Jeremias 32:1-44
32 Ti mensahe ni Jehova ken Jeremias idi maika-10 a tawen ti panagturay ni Ari Zedekias ti Juda, kayatna a sawen, iti maika-18 a tawen ti panagturay ni Nabucodonosor.*+
2 Iti dayta a tiempo, ti Jerusalem ket palpalawlawan dagiti armada ti ari ti Babilonia, ken nakabalud ni propeta Jeremias iti Paraangan ti Guardia+ iti balay* ti ari ti Juda.
3 Ta impaibalud ni Ari Zedekias ti Juda,+ nga ibagbagana: “Apay a kastoy ti ipadpadtom? Ibagbagam, ‘Daytoy ti imbaga ni Jehova: “Itedkonto daytoy a siudad iti ari ti Babilonia, ket sakupennanto.+
4 Saanto a makalibas ni Ari Zedekias kadagiti Caldeo, ta sigurado a maitedto iti ari ti Babilonia, ket personal a makisaritanto kenkuana iti rupanrupa.”’+
5 ‘Ipannanto ni Zedekias idiay Babilonia, ket agyanto sadiay agingga nga ikeddengko ti aramidek kenkuana,’ kuna ni Jehova. ‘Uray makilablabankayo kadagiti Caldeo, saankayto nga agballigi.’”+
6 Kinuna ni Jeremias: “Daytoy ti imbaga ni Jehova kaniak,
7 ‘Umayto kenka ni Hanamel nga anak ti angkelmo* a ni Salum, ket ibagana: “Gatangem ti talonko idiay Anatot,+ ta sika ti umuna nga adda kalinteganna a mangsaka iti dayta.”’”+
8 Kas imbaga ni Jehova, immay kaniak ni Hanamel a kasinsinko* iti Paraangan ti Guardia, ket imbagana: “Pangngaasim ta gatangem ti talonko idiay Anatot, iti daga ti Benjamin, ta adda kalintegam a mangtagikua ken mangsaka iti dayta. Gatangemon.” Ket naamirisko a pagayatan dayta ni Jehova.
9 Ginatangko ngarud ti talon idiay Anatot iti kasinsinko a ni Hanamel. Tinimbangko ti kuarta+ iti sangona, 7 a siklo* ken 10 a pedaso a pirak.
10 Kalpasanna, insuratko dayta iti katulagan,+ intatakko ti selio, nangayabak kadagiti mangtestigo,+ ken tinimbangko ti kuarta.
11 Innalak ti katulagan ti pananggatang, daydiay natatakan iti selio sigun iti bilin ken linteg, agraman daydiay saan a natatakan iti selio.
12 Ti katulagan ti pananggatang ket intedko ken Baruk+ nga anak ni Nerias+ nga anak ni Masias iti sango ni Hanamel a kasinsinko ken dagiti testigo a nagpirma iti katulagan ti pananggatang, ken iti amin a Judio nga agtugtugaw iti Paraangan ti Guardia.+
13 Ita, imbilinko ken Baruk iti sanguananda:
14 “Daytoy ti imbaga ni Jehova a panguluen dagiti armada, ti Dios ti Israel, ‘Alaem dagitoy a katulagan, daytoy a katulagan ti pananggatang, ti natatakan iti selio ken ti saan a natatakan, ket ikabilmo ida iti damili a pagkargaan tapno maidulin ket agpaut dagita.’
15 Ta daytoy ti imbaga ni Jehova a panguluen dagiti armada, ti Dios ti Israel, ‘Magatangto manen iti daytoy a daga dagiti balbalay ken taltalon ken kaubasan.’”+
16 Idi naitedkon ken Baruk nga anak ni Nerias ti katulagan ti pananggatang, inkararagko ken Jehova:
17 “O Kangatuan* nga Apo Jehova! Kitaem! Inaramidmo ti langit ken ti daga babaen ti dakkel a pannakabalinmo+ ken nabileg* a takiagmo. Awan ti imposible kenka,
18 sika ti mangipakpakita iti napudno nga ayat iti rinibu, ngem mangipalpalubos a mapasaran ti* annak dagiti epekto ti basol dagidi ammada,+ sika ti pudno a Dios, ti naindaklan ken mannakabalin, a ti naganmo ket Jehova a panguluen dagiti armada.
19 Nagsayaat dagiti balakadmo* ken naindaklan dagiti aramidmo.+ Makitkitam ti amin nga ar-aramiden dagiti tattao,+ tapno gunggonaam ti tunggal maysa sigun iti aramidna.+
20 Nangaramidka kadagiti pagilasinan ken milagro idiay Egipto nga agdindinamag agingga ita nga aldaw, isu a limmatak ti naganmo iti Israel ken iti intero a sangatauan+ a kas ita.
21 Ket idi inruarmo ti ilim nga Israel idiay Egipto, inusarmo dagiti pagilasinan ken milagro, agraman mannakabalin nga imam ken nabileg a takiagmo, ken dagiti nakabutbuteng a pasamak.+
22 “Idi agangay, intedmo kadakuada daytoy a daga a pagay-ayusan ti gatas ken diro+ nga inkarim kadagidi ammada.+
23 Ket immayda ken tinagikuada dayta, ngem saanda a nagtulnog iti timekmo wenno dida sinurot ti lintegmo. Awan ti inaramidda kadagiti imbilinmo, isu nga impalubosmo a mapasamak kadakuada amin dagitoy a didigra.+
24 Kitaem! Immay dagiti soldado ket nangaramidda iti bunton a pagdalanan tapno masakupda ti siudad.+ Ket gapu iti espada,+ nakaro a bisin, ken makapapatay a sakit,+ sigurado a mayawatto ti siudad iti ima dagiti Caldeo a makilablaban iti dayta. Napasamak amin nga imbagam, kas makitkitam ita.
25 Ngem Imbagam kaniak, O Kangatuan nga Apo Jehova, ‘Gatangem ti talon ken mangayabka kadagiti testigo,’ uray no siguradon a mayawat daytoy a siudad kadagiti Caldeo.”
26 Isu a kinuna ni Jehova ken Jeremias:
27 “Siak ni Jehova, ti Dios ti intero a sangatauan.* Adda aya imposible kaniak?
28 Daytoy ngarud ti imbaga ni Jehova, ‘Itedko daytoy a siudad kadagiti Caldeo ken iti ima ni Ari Nabucodonosor* ti Babilonia, ket sakupennanto dayta.+
29 Ket sumrekto dagiti Caldeo a makilablaban iti daytoy a siudad. Puoranda ti intero a siudad agraman ti balbalay a dagiti atepda ti nagpuoran+ dagiti tattao kadagiti datonda ken Baal ken nangibukbokanda iti daton nga inumen para kadagiti sabali a dios tapno saktanda ti riknak.’+
30 “‘Ta manipud pay idi ubbingda, kanayonen a dakes ti ar-aramiden dagiti tattao iti Israel ken iti Juda iti sanguanak.+ Kanayon a pagpungtotendak dagiti tattao iti Israel gapu iti ar-aramidenda,’ kuna ni Jehova.
31 ‘Ta daytoy a siudad ti makagapu a makapungtot ken makaungetak,+ manipud idi binangonda agingga ita nga aldaw, isu a masapul a maikkat dayta iti sanguanak,+
32 gapu iti amin a dakes nga inaramid dagiti tattao iti Israel ken Juda. Pinagpungtotdak amin dagiti ari,+ prinsipe,+ padi, propeta,+ ken dagiti umili ti Juda ken Jerusalem.
33 Kanayon a pinanawan ken tinallikudandak;+ nupay maulit-ulit nga inkagumaak nga isuro ida,* awan kadakuada ti nangipangag tapno umawat iti disiplina.+
34 Ket inkabilda dagiti makarimon nga idoloda iti balay a nakaipanaganan ti naganko, tapno rugitanda dayta.+
35 Nangibangonda met kadagiti nangato a disso a pagdaydayawanda ken Baal iti Tanap ti Anak ni Hinnom,*+ tapno ipalasatda ti annakda a lallaki ken babbai iti apuy a para ken Molek,+ banag a saanko nga imbilin kadakuada,+ ken pulos a saanko a napanunot* nga ipaaramid kadakuada ti kasta a makarimon a banag, tapno agbasol ti Juda.’
36 “Daytoy ngarud ti kuna ni Jehova a Dios ti Israel maipapan iti daytoy a siudad nga ibagbagayo a maited iti ari ti Babilonia babaen ti espada, nakaro a bisin, ken makapapatay a sakit,
37 ‘Urnongekto ida manipud iti amin a lugar a nangiwarawaraak kadakuada gapu iti unget, pungtot, ken nakaro a rurodko,+ ket isublikto ida iti daytoy a lugar ken pagnaedekto ida a sitatalged.+
38 Agbalindanto a tattaok, ket agbalinakto a Diosda.”+
39 Ikkakto ida iti maysa a puso+ ken dalan tapno kanayon nga agbutengda kaniak, para iti pagsayaatanda ken dagiti annakda kalpasanda.+
40 Kaduakto ida a mangaramid iti agnanayon a tulag,+ a saanakto a sumardeng nga agaramid iti nasayaat kadakuada;+ ket isurokto dagiti pusoda nga agbuteng kaniak, tapno saandak a tallikudan.+
41 Maragsakanakto a mangaramid iti nasayaat kadakuada,+ ket permanentento a pagnaedek ida iti daytoy a daga+ iti amin a pusok ken kararuak.’”*
42 “Ta daytoy ti imbaga ni Jehova, ‘No kasano nga impalak-amko kadagiti tattao daytoy amin a nakaro a didigra, iyegkonto met kadakuada ti amin a kinaimbag* nga inkarik kadakuada.+
43 Ket magatangto manen dagiti talon iti daytoy a lugar+ nupay ibagbagayo: “Langalang dayta nga awanan iti tao ken animal ken naiteden kadagiti Caldeo.”’
44 “‘Dagiti talon ket magatangto iti kuarta, mayaramidan kadagiti katulagan ti pananggatang ken matatakan iti selio, ken maayabanto dagiti testigo iti daga ti Benjamin,+ kadagiti aglawlaw ti Jerusalem, kadagiti siudad iti Juda,+ kadagiti siudad iti kabambantayan, kadagiti siudad iti kapatagan,+ ken kadagiti siudad iti abagatan, ta isublikto dagiti naipanaw kadakuada,’+ kuna ni Jehova.”
Footnotes
^ Lit., “Nabucodorosor,” sabali pay nga ispelingna.
^ Wenno “palasio.”
^ Kayatna a sawen, kabsat ni tatangmo.
^ Wenno “anak ni angkelko.”
^ Wenno “Soberano.”
^ Lit., “nakaunnat.”
^ Lit., “iti barukong ti.”
^ Wenno “Naindaklanka no maipapan kadagiti panggepmo.”
^ Lit., “amin a lasag.”
^ Lit., “Nabucodorosor,” sabali pay nga ispelingna.
^ Lit., “nasapaak a bimmangon ken nangisuro.”
^ Wenno “saan a pulos a simrek iti pusok.”
^ Wenno “nasayaat a bambanag.”
