipakitananto a nabilbileg ngem kadagiti kabusorna.+
14 “Nabayagen a nagulimekak.
Nagul-ulimek ken nagtepteppelak.
Kas iti agpaspasngay a babai,Agasug, aganangsab, ken kamakamekto ti angesko.
15 Dadaelekto dagiti bantay ken turod,Ket paganguek ti amin a mulada.
Pagbalinekto nga isla* dagiti karayanKen pagmagaek dagiti nadanum a lugar.+
16 Iturongkonto dagiti bulsek iti dalan a saanda nga ammo+Ken papagnaek ida iti dana a saanda a kabesado.+
Pagbalinekto a lawag ti kinasipnget iti sanguananda+Ken patagek ti likkalikkaong a lugar.+
Daytoy ti aramidekto para kadakuada, ket diakto baybay-an ida.”
17 Agsubli ken maibabaintoDagidiay agtaltalek kadagiti kinitikitan nga imahen,Dagidiay agkunkuna iti metal nga estatua:* “Dakayo ti diosmi.”+
18 Dumngegkayo, dakayo a tuleng;Kumitakayo, dakayo a bulsek.+
19 Asino ti bulsek a kas iti adipenko,Ken tuleng a kas iti mensahero nga imbaonko?
Asino ti bulsek a kas iti daydiay ginunggonaak,Ken bulsek a kas iti adipen ni Jehova?+
20 Adu ti makitkitayo, ngem diyo ikankano.
Nakalukat dagiti lapayagyo, ngem dikay dumdumngeg.+
21 Maipagapu iti kinalintegna,Pagayatan ni Jehova nga itan-ok ken pagbalinen a nadayag ti lintegna.*
22 Ngem natiliw ken naala ti sanikua daytoy nga ili;+Napupokda amin kadagiti abut ken pagbaludan.+
Natiliwda ket awan ti mangispal kadakuada,+Ken naala ti sanikuada ngem awan ti agkuna: “Isubliyo dagita!”
23 Asino kadakayo ti dumngeg iti daytoy?
Asino ti mangipangag ken dumngegto maipapan iti masanguanan?
24 Asino ti nangyawat ken Jacob tapno matiliw,Ken iti Israel tapno maala ti sanikuana?
Saan aya a ni Jehova, a nagbasolantayo?
Saanda a kayat ti magna iti dalanna,Ken saanda nga agtulnog iti lintegna.*+
25 Gapuna, imbuyatna kenkuana ti pungtot,Ti ungetna ken ti kinaranggas ti gubat.+
Naibus amin nga adda iti aglawlawna, ngem saan a nangikankano.+
Gimmil-ayab a bumusor kenkuana, ngem saanna nga impapuso.+
Footnotes
^ Wenno “pakaragsakan ti kararuak.”
^ Wenno “instruksionna.”
^ Wenno “Diak ibingay ti dayagko iti asinoman.”
^ Wenno “igid ti baybay.”
^ Wenno “sinukog nga estatua.”
^ Wenno “instruksionna.”
^ Wenno “instruksionna.”
